Məhəmməd Əsədullazadə: “Biz istərdik ki, Avropanın bu məsələdə ölkəmizə dəstəyi əməldə olsun və işğalçı ölkəyə sanksiyalar tətbiq etsin”
“Azərbaycandakı stabillik Avropa İttifaqı üçün böyük əhəmiyyət kəsb edir”. Məlum olduğu kimi, bunu Bakıda keçirilən Avropa İttifaqı-Azərbaycan Parlament Əməkdaşlıq Komitəsinin 15-ci iclasında Avropa İttifaqı-Azərbaycan Parlament Əməkdaşlıq Komitəsinin həmsədri, Avropa Mühafizəkarlar və İslahatçılar Qrupunun üzvü, Böyük Britaniyadan olan deputat Sayyad Kərim bildirib. Onun sözlərinə görə, Avropa İttifaqı və Azərbaycan arasında ortaq çağırışlar var.
S.Kərim deyib ki, 2016-cı ilin noyabrında Azərbaycanla Avropa İttifaqı arasında danışıqlara başlamaq üçün mandat verilib və bu danışıqlar 2017-ci ilin fevralında başlayıb: “Azərbaycanın ticarətinin yarısı Avropa İttifaqı ölkələrinin payına düşür. Avropa İttifaqı ölkələrinin neftə tələbatının 5 faizini Azərbaycan təmin edir. “Cənubi Qafqaz Qaz Dəhlizi” layihəsinə Avropa İttifaqı böyük önəm verir. Bizi həm də Azərbaycanın böyük nəqliyyat qovşağına çevrilməsi maraqlandırır. Bu baxımdan Bakı-Tiflis-Qars dəmir yolu önəmlidir”.
Avropa İttifaqı-Azərbaycan Parlament Əməkdaşlıq Komitəsinin həmsədri bildirib ki, Azərbaycandakı stabillik Avropa İttifaqı üçün böyük əhəmiyyət kəsb edir: "Prezident İlham Əliyevin fəaliyyəti dövründə fundamental demokratiya məsələlərini müzakirə edəcəyik. Prezidentlə görüşdük və çox gözəl müzakirələrimiz oldu. Biz təhlükəsizlik məsələlərinə də nəzər salmalıyıq. Söhbət Dağlıq Qarabağ münaqişəsindən gedir”.
Azərbaycanın Avropa üçün əhəmiyyəti ged-gedə artır. Nəzərə almaq lazımdır ki, 24 il əvvəl Azərbaycan “Əsrin kontraktı” sazişini imzalamaqla çox cəsarətli addım atdı. O zaman çox çətin bir dövrdə bu Azərbaycan üçün böyük hadisə idi. Ondan sonra görülən işlər göz qabağındadır. Bütün bu deyilənlərlə yanaşı, Azərbaycandakı stabillik Avropa İttifaqı üçün niyə böyük əhəmiyyət kəsb edir?
Sözügedən məsələni “Bakı-Xəbər”-ə şərh edən politoloq Məhəmməd Əsədullazadənin sözlərinə görə, enerji və nəqliyyat layihələrinin reallaşması üçün təhlükəsizlik mühüm faktordur: “Böyük Britaniyadan olan deputat Sayyad Kərimin Azərbaycandakı sabitliyə xüsusi önəm verməsi həqiqətən ölkədə siyasi sabitliyin olmasına dəlalət edir. Nəzərə almaq lazımdır ki, təhlükəsizlik siyasəti fonunda bu gün ölkəmiz Avropanın sabit tərəfdaşıdır. Məhz bu sabitlik qoca qitəni ölkəmizlə enerji və iqtisadi sahədə əməkdaşlıq etməyə sövq edib. Biz digər ölkələrə baxsaq görərik ki, situasiya fərqlidir. Ermənistan, Rusiya və Şərqi Avropa bu gün qitənin təhlükəsizliyi üçün əsas maneədir. Ona görə də daxili siyasi sabitliyimiz ölkəmizin gələcək perspektivdə yürüdəcəyi xarici siyasətdə əsas faktordur. Bu gün Avropa əməkdaşlıq etdiyi ölkələrdə əsasən daxili təhlükəsizliyə önəm verir. Ölkəmizin balanslı siyasi kursu, icra edilən geosiyasi nəqliyyat və enerji layihələri Avropanın bizimlə əməkdaşlıq etməsini zəruri edib. Biz fikir versək görərik ki, qonşu və işğalçı ölkə olan Ermənistan Avropa İttifaqı ilə assosiativ saziş bağlasa da, ittifaqla nə siyasi, nə də iqtisadi əlaqələri inkişaf etdirə bilir. Çünki bu ölkə Rusiyanın forpostudur, orada siyasi təhlükəsizlik zəifdir. Qafqazda Avropa üçün dinamik iqtisadi layihələri həyata keçirən ölkəmiz bu gün təəssüf ki, İttifaqdan Qarabağla bağlı qəti dəstək almır. Daha doğrusu, Aİ bu yöndə konkret mövqe sərgiləmir. Biz istərdik ki, Avropanın bu məsələdə ölkəmizə dəstəyi əməldə olsun və işğalçı ölkəyə sanksiyalar tətbiq etsin. Hesab edirəm ki, Aİ bundan sonra Azərbaycana daha da önəm verəcək. Çünki TANAP layihəsi Avropanın enerji təhlükəsizliyində böyük əhəmiyyət kəsb edir və iqtisadi rifah bu gün qoca qitə üçün əsas prioritetdir”.
Vidadi ORDAHALLI
