Azər Həsrət: “Bu vəziyyətdə Azərbaycan təmkinli davranmalıdır”
"Komsomolskaya pravda" radiostansiyasının efirində tanınmış rusiyalı jurnalist və teleaparıcı, "Rosneft" şirkətinin vitse-prezidenti və mətbuat katibi Mixail Leontyev bildirib ki, Ermənistan tarixi, siyasi, fiziki və maddi cəhətdən Rusiya üçün yükdür:
“Bu yük əvvəldən var. Əgər onlar ayrılmaq istəyirlərsə, onda gəlin hər şeyə son qoyaq. Onlar hazırda son bəyanatına kimi, hansı ki, digər bəyanatlarının əksidir, siyasi karyerasını ayrılmaq məsələsi üzərində quran adam üçün mitinq keçirirlər. Bu onun siyasi nümayişlərinin əsas mənası idi. Əgər onlar ayrılmaq istəyirlərsə, onda buyursunlar və qardaş Azərbaycan xalqı ilə münasibətlərimizi korlamağa son qoysunlar”.
Onun sözlərinə görə, Rusiya özü Ermənistanı satmayacaq: “Biz özümüz bunu heç vaxt etməyəcəyik. Çünki biz satqın deyilik. Siz bizdən başqa heç kimə lazım deyilsiniz. Bizim dəstəyimiz və mövcudluğumuz hesabına mövcud olan millətin bizi satqınlıqla şantaj etməyə hüququ yoxdur. Əgər kimsə balaca ağzını açıb belə bir şey söyləyəcəksə, onda o, bu faktı başa düşməlidir ki, onların belə haqqı yoxdur. Biz olmasaydıq, fiziki cəhətdən nə bir erməni olardı, nə də Ermənistan. Təbiətdə erməni olmazdı, ola bilməzdi”.
Tanınmış rusiyalı jurnalistin səsləndirdiyi bu fikirlər Ermənistanı bərk qıcıqlandırıb. Erməni mətbuatı və diaspor təşkilatı jurnalistin səsləndirdiyi doğru fikirlərə görə onu şantaj edir, barəsində “qara piar” kampaniyası aparırlar. Hətta Ümumrusiya Erməni Konqresi məsələ ilə bağlı reaksiya verib, xüsusi bəyanat qəbul edib. Leontyevin fikirləri erməniləri niyə bu qədər qəzəbləndirib və ona qarşı təşkil olunan hücum kampaniyası ilə bağlı Azərbaycan hansı addımları atmalıdır?
Media eksperti Azər Həsrət qəzetimizə açıqlamasında bildirdi ki, Rusiyadan belə cəsarətli fikirləri eşitmək çox xoşdur: “Əslində, bütün ziyalılar doğrunu söyləməyə borcludur. Nə yazıq ki, Rusiyada hamı bunu edə bilmir. Mixail Leontyevin səsləndirdiyi fikirlər həm də Ermənistana verilən ciddi bir mesaj idi. Yəni həmin sözlərin səslənməsi sırf Azərbaycanın maraqlarının güdülməsi baxımından olmayıb. Yaranmış situasiya Rusiyadan Ermənistana bir barmaq silkələnməsini tələb edir. Əslində, jurnalistin səsləndirdiyi fikirlərin mahiyyəti bizi dərindən təəccübləndirmədi. Biz erməniləri yaxşı tanıdığımız üçün, deyilənlərin mütləq həqiqət olduğunu bilirik. Onları ruslar da yaxşı tanıyır və əsl mahiyyətlərini açıb ortaya qoyurlar. Bilirlər ki, dar məqamda ermənilər onları çox ucuz qiymətə satacaqlar. Jurnalist böyük auditoriyaya xitabən ermənilərin Rusiyanın vassalı olduqlarını, satqınlığa meylliliklərini dilə gətirdi. Ən əsası isə Paşinyana diqqəti yönəltdi və dedi ki, o sonradan səsləndirdiyi fikirlərlə Rusiyanı aldada bilməz. Doğru deyir, çünki Paşinyanın indiyə kimi yürütdüyü siyasi xətt Ermənistanı Rusiyadan aralamağa hesablanıb. Ermənilər bu fikirlərin təsadüfən səslənmədiyinin fərqindədirlər. Bilirlər ki, son çıxış Rusiyanın dərin qatlarından çıxan səsdir. Ona görə də səs-küy salırlar. Bu vəziyyətdə Azərbaycan təmkinli davranmalıdır. Leontyevin fikirlərini açıq şəkildə olmasa da, başqa yollarla tirajlamağa nail olmalıyıq. Açıq mətnlə fəallıq göstərsək, onda ermənilərin əlinə ciddi əsas vermiş olacayıq. Onlar deyəcəklər ki, Leontyevi bu cür danışmağa Azərbaycan vadar edib. Şər maşınlarını işə salıb məsələnin mahiyyətini kiçiltməyə çalışacaqlar. Amma bu heç də o demək deyil ki, biz əl-ayağımızı salıb oturmalıyıq”.
Məhəmmədəli QƏRİBLİ
