Namizədlərin sənədlərini MSK-ya təqdimetmə tarixi də bəlli oldu
Dünən Mərkəzi Seçki Komissiyası (MSK) Prezident İlham Əliyevin 2018-ci il aprelin 11-nə növbədənkənar prezident seçkilərinin təyin edilməsi haqqında sərəncamı ilə bağlı iclas keçirib.
“Trend”in məlumatına görə, MSK sədri Məzahir Pənahov iclasda bildirib ki, Azərbaycan Konstitusiyasına əsasən, dövlət başçısı növbədənkənar prezident seçkiləri təyin etmək hüququna malikdir. M.Pənahov qeyd edib ki, Prezident İlham Əliyev bu hüququndan istifadə edərək növbədənkənar prezident seçkiləri təyin edib.
“Növbədənkənar prezident seçkiləri ilə bağlı bütün məsələlərə diqqətlə yanaşmalıyıq”- deyən Məzahir Pənahov bildirib ki, müxtəlif ölkələr imkan tapan kimi digər ölkələrin daxili işinə qarışmağa maraq göstərir. MSK sədri qeyd edib ki, kütləvi informasiya vasitələri də fəal olmalı və hər bir məsələni həm cəmiyyətə, həm də dünya ictimaiyyətinin diqqətinə düzgün çatdırmalıdır: “Biz birlikdə çalışmalıyıq ki, bunun öhdəsindən gələk”.
M.Pənahov bildirib ki, istənilən beynəlxalq təşkilatın nümayəndələri növbədənkənar prezident seçkilərində iştirak edə bilər.
O bildirib ki, MSK beynəlxalq təşkilatlar, hüquq-mühafizə orqanları ilə birgə maarifləndirmə işləri həyata keçirib: "Görülən işlər öz nəticəsini verib və artıq Azərbaycanda polisin seçkilərə müdaxilə etməsi ilə bağlı hallar qeydə alınmır".
İclasda növbədənkənar prezident seçkilərinin hazırlanıb keçirilməsi üzrə əsas hərəkətlərin və tədbirlərin Təqvim Planı təsdiq edilib. Daha sonra iclasda vətəndaşların seçki hüququnu pozan hərəkətlərdən (hərəkətsizlikdən) və qərarlardan şikayətlərin araşdırılması məqsədilə MSK-nın nəzdində Ekspert Qrupu yaradılıb.
İclasda, həmçinin, MSK-nın nəzdində işçi qrupu yaradılaraq rəhbərliyi təyin edilib.
Növbədənkənar prezident seçkilərində namizədlər üçün təşviqat kampaniyasının vaxtı da məlum olub. Bu barədə MSK tərəfindən seçkilərlə bağlı hazırlanan Təqvim Planında qeyd olunub. Təqvim Planına əsasən, seçkiqabağı təşviqatın aparılması səsvermə gününə 23 gün qalmış başlanır və səsvermənin başlanmasına 24 saat qalmış dayandırılır. Beləliklə, martın 19-da başlayacaq təşviqat kampaniyası aprelin 10-u səhər saat 10:00-da bitəcək.
Bundan başqa, Təqvim Planında qeyd olunub ki, növbədənkənar prezident seçkilərində namizədlər sənədlərini fevralın 27-dən etibarən Mərkəzi Seçki Komissiyasına təqdim edə bilərlər. Təqvim Planına əsasən, namizədin qeydə alınması üçün zəruri olan seçki sənədlərinin təqdim edilməsi səsvermə gününə ən çoxu 50 və ən azı 30 gün qalmış saat 18:00-dək (martın 12-si) davam edir.
Qeyd edək ki, fevralın 5-də Prezident İlham Əliyev növbədənkənar Azərbaycan Respublikası Prezidenti seçkilərinin elan edilməsi haqqında sərəncam imzalayıb. Sərəncama əsasən, növbədənkənar prezident seçkiləri 2018-ci il aprelin 11-nə təyin olunub.
Xəbər xidməti
