Vüqar Qədirov: “Həmin faktlar əsasında isə məhkəmə araşdırmaları aparılaraq, dəymiş zərərin Ermənistan tərəfindən ödənilməsinə dair qərar çıxarıla bilər”
Bakıda keçirilən Avropa İttifaqı-Azərbaycan Parlament Əməkdaşlıq Komitəsinin 15-ci iclasında xarici işlər nazirinin müavini Mahmud Məmməd-Quliyev bildirib ki, Avropa İttifaqı ilə əməkdaşlıq Azərbaycan üçün prioritet məsələlərdən biridir. M.Məmməd-Quliyev deyib ki, hazırda qarşılıqlı faydalı əməkdaşlıq hər bir tərəfin marağındadır.
Nazir müavininin sözlərinə görə, saziş 3 əsas istiqaməti – siyasi təhlükəsizlik, ticarət və investisiya və müxtəlif sektoral məsələləri əhatə edir: “Azərbaycan üçün öhdəliklərə əməl olunması çox vacibdir. Aİ-nin Azərbaycanın ərazi bütövlüyünü dəstəkləməsi faktı tərəflər arasında əməkdaşlığın inkişafına təkan verir”.
Onun sözlərinə görə, 2020-ci ilə - Brüssel sammitinə qədər Avropa İttifaqı və Azərbaycan arasında razılaşma əldə edilə bilər: “Azərbaycanın işğal altında qalan torpaqları ilə bağlı məsələ həll olunmalıdır. İşğal altındakı ərazilərdən təbii sərvətlər, mal və xidmətlər Avropa İttifaqı ölkələrinin bazarlarına çıxarılır. Avropa İttifaqı beynəlxalq öhdəliklərə əsasən müvafiq qaydaların pozulmasına yol verməməlidir. Fərdi və hüquqi şəxslər tərəfindən Azərbaycanın ərazi bütövlüyünün pozulmasına şərait yaradılmamalıdır. Avropa İttifaqından olan şirkətlər, onların filialları və törəmə şirkətləri Dağlıq Qarabağ və ətraf ərazilərdə fəaliyyət göstərirlər. Onlar Azərbaycan qanunvericiliyini pozmuş sayılırlar. Mənşə ölkə kimi həmin mallarda Ermənistan göstərilir. Halbuki, mineral sərvətlərdən və təbii ehtiyatlardan danışırıqsa, Ermənistan bu sərvətləri istismar edərək Avropa İttifaqına satır. Təklif edirik ki, işçi qrup yaradılsın və bu məsələlər hüquqi müstəvidə həllini tapsın".
Göründüyü kimi, Azərbaycan rəsmisi olduqca vacib olan bir məsələni qaldırıb. İşğal altında olan torpaqlarda sərvətlərimizin Ermənistan vasitəsilə Avropa bazarına çıxarılması, hətta bu işdə bəzi Avropa təşkilatlarının iştirakının olduğuna dair faktlara hüquqi qiymətin verilməsi üçün işçi qrupunun yaradılmasını təklif edir. Azərbaycanın təklifi reallaşa bilərmi və bu mümkün olsa, Ermənistanı hansı cəzalar gözləyə bilər?
Ancaq aydındır ki, təbii sərvətlərimizin Avropaya qanunsuz daşınmasına son qoyulmasa, Azərbaycan-Avropa Birliyi sazişinin imzalanması uzana bilər.
Qaçqın və Məcburi Köçkün Gəncləri İctimai Birliyinin sədri Vüqar Qədirov qəzetimizə açıqlamasında bildirdi ki, Dağlıq Qarabağ problemi uzandıqca, iqtisadi cəhətdən böhran yaşayan Ermənistan Dağlıq Qarabağın və ona bitişik rayonların təbii sərvətlərini daha qəddarlıqla istismar edir: “Xarici şirkətlərin Qarabağda törəmə filiallarını yaradan Ermənistan hökuməti bu törəmə müəssisələrin rəhbərliyinə erməni millətindən olan rəhbərlər gətirərək, böyük hiyləgərliklə Qarabağa xarici investisiyalar cəlb edir. Bunun da nəticəsində Qarabağın təbii sərvətləri qanunsuz yollarla xarici ölkələrdə satışa çıxarılır. Əldə edilən gəlir Ermənistanın inkişafına sərf olunur, bir qismi isə Qarabağda yaşayan ermənilərin maddi vəziyyətlərinin yaxşılaşdırılmasına yönəldilir.
Ermənistan Qarabağın təbii sərvətlərini daşımaq üçün 2012-ci ildə Xocalı hava limanını yenidən tikərək böyük təyyarələrin enməsi üçün istifadəyə yararlı hala gətirdi. Bildiyiniz kimi, Azərbaycan Respublikası Nazirlər Kabinetinin Azərbaycan Respublikası ərazilərinin Ermənistan silahlı qüvvələrinin işğalı nəticəsində itki və tələfatların qiymətləndirilməsi üzrə İşçi Qrupu fəaliyyət göstərir. Həmin qrup tərəfindən Azərbaycana dəyən ziyan dəqiq öyrənilir. Azərbaycan həm diplomatik, həm də hüquqi sahədə erməni vəhşiliyinin qarşısını almaq üçün əlindən gələni edir. İşçi qrupun müəyyən etdiyi faktlar üzrə Azərbaycanın hüquq-mühafizə orqanları tərəfindən hüquqi araşdırmalar aparılıb, cinayət işləri qaldırılıb. Bu yaxınlarda Hərbi Prokurorluqdan bildirildi ki, belə hadisələrə rəyin verilməsi Azərbaycan ərazilərinin Ermənistan silahlı qüvvələri tərəfindən işğalı nəticəsində itki və tələfatların qiymətləndirilməsi üzrə İşçi Qrupa həvalə edilib. İlkin hesablamalara görə, dəymiş maddi ziyan 818 milyard 880 milyon ABŞ dolları təşkil edir. Hazırda qeyd edilən cinayətlərin təşkili və törədilməsində iştirak etmiş digər şəxslərin müəyyən edilib qanunvericiliyə əsasən cinayət məsuliyyətinə cəlb edilməsi istiqamətində iş davam etdirilir. Ancaq bu işlərin beynəlxalq səviyyədə aparılmasına da zəruri ehtiyac duyulur. Bu baxımdan da hörmətli Məmməd-Quliyev doğru tələb irəli sürüb. Avropa İttifaqı ilə münasibətlərdə bu amil mütləq mənada nəzərə alınmalıdır. Çünki bizim əlaqədar qurumların əlində ciddi faktlar var ki, ərazilərimizn talan edilməsində Avropada qeydiyyatdan keçən şirkətlər də yaxından iştirak edirlər. Ən əsası isə həmin məhsullar və ya xammal müxtəlif adlar altında daha çox Avropa qitəsinə daşınır. Beynəlxalq səviyyədə belə bir işçi qrupunun yaradılması mümkündür. Çünki bütün konvensiyaların tələbləri bunu mümkün edir. Digər tərəfdən isə Aİ bizimlə əməkdaşlığı paritet əsasda qurmağa çalışırsa, buna mane olmamalıdır. İşçi qrup yaradılsa, onlara iddialarımızı sübut edəcək kifayət qədər dəlil və sübutlar verə bilərik. Həmin faktlar əsasında isə məhkəmə araşdırmaları aparılaraq, dəymiş zərərin Ermənistan tərəfindən ödənilməsinə dair qərar çıxarıla bilər”.
Məhəmmədəli QƏRİBLİ
