Fikrət Yusifov: “Qeyri-neft sektoru daha sürətli inkişaf dövrünə qədəm qoyub”
İsveçrədə keçirilən Davos İqtisadi Forumu çərçivəsində dünya ölkələrinin iqtisadi inklüzivliyə görə reytinqi açıqlanıb. Reytinq inkişaf etmiş və etməkdə olan ölkələr üçün ayrıca tərtib olunub. İnkişaf etmiş ölkələr arasında Norveç 6,08 bal toplayaraq 1-ci yeri tutub. Növbəti yerlərdə 6,07 balla İslandiya və Lüksemburq, 4-cü yerdə 6,05 balla İsveçrə, 5-ci yerdə 5,81 balla Danimarka, 6-cı yerdə 5,76 balla İsveç, 7-ci yerdə 5,61 balla Niderland, 8-ci yerdə 5,44 balla İrlandiya, 9-cu yerdə 5,36 balla Avstraliya, 10-cu yerdə isə 5,35 balla Avstriya qərarlaşıb.
İnkişaf etməkdə olan ölkələr arasında isə Litva 4,86 bal toplayaraq 1-ci yerə sahib olub. 2-ci yerdə 4,74 balla Macarıstan, 3-cü yerdə 4,69 balla Azərbaycan, 4-cü yerdə 4,67 balla Latviya, 5-ci yerdə 4,61 balla Polşa, 6-cı yerdə 4,54 balla Panama, 7-ci yerdə 4,48 balla Xorvatiya, 8-ci yerdə 4,46 balla Uruqvay, 9-cu yerdə 4,44 balla Çili, 10-cu yerdə isə 4,43 balla Rumıniya qərarlaşıb.
İnkişaf etməkdə olan ölkələr arasında iqtisadiyyatın inklüzivliyinə görə Azərbaycanın üçüncü yerdə qərarlaşması ölkənin iqtisadi inkişafından xəbər verir.
“Ekonomiks” Beynəlxalq İqtisadi Araşdırmalar Birliyinin sədri Fikrət Yusifov “Bakı-Xəbər”ə açıqlamasında qeyd etdi ki, son 2 ildə iqtisadiyyatın qeyri-neft sektoruna transformasiya olunması istiqamətində hökumətin apardığı qətiyyətli addımlar sayəsində ölkə iqtisadiyyatı inkişaf edir: “Bəllidir ki, 2016-cı ildə baş verən iqtisadi gerilik 2017-ci ildə praktiki olaraq aradan qaldırıldı. Demək olar ki, ölkənin qeyri-neft sektorunda müsbət nəticələr əldə olundu. Qeyri-neft sektoru daha sürətli inkişaf dövrünə qədəm qoyub”.
Həmsöhbətimizin sözlərinə görə, inkişaf etməkdə olan ölkələr arasında iqtisadiyyatın inklüzivliyinə görə Azərbaycanın üçüncü yerdə qərarlaşması ölkəmizdə aparılan islahatlara verilən qiymətdir. Beynəlxalq maliyyə institutları, valyuta fondları, Avropa İnkişaf Bankı Azərbaycanda gedən iqtisadi prosesləri yaxından izləyirlər. Baş verən proseslərdən xəbərdar olduqları üçün bunu dəyərləndirə bilirlər: “Hesab edirəm ki, bu, hökumətin islahatlar istiqamətində atdığı ciddi addımlara və bu illər ərzində əldə olunan nəticələrə verilən qiymətdir”.
Günel CƏLİLOVA
