Yeganə Hacıyeva: “Xüsusilə də belə hadisələrin ABŞ-ın fəallığı fonunda yaşanması onu deməyə əsas verir ki, bununla Rusiyanın rolunun əhəmiyyətliliyini qabartmağa çalışırlar”
“Müəyyən spekulyasiyalar var və mən bunlarla bağlı şərh verməyəcəyəm. ABŞ əvvəl də fəal həmsədr olub, indi də fəaldır, gələcəkdə də fəal olacaq”. Bunu ABŞ-ın Azərbaycandakı səfiri Robert Sekuta ABŞ-ın Minsk Qrupunda həmsədrlikdən çəkiləcəyi, bununla da Minsk Qrupu formatının dəyişə biləcəyi barədə məlumatları şərh edərkən deyib. Səfir bildirib ki, ABŞ yeni həmsədr təyin edib və yeni həmsədr münaqişənin həllinə yeni baxışla yanaşacaq.
“Biz fəal olmaqda davam edəcəyik. Bizim həmsədr danışıqların iştirakçısıdır. Bu məsələləri diqqətdə saxlayırıq. Həmsədr olaraq fəallığımızı davam etdirəcəyik”, - deyə səfir qeyd edib.
Qeyd edək ki, ABŞ-dan olan Minsk Qrupunun həmsədri də yayılan məlumatı təkzib edən bəyanatla çıxış edib. Bəlli olur ki, bu cür şayiələrin yayılması spekulyativ xarakter daşıyır və həqiqətə uyğun deyil. Onda belə əsassız məlumatlar hansı məqsədlə dövriyəyə buraxılıb?
Politoloq Yeganə Hacıyeva qəzetimizə açıqlamasında bildirdi ki, bu baş verən ilk belə hal deyil: “Səhv etmirəmsə 2009-cu ildə də belə hadisə baş vermişdi. ATƏT-in Minsk Qrupu həmsədrlərinin yeni format əsasında formalaşması ilə bağlı yalanı da həmin vaxt Ermənistan mediası tirajladı. O vaxt hətta ATƏT-in İrəvan ofisi bu barədə açıqlama vermək məcburiyyətində qalmışdı. ATƏT-in bu formatı formalaşdırması sadə əmələ gəlmir. Qurum öz daxilində olan konfliktlərin həlli üçün vasitəçilik formatını ora seçilən üzvlərin təsir imkanlarına əsasən təşkil edir. Belə spekulyativ şayiələr yayıldığı zaman fazalarına xüsusilə diqqət etmək lazımdır. Konfliktin sülh yolu ilə həllinə dair səylər intensivləşəndə belə halların baş verməsi təsadüfi deyil. Xüsusilə də belə hadisələrin ABŞ-ın fəallığı fonunda yaşanması onu deməyə əsas verir ki, bununla Rusiyanın rolunun əhəmiyyətliliyini qabartmağa çalışırlar. Hesab etmirəm ki, bunun dövriyəyə buraxılmasında məhz Rusiya maraqlıdır. Planın arxasında daha çox Ermənistanın məkrli niyyətləri sezilir. Ermənilər bununla demək istəyirlər ki, ABŞ-ın prosesdə iştirakı formaldır, əsas söz sahibi Rusiyadır. Digər bir səbəb isə ABŞ-ın beynəlxalq qurumlara ayırdığı maliyyəni azaltmasından doğa bilər. Maliyyəsi azaldılan təsisatlar içərisində ATƏT-in adı birbaşa olmasa da, qurum bunu gözləyir. Tramp administrasiyası vəsaitin üzv ölkələr arasında bərabərlik əsasında ödənilməsini istəyir. Özü də bunun bütün qurumlara tətbiqini anons edib. Ola bilər ki, ATƏT-in bundan doğan narazılığı da olsun. Üçüncu bir məqam isə ATƏT-in fəaliyyət mexanizmlərini şübhə altına yönəltmək cəhdi ilə bağlıdır. Burada da erməni barmağı görünür. Çünki Ermənistan atəşkəsə nəzarət edən yeni bir missiyanın yaradılmasını istəyir”.
Məhəmmədəli QƏRİBLİ
