Azər Həsrət: “Azərbaycan dövləti mətbuat azadlığına sədaqətini nümayiş etdirərək həmin media qurumlarının təmsilçilərinə icazə verib”
Məlum olduğu kimi, Nikol Paşinyan Ermənistanın baş naziri seçilən kimi dərhal işğal altında olan Dağlıq Qarabağa səfər etdi. Paşinyan dünyanın nüfuzlu media qurumları ilə yeni seçilən dövlət rəhbəri statusundakı təmasını orada qurdu.
Onun keçirdiyi mətbuat konfransında dünyanın aparıcı media təsisatlarının iştirakı nəzərə çarpdı. Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev bildirib ki, “Financial Times”, “Associated Press”, “France Press” kimi media qurumları rəsmi məktubla Azərbaycan Respublikası XİN-ə müraciət ediblər. Onlar işğal olunmuş ərazilərə səfər etmək üçün Azərbaycan hökumətinin icazəsini xahiş ediblər: “Sözügedən beynəlxalq KİV-in ölkəmizin qanunlarına, ərazi bütövlüyü və suverenliyinə, həmçinin, beynəlxalq hüquqa hörmətlərini nəzərə alaraq, onların nümayəndələrinin işğal olunmuş ərazilərimizə səfərinə etiraz edilməyib. Ümidvarıq ki, bu səfər əsnasında beynəlxalq KİV nümayəndələri Azərbaycanın işğal olunmuş Laçın rayonu və Dağlıq Qarabağ bölgəsi ilə hərəkət edərək bu ərazilərin köklü azərbaycanlı sakinlərinə qarşı işğal nəticəsində törədilmiş etnik təmizləmə və onların mülkiyyətinin, Azərbaycan xalqına məxsus maddi-mədəni irsin talan edilməsi ilə yerindəcə tanış ola biləcəklər”.
Onun sözlərinə görə, Azərbaycan xarici KİV nümayəndələrinə bu səfər əsnasında tamamilə viran edilmiş Ağdam, Cəbrayıl, Füzuli və digər rayonlara da getməyi tövsiyə edir. Ancaq bəzi radikal qüvvələr XİN-in bu addımını tənqid edir. Onlar hesab edirlər ki, Azərbaycan bu icazəni verməməli idi. Göründüyü kimi, bu addımın atılmasını XİN bir sıra parametrlərə əsaslanaraq izah edir. İddia olunur ki, bu addımları ilə həmin KİV-lər ölkəmizin qanunlarına hörmət edib, eyni zamanda belə səfərləri etməklə həmin media nümayəndələri real vəziyyətlə yerində tanış ola bilərlər. XİN-in bu addımını necə dəyərləndirmək olar?
Media məsələləri üzrə ekspert Azər Həsrət “Bakı-Xəbər”ə açıqlamasında bildirdi ki, XİN çox doğru qərar qəbul edib: “Hətta mən buna bir qədər sevindim. Bilirsiniz ki, bir qayda olaraq, xarici KİV-lər indiyə kimi bizdən icazə almadan həmin ərazilərə gedib, reportajlar hazırlayırdılar. Bu dəfə isə onlar Azərbaycan dövlətinin suveren hüquqlarına hörmətlə yanaşıblar. Çünki biz dəfələrlə bəyan etmişik ki, istənilən media qurumunun təmsilçisinin işğal altındakı ərazilərimizə getməsinə etiraz etmirik. Rəsmi səviyyədə bəyan olunub ki, belə razılığın verilməsində heç bir problem yoxdur. Bunun üçün həmin qurumlar, sadəcə, Azərbaycanın ərazi bütövlüyünə hörmətini bildirməlidirlər. Bunun üçün də yalnız rəsmi icazənin alınması tələb edilirdi. İndiki halda bizim istədiyimiz hadisə baş verib. Onlar çox mədəni şəkildə müraciət edib, ora getməyə izn istəyiblər. Azərbaycan dövləti də mətbuat azadlığına sədaqətini nümayiş etdirərək həmin media qurumlarının təmsilçilərinə icazə verib. XİN bu addımın niyə atılması ilə bağlı dolğun əsaslandırma ortaya qoyub. Əlavə olaraq qeyd edim ki, bu həm də bizim beynəlxalq imicimizə də müsbət təsir etmiş olacaq. Bilirsiniz ki, Azərbaycana qarşı daim qərəzli yanaşan bəzi dairələr bizim hakimiyyəti guya mətbuat, söz azadlığını boğmaqda ittiham edirlər. Xüsusilə də xarici media qurumlarına münasibətimizi bəyənmirlər. Bu həmin dairələrə çox gözəl bir cavabdır. Başa düşsünlər ki, Azərbaycan dövlətinin ərazi bütövlüyünü şübhə altına almayan, bizim qanunlarımıza sayğı ilə yanaşan istənilən jurnalist, hansı ərazimizdə istəyərsə, öz peşə borcunu yerinə yetirə bilər. Hətta işğal altındakı ərazilərdə belə. Mən XİN-in bu addımını təqdir edir, düzgün hesab edirəm. Tənqid edənləri isə anlamağa çətinlik çəkirəm. Biz bəyan etdiyimiz prinsiplərimizdən kənar hər hansı bir addım atmamışıq. İcazəsiz getməyin nəyi yaxşı olardı? Ancaq məlumdur ki, ermənilər həmin jurnalistlərin qondarma qurumun nəzarətdə saxladığı ərazilərdə sərbəst hərəkətinə imkan vermirlər. Yəqin ki, bizim XİN-in cavab məktubunda göstərdiyi bu mühüm tövsiyələr həmin jurnalistlərin diqqətini çəkəcək”.
Məhəmmədəli QƏRİBLİ
