Vüqar Qədirov: “Ermənistan ciddi dilemma qarşısında qalacaq ki, bundan da çıxış yolu çox çətindir”
Vaşinqton Rusiya, İran, Şimali Koreya və Çinin bir sıra hərbi-müdafiə strukturlarına qarşı sanksiyalar tətbiq edib. Həmçinin, Türkiyə, Misir və Birləşmiş Ərəb Əmirliklərinin bəzi təşkilatlarına də məhdudiyyətlər qoyulub. Bu barədə ABŞ Dövlət Departamentinin federal qeydiyyatda yerləşdirdiyi xəbərdarlıq sənədində deyilir.
Sanksiyaların səbəbi kimi həmin strukturların ABŞ-ın kütləvi qırğın silahlarının yayılmasına dair qanunvericiliyini pozması göstərilib. Ümumilikdə, siyahıda 28 hərbi-müdafiə strukturunun adı var və ABŞ hökuməti onları İran, Suriya və Şimali Koreyanın qanadlı, yaxud ballistik raketlər hazırlamasına bu və ya digər şəkildə kömək etməkdə ittiham edib.
Qeyd edək ki, yeni sanksiyalara əsasən, Rusiyanın “Rosoboroneksport” şirkətilə Amerika tərəfindən istənilən əməkdaşlığa artıq tam qadağa qoyulub.
Göründüyü kimi, ABŞ-ın tətbiq etdiyi sanksiyaların hədəfində Ermənistanın arxalandığı və onunla yaxşı münasibətdə olan iki dövlətin də adı var. Söhbət apardığı işğalçı siyasətdə Ermənistana nəfəslik verən Rusiya ilə İrandan gedir. Belə vəziyyətin yaranması Ermənistanın gələcəyinə necə təsir edəcək?
Ekspert Vüqar Qədirov qəzetimizə açıqlamasında bildirdi ki, Birləşmiş Ştatların Rusiya və İranla yaranan gərginliyi postsovet məkanına daxil olan ölkələrə də təsirsiz ötüşməyəcək: “Bu xüsusda Rusiyanın Cənubi Qafqazda özünün forpostu elan etdiyi Ermənistan daha çox ziyan çəkə bilər. Məsələ ondadır ki, Ermənistan Rusiyanın tək siyasi deyil, iqtisadi, hərbi asılılığındadır. Sanksiyalar gündəmə gəlməmişdən, Amerika Birləşmiş Ştatlarından İrəvana xəbərdarlıq məktubu göndərildi. Həmin məktubda ABŞ Ermənistan və digər ölkələri xəbərdar edib ki, Rusiya hərbi texnikasını alacaqları təqdirdə sanksiyalar tətbiq oluna bilər. Yeni sanksiyalar Rusiya Federasiyası ilə hərbi və yaxud kəşfiyyat əlaqələrinə malik olan ölkələrə tətbiq ediləcək. İş burasındadır ki, bu ölkə tam şəkildə Rusiya silah-sursatı ilə təchiz olunub. Narahatlıq həm də ondan ibarətdir ki, Ermənistan Birləşmiş Ştatlarla sıx əməkdaşlıq etmək siyasəti də yürüdür. ABŞ mütəmadi olaraq bu ölkəyə maliyyə yardımı göstərir, erməni lobbisinin ən güclü qanadı da məhz bu ölkədədir. Sanksiyaların tətbiqi isə iqtisadiyyatı onsuz da ağır olan ölkə üçün ciddi fəsadlara gətirib çıxara bilər. Göründüyü kimi, Ermənistan ABŞ-ın ciddi sanksiya tətbiq etdiyi iki ölkə ilə çox sıx əlaqədədir. Bu illər ərzində yürütdüyü siyasət ucbatından bütün layihələrdən təcrid olunaraq, faktiki olaraq blokada şəraitində yaşayan Ermənistan Rusiya ilə İranın dəstəyi nəticəsində özünü saxlaya bilib. Xüsusilə də İran Ermənistan üçün mühüm nəfəslik rolunu oynayıb. Birbaşa sərhədləri olduğu üçün bu iki ölkə arasında ciddi ticarət əlaqələri də mövcud olub. Bildiyimiz kimi, bu sanksiyalar çox əhatəlidir və yalnız silah alverini nəzərdə tutmur. Sanksiya altına İranın və Rusiyanın ticarət əlaqələrini həyata keçirən firmaları da düşüblər. Ermənistanda yeni hakimiyyətə gələn qüvvə təbii ki, ABŞ-ın qəzəbinə tuş gəlmək istəməyəcək. Yəni bu iki ölkəyə tətbiq olunan sanksiya rejiminə əməl etməyə çalışacaq. Ancaq bu da o anlama gəlir ki, Ermənistanın vəziyyəti daha da pisləşəcək və nəfəsliklər bağlanacaq. ABŞ-ın isə Ermənistanı tam vəziyyətdən çıxara biləcək təsir mexanizmləri yoxdur. Bir sözlə, Ermənistan ciddi dilemma qarşısında qalacaq ki, bundan da çıxış yolu çətindir. Yaranmış vəziyyət Ermənistan üçün çox ağır perspektiv vəd edir”.
Məhəmmədəli QƏRİBLİ
