Rəsul Cahangirli: “İmtiyazlı ticarət sayəsində tərəflər arasında ticarət dövriyyəsi daha da artacaq”
Müasir dövrdə Azərbaycanın etibarlı strateji tərəfdaşı olan Türkiyə ilə münasibətlərin möhkəmləndirilib daha da genişləndirilməsi dövlətimizin xarici siyasətinin çox mühüm tərkib hissəsidir. Hər iki ölkənin dövlət başçılarının qarşılıqlı səfərləri ikitərəfli siyasi və iqtisadi əməkdaşlığın inkişafında əhəmiyyətli rol oynayır. Reallıq ondan ibarətdir ki, Türkiyə ilə Azərbaycan arasında bütün sahələrdə əlaqələr çox uğurla inkişaf edir. Bu əlaqələr dostluq-qardaşlıq əsasında qurulub.
Məlum olduğu kimi, Prezident İlham Əliyev Türkiyədə səfərdə olub. Azərbaycan-Türkiyə Yüksək Səviyyəli Strateji Əməkdaşlıq Şurasının VII iclası keçirilib. Sözügedən iclasın yekunları üzrə iki ölkə prezidentlərinin iştirakı ilə yekun protokol imzalanıb. Tərəflər, həmçinin, ətraf mühitin mühafizəsi sahəsində, elektron imza, imtiyazlı ticarət, mədəniyyət mərkəzlərinin yaradılması, silahlı qüvvələrin şəxsi heyətinin mübadiləsi sahəsində əməkdaşlıq haqqında sazişlər imzalayıblar.
Görünən odur ki, Türkiyədə imzalanan çoxsaylı sənədlər iki ölkənin münasibətlərinin keyfiyyətcə yeni mərhələyə daxil olmasını ortaya qoyur. O mənada ki, sözügedən sənədlər bir sıra sahələri əhatə edir və hər iki ölkə üçün mühüm əhəmiyyət kəsb edir. Bu baxımdan, iki ölkə rəsmiləri arasında imzalanan sənədlər Türkiyə-Azərbaycan münasibətlərində hansı keyfiyyət göstəriciləri yaradır? Ümumən keyfiyyət baxımından nələri özündə ehtiva edir?
Məsələyə münasibət bildirən ekspert Rəsul Cahangirlinin sözlərinə görə, iki ölkə arasında münasibətlər, iqtisadi əlaqələr keyfiyyətcə yeni mərhələyə daxil olur: “Məsələ ondadır ki, bu dəfə iki ölkə arasında keyfiyyətcə fərqli çox mühüm sazişlər imzalanıb. Belə ki, elektron imza, imtiyazlı ticarət barəsində əldə olunan razılaşma iki ölkənin iqtisadi əlaqələrinə keyfiyyət nöqteyi-nəzərdən yeni impuls verəcək. Bunun sayəsində iqtisadi əlaqələrdə həm prosedurlar azalacaq, həm də vaxta qənaət olunacaq. Belə ki, elektron imza bu baxımdan mühüm əhəmiyyət kəsb edir. Bununla yanaşı, imtiyazlı ticarətlə bağlı razılaşmanın əldə olunması çox mühüm əhəmiyyətə malikdir. Bunun sayəsində iki ölkə arasında ticarət dövriyyəsi daha da artacaq. Nəticədə iki qardaş ölkə arasında iqtisadi əlaqələr daha da genişlənəcək ki, bu da hər iki tərəfin maraqlarına cavab verir. Başqa bir tərəfdən, iki ölkə arasında mədəniyyət mərkəzlərinin yaradılması, silahlı qüvvələrin şəxsi heyətinin mübadiləsi sahəsində razılaşmanın əldə olunması da bu baxımdan özünəməxsus əhəmiyyətə malikdir. Ona görə də imzalanan razılaşmaların əhəmiyyəti böyükdür”.
Vidadi ORDAHALLI
