Ermənistanda yeni hökumət böhranı yaranır
Ermənistanda məlum hakimiyyət dəyişiklyindən sonra ölkədə proseslərin hansı istiqamətdə cərəyan edəcəyi xüsusi maraq doğurur. Çünki həm yeni baş nazir Nikol Paşinyan Serj Sarksiyanın komanda üzvlərini iqtidardan uzaqlaşdırır, həm də elə bu komandanın əksər təmsilçiləri özləri könüllü şəkildə tutduğu postlardan istefa verir.
Nikol Paşinyanın isə hökumətdə təmsil edilməsi üçün kadrları kifayət qədər azdır. Elə bu səbəbdən hesab edilir ki, yaxın tezlikdə Ermənqistanda hökumət idarəçiliyində ciddi problemlər üzə çıxacaq.
Xatırladaq ki, baş nazir postunu tutduqdan sonra Nikol Paşinyan ölkə prezidenti Armen Sarkisyana polis rəisi Vladimir Qasparyan və Milli Təhlükəsizlik Xidmətinin direktoru Georgi Kutoyanın işdən çıxarılmasını təklif edib. Armen Sarkisyan polis rəisi Vladimir Qasparyan və Milli Təhlükəsizlik Xidmətinin direktoru Georgi Kutoyanı istefaya göndərib. Ermənistanın dövlət əmlakının idarə edilməsi üzrə dövlət komitəsinin sədri Arman Saakyan isə özü istefa verib. Ermənistanın müdafiə naziri Vigen Sarkisyanla bərabər, onun müavinləri və bəzi generallar da istefa verib. Ermənistanın vitse-spikeri Eduard Şarmazanov bu və digər istefaları təbii sayır. Vurğulayır ki, parlament çoxluğuna malik Respublika Partiyası Nikol Paşinyan hökumətinin fəaliyyətinə mane olmaq niyyətində deyil: “Biz populist addımlar atmaq və Nikol Paşinyan hökumətinin fəaliyyətini mənasız yerə sabotaj etmək niyyətində deyilik. Bizim partiya artıq müxalifətdir və yeni hökumətdə vəzifələr almaq istəmirik”.
Ermənistanın eks-prezidenti Levon Ter Petrosyan isə qeyd edir ki, əslində, Respublika Partiyası parlamentdəki üstünlüyü sayəsində hökumətin bütün qanunvericilik təşəbbüslərini yox edə bilər. Onun sözlərinə görə, respublikaçıların nümayəndələri son çıxışlarında bu istəklərini gizlətmir: “Son zamanlar çoxları parlamentlə hökumət arasındakı münasibətlərdə yaranan qeyri-adi situasiyaya siyasi çalar verməyə cəhd edir. Parlamentdəki çoxluq özünü müxalifət elan edib, hökumətə isə azlıq kimi yanaşılır. Buna Paşinyanın yeni hökuməti necə müqavimət göstərə bilər? İndiyə qədər Paşinyan parlamentə öz iradəsini aksiyaların yardımı ilə yeridə bilib. Bu, beynəlxalq ictimaiyyət tərəfindən demokratik görüntü olaraq qəbul edilib. O bundan sonra parlamentə eyni metodla təsir edə bilərmi? Aydındır ki, yox. Ona görə də bu resurs artıq yox olub. Parlamenti öz iradənə xalq hərəkatının lideri kimi tabe etdirmək başqa məsələ, baş nazir qismində buna cəhd etmək tamam ayrı məsələdir. Belə olan halda Paşinyanın yol verəcəyi bu addımları dünya ictimaiyyəti qəbul etməyəcək. Çoxları anlayır ki, yaranmış situasiyadan yeganə çıxış yolu növbədənkənar seçkinin keçirilməsidir. Bu isə Seçki Məcəlləsində köklü dəyişikliklərdən sonra baş tutmalıdır”.
Ter-Petrosyan “ilur.am” saytında dərc etdirdiyi “Zəruri izahat” məqaləsində bu xüsusda daha sonra yazır: “Bu günlərdə hamı qeyri-adi situasiyaya aydınlıq gətrimək üçün baş sındırır. Parlament çoxluğu özünü müxalifət elan edib, icra hakimiyyəti isə azlığın hökuməti hesab olunur. Belə bir vəziyyət dövlət aparatının maneəsiz işləməsinə mane olur. Vəziyyəti ağırlaşdıran budur ki, hazırkı parlamentin legitimliyini beynəlxalq icma da tanıyıb. Bu fonda yeni parlament seçkilərinə ehtyiac artır. Parlament seçkisinin keçirilməsinin özü də asan olmayacaq, belə ki, seçki məcəlləsinə lazımi düzəliş və əlavələr hazırkı parlamentdən keçirilməlidir”. Xatırladaq ki, Nikol Paşinyan son günlərə qədər Levon Ter-Petrosyanın komandasına daxil siyasi fiqurlardan hesab olunurdu. Beləliklə, görünən odur ki, Ermənistanda idarəçiliklə bağlı ciddi problemlər üzə çıxmaqdadır. Bu vəziyyətdə Paşinyanın ümid etdiyi oliqarx və parlamentdə 31 deputata malik partiyanın rəhbəri olan “Çiçəklənən Ermənistan“ın rəhbəri Hagik Sarukyan da maraqlı şərtlər irəli sürür. Belə ki, Sarukyan Nikol Paşinyana hökumətdə ancaq yüksək postlar veriləcəyi halda təmsil oluna biləcəklərini bildirib. Ermənistanda nəşr olunan “Jamanak” qəzeti yazır ki, “Çiçəklənən Ermənistan” partiyasının lideri Hagik Sarukyan partiyasının üzvləri ilə görüşüb: “O, görüşdə partiyadaşlarının diqqətinə çatdırıb ki, yeni hökumətdə yalnız yüksək və strateji postlarda təmsil olunmaq imkanı veriləcəyi halda iştirak edəcəklər. Sarukyan bunu Nikol Paşinyana da çatdırıb. Lakin Sarukyanın Paşinyandan hansı postları istədiyi məlum deyil. Amma dəqiq olan budur ki, Paşinyan hələ Serj Sarkisyanı yola salmamışdan əvvəl Sarukyana hökumətdə təmsil olunmaq vədi verib”.
Qeyd edək ki, bir müddət əvvəl Ermənistan KİV-i Nikol Paşinyanın əsas müttəfiqi Hagik Sarukyanın partiyasının hökumətdə yer almayacağını bildirmişdilər. Mənbələr bunu keçmiş baş nazir Serj Sarkisyana qarşı olan müttəfiqlərin münasibətlərinin pozulması ilə əlaqələndirirdi. Münasibətlərin pozulmasından sonra Paşinyan onunla bütün əlaqələrini kəsib. Əlaqələrin qırılmasına gəlincə, bu, tərəflər arasında hökumət strukturlarının bölüşdürülməsi məsələsindəki anlaşılmazlıqla izah edilir.
Nahid SALAYEV
