Fikrət Sadıqov: “Məsələ ondadır ki, Ermənistanla Ukrayna arasında zahirən oxşar cəhətlər olsa da, bunların arasında müəyyən bir fərq var”
Məlum olduğu kimi, Ermənistan parlamentində keçirilmiş səsvermənin nəticələrinə görə, müxalifət lideri Nikol Paşinyan baş nazir seçilə bilmədi. Qeyd edək ki, Paşinyan hökumət rəhbəri postuna yeganə namizəd idi. Lakin Ermənistan parlamentində səs çoxluğuna malik, eks-prezident Serj Sarkisyanın sədrlik etdiyi Respublika Partiyası “məxməri inqilab”ın liderini dəstəkləmədiyinə görə Paşinyan baş nazir seçilmək imkanından məhrum olub. Belə ki, onun xeyrinə 45 deputat səs verib.
Ona görə də Paşinyan və tərəfdarları hakim partiyanın bu qərarına etiraz olaraq yenidən kütləvi aksiyalara başlayıblar. İkinci inqilabi dalğa paytaxt İrəvanda itaətsizlik, yolların bağlanması və tətillərlə müşayiət olunur. Paşinyan etirazçılara müraciət edərək bütün respublika üzrə kütləvi etiraz aksiyalarına başlamağa, o cümlədən, nəqliyyatın hərəkət yollarını, dəmir yolunu və hava limanlarını blokadaya almağa çağırıb.
Qeyd edək ki, Ermənistan qanunvericiliyinə görə, baş nazir seçilmək üçün parlamentdəki 105 deputatdan 53 nəfəri namizədin lehinə səs verməlidir. Ermənistan Konstitusiyasına görə, birinci turda baş nazir seçilə bilməyən N.Paşinyan yalnız ikinci mərhələdə namizədliyini irəli sürə bilər. Yəni birinci səsvermədən sonra təkrar səsvermə keçiriləcək. Həmin mərhələdə də N.Paşinyan zəruri olan səsi toplaya bilməsə, o halda, prezident parlamentin buraxılması və növbədənkənar seçkilərin keçirilməsi barədə qərar imzalayacaq.
Bəzi ehtimallara görə, mayın 8-də keçiriləcək səsvermədə siyasi böhranın Konstitusiyaya uyğun həlli variantı kimi N.Paşinyanın namizədliyinə səs verilməsinə Respublika Partiyası razılıq verə bilər. Ancaq Rusiya amilini əsas gətirib bunun baş tutmayacağını iddia edənlər də var. Belə olan halda, növbəti parlament seçkilərinin keçirilməsi ehtimalı böyükdür. İstənilən halda, görünən odur ki, Ermənistanda “məxməri inqilab” öz məqsədinə çatdı. Yəni Sarkisyan hakimiyyəti sarsıldı və o, baş nazir ola bilmədi.
Maraq doğuran məqamlardan biri də “məxməri inqilab” dalğasında hakimiyyətə gələnlərin Ermənistanın MDB-də təmsil olunmasına necə baxacaqlarıdır. Çünki Gürcüstanda məlum inqilab nəticəsində ölkə MDB-dən çıxdı. Artıq Ukrayna da analoji qərar verib. Maraqlıdır, Ermənistan da MDB-dən çıxmaqla bağlı qərar verə bilərmi?
Məsələyə münasibət bildirən keçmiş diplomat, politoloq Fikrət Sadıqov Ermənistanın MDB-dən çıxma ehtimalını istisna etdi. O bunu bir sıra amillərlə əlaqələndirdi: “Məsələ ondadır ki, Ermənistanla Ukrayna arasında zahirən oxşar cəhətlər olsa da, bunların arasında müəyyən bir fərq var. Ermənistandan fərqli olaraq, Ukraynada birmənalı şəkildə Qərbyönümlü inqilab baş verib. Ermənistanda isə “məxməri inqilab” müşahidə olunsa da, bunların Rusiyaya bağlılığı o qədər möhkəmdir ki, düşünmürəm onlar belə bir addım atsınlar. Bir neçə il bundan əvvəl Paşinyan bəyan etmişdi ki, Rusiyanın əsas rol oynadığl bütün təşkilatlardan Ermənistan çıxmalıdır. Ancaq zaman keçdikdən və Ermənistanda məlum hadisələr baş verəndən sonra o tamam fərqli açıqlama ilə çıxış etdi. Bildirdi ki, Ermənistan təmsil olunduğu bütün təşkilatlarda qalmalıdır. Sadəcə olaraq, Ermənistan öz mövqeyini daha qabarıq şəkildə həmin təşkilatlarda ortaya qoymalıdır. Yəni onun mövqeyində əvvəlkindən fərqli kurs ortaya qoyması hiss olunur. Artıq Paşinyan başa düşür ki, onun taleyi Rusiyadan asılıdır. Həm iqtisadi, həm də hərbi nöqteyi-nəzərdən Ermənistanda Rusiyanın təsiri böyükdür. Nəzərə almaq lazımdır ki, bu ölkədə Rusiyanın 2 hərbi bazası yerləşir. Ona görə də Ermənistanın belə bir addım atması real görünmür. Nəzərə almaq lazımdır ki, Ermənistanın birbaşa açıq dənizə çıxışı yoxdur, Avropa ölkələri ilə həmsərhəd deyil. Ermənistan o zaman belə addım atar ki, Rusiya əsaslı şəkildə zəifləsin, bölgədə nüfuzunu və təsir imkanlarını ümumiyyətlə itirsin. Onda onlar buna gedəcəklər”.
Vidadi ORDAHALLI
