Mehman Muradlı: “ABŞ özlərinə yaxın olan hakimiyyəti qorumaq üçün ilk olaraq bu addımı atıb”
Ermənistanda hakimiyyətdən salınan Serj Sarkisyanı qarşıda ciddi problemlər gözləyir. Bir sıra ölkələrin mediasında yayılan məlumata görə, yaxın günlərdə ABŞ-ın Federal Təhqiqatlar Bürosunun müstəntiqlərinin Ermənistana səfəri nəzərdə tutulur.
Onlar Sarkisyan və onun komandasının Ermənistandan oğurlayaraq, qeyri-leqal yolla xaricə çıxardığı pullarla bağlı araşdırma aparmaq niyyətindədirlər. Ukraynanın sabiq prezidenti Yanukoviçin pullarının ölkəyə qaytarılması ilə məşğul olan Burov soyadlı mütəxəssis Ukrayna mətbuatına bildirib ki, bu bir qədər asan olmayan prosesdir: “Bunun üçün ciddi sübut və dəlillər ortaya qoyulmalıdır. Ən başlıcası isə, sübut olunmalıdır ki, Sarkisyanın xarici banklarda hesabında olan pullar həqiqətən cinayət yolu ilə əldə edilib. Bundan əlavə, pullar saxlanan ölkələr mütləq belə bir sual verəcəklər: bu işlərlə bağlı əvvəl cinayət işi qaldırılıbmı? Əgər Ermənistanın yeni rəhbərliyi israrlı olsa, Sarkisyan məsuliyyətdən boyun qaçıra bilməyəcək”.
ABŞ FTX-si Ermənistanda Sarkisyanla bağlı hansı addımları ata bilər və bunun nəticəsi necə olacaq?
Hüquqşünas Mehman Muradlı qəzetimizə bildirdi ki, ABŞ-dan belə bir təşəbbüsün irəli sürülməsi məsələnin ciddiliyindən xəbər verir: “Sarkisyan, demək olar ki, 10 il ölkəyə rəhbərlik edib. Bundan əvvəl də mühüm postlarda çalışıb. Onun adı bir çox maliyyə fırıldaqlarında hallanıb. Bunu hamı bilir və heç kimə sirr deyil. Paşinyanın hakimiyyətə gəlməsi də məhz Sarkisyanın talançılığından doğan narazılıq dalğası üstündə baş tutdu. Xalq S.Sarkisyan və onun komandasını ölkənin milli sərvətlərini talamaqda ittiham edirdi. Bundan əlavə, son bir il ərzində xaricdən Sarkisyanın ünvanına yağdırılan ittihamlara fikir verin. Xüsusilə də xaricdəki erməni diasporunun tanınmış simaları Sarkisyanı rüşvətxorluqda, xalqın malını talamaqda ittiham edirdilər. Hətta erməni iş adamlarına ora investisiya yatırmamaqla bağlı onlar tərəfindən çağırışlar olurdu. Sarkisyanın oğurladığı pullarla məhz ABŞ xəfiyyəsinin maraqlanması təsadüfi deyil. Serj bu pulları tək oğurlamayıb. Mafiyanın bir ucu da gedib ABŞ-a çıxdığı üçün, onlar bu işlə marqlanırlar. Sübutlar deyəndə, təbii ki, var. ABŞ FTX-sinin əlində mötəbər dəlillər olmasa, onlar Ermənistana gəlməzlər. Belə faktları əldə etmək Paşinyan üçün də çətin deyil. Paşinyan hələ ki, hakimiyyəti tam ələ ala bilməyib. O, Sarkisyanın üstünə bütün gücü ilə gedə bilmir. Ancaq bilir ki, hakimiyyətdən salınan qrupun əlində olan vəsait onun sonuna səbəb ola bilər. Kifayət qədər siyasi təcrübəsi olan Qarabağ klanı həmin maliyyəni işə salmaqla tez bir zamanda hakimiyyətə qayıda bilər. Buna görə də Paşinyan ABŞ-la bu məsələdə bir oynayır. Proses Sarkisyanın həbsinə deyil, onu oğurladığı pullardan təcrid etməyə yönəlib. ABŞ özlərinə yaxın olan hakimiyyəti qorumaq üçün ilk olaraq bu addımı atıb. Hesab edirəm ki, ortaya ciddi bir nəticə qoyulacaq”.
Məhəmmədəli QƏRİBLİ
