Son günlərdə Ermənistanda hakimiyyət daxilində yeni savaş “yellərinin əsməsi” özünü daha qabarıq formada büruzə verməyə başlayıb. Bunun əsas səbəbi gələn ilin aprelində kimin baş nazir qismində ölkəyə rəhbərlik edəcəyidir. İndiyə qədər belə fikirlər səslənirdi ik, əslində, Serj Sarkisyan baş nazir Karen Karapetyanla hakimiyyət bölgüsündə razılaşıb.
Bölgüyə görə, Sarkisyan baş nazir, Karapetyan isə baş nazirin birinci müavini olacaq. “Jamanak” qəzeti də yazırlı ki, Sarkisyan 2018-ci ildə baş nazir, Karen Karapetyan isə baş nazirin müavini olacaq: “Sarkisyan Cenevrə görüşündən qayıdandan sonra Karapetyanı inandırmağı bacardı ki, özü baş nazir, Karen isə baş nazirin müavini olsun. Sarkisyan Karapetyana bildirib ki, Dağlıq Qarabağ münaqişəsi ilə bağlı qərar qəbul etmək baş nazirin səlahiyyətlərinə daxil olacaq, baş nazirin müavini olacaq Karapetyan üçün isə heç nə dəyişməyəcək. Ona hökumətin iclasını keçirmək, kadr islahatları aparmaq və hökumət binasına rəhbərlik etmək səlahiyyəti veriləcək”. Amma son məlumatlar vəziyyətin tamam dəyişdiyini, Karapetyanın Sarksiyanı hakimiyyətdən uzaqlaşdırmaq niyyətində olduğunu üzə çıxarır. Erməni mediası bildirir ki, hazırda indiki baş nazir və prezident gələcəkdə də birinci olmaq imkanları əldə etmək üçün özlərinə güclü komanda yığmaqla məşğuldurlar. Sarkisyan bu məsələdə özünün nəzarəti altında olduğu Respublika Partiyasının imkanlarından istifadə etməyə cəhd edir. Partiyadakı nüfuzlu şəxsləri öz tərəfinə çəkmək və ölkədə iqtisadi inkişaf görüntüsü yaratmaq məqsədilə Sarkisyan onlarla, həmçinin milyarder Haqik Çarukyanın rəhbərlik etdiyi qüvvələrlə danışıqlar aparır. Amma Haqik Çarukyanın rəhbəri olduğu “Çarukyan” bloku 2018-ci il üçün dövlət büdcəsi layihəsinin müzakirəsi zamanı Respublika Partiyasını və hökuməti kəskin tənqid edib. Bununla Haqik Çarukyan Sarksiyana qarşı mövqe tutub və belə vəziyyət Karapetyana sərf edir. Öz növbəsində, Respublika Partiyasının üzvləri arasında hələlik kifayət qədər dayaqları olmayan Karapetyan qardaşı Samvelin maliyyə yardımı ilə Sarkisyan komandasının bəzi üzvlərini pulla ələ almağa başlayıb.
Rusiyada yaşayan erməni milyarder Samvel Karapetyan bu xüsusda indiki baş naziər hərtərəfli yardım edir. Bu isə Karapetyan və Sarkisyan arasında yeni narazılıqlara gətirib çıxarıb. Hesab edilir ki, belə davam edəcəyi təqdirdə, yaxın vaxtlarda Karapetyan və Sarkisyan arasında qarşıdurma açıq düşmənçiliyə səbəb olaraq hakimiyyətın iki qolu arasındak münasibətlərin daha da gərginləşməsinə gətirib çıxaracaq. Amma buna rəğmən, artıq Karen Karapetyan gələn ilin aprelindən sonra da tutduğu postu saxlamaqda israrlı görünür. Bunu onun parlamentin son iclasında səsləndirdiyi fikirlər bir daha sübut edir. Belə ki, Karapetyan parlamentin hökumət saatı iclasındakı çıxışında deputatların sullarını cavablandırıb. “Yelk” adlı müxalifət parlament fraksiyasının sədri Nikol Paşinyan ondan 2018-ci ildə baş nazirliyə namizəd olub-olmayacağını soruşub: “Ermənistan Respublika Partiyasının mətbuat katibi Eduard Şarmazanov bildirib ki, təmsil etdiyi siyasi təşkilatdan fəaliyyətdə olan prezident Serj Sarkisyanın namizədliyi irəli sürüləcək. Siz öz namizədliyinizi irəli sürməyə hazırsınızmı, yoxsa baş nazirin müavini olmaqla barışacaqsınız?”. Karapetyan isə suala cavab olaraq deyib: “Namizədliyimi irəli sürüb-sürməyəcəyimlə bağlı haqqım icazə verin özümdə qalsın. Sizi əmin edirəm ki, bu məsələ ilə bağlı hər kəs öz fikrini söyləyəcək”. Bundan başqa, Karapetyanın Rusiyadan da lazımi dəstək almasına dair məlumatlar var. Bunun əsas səbəbi Karapetyanın vasitəsilə Rusiyanın Ermənistan iqtisadiyyatı üzərində nəzarəti gücləndirməsidir. Elə bu günlərdə Karapetyanın sayəsində Ermənistan “Qazprom Armeniya”nın sonuncu 20 faiz səhmlərini Rusiyaya 300 milyon dollara satıb. Bununla bağlı narazılıqlara isə Karapetyan belə cavab verir: “Qazprom” Ermənistana bir milyard dollar sərmayə qoyub. İran-Ermənistan təbii qaz kəmərinin tikintisinə, ölkənin qazlaşdırılmasına “Qazprom”un böyük sərmayə qoyduğunu unutmayın”. Yeri gəlmişkən qeyd edək ki, Ermənistan Rusiyadan təbii qazın min kubmetrini 150 dollara alıb əhaliyə üç dəfə baha satır. “Qazprom-Armeniya” isə Karen Karapetyana məxsusdur.
Onu da xatırladaq ki, ötən ilin sentyabr ayında Serj Sarkisyan Rusiya ilə münasibətlərdə yaranan ikir ayrılığına görə Karapetyanı Moskvadan dəvət etməyə məcbur oldu. Amma indi Karapetyan Sarksiyanın hakimiyyət başında qalmasına maneə olaraq qiymətləndirilir. Moskva da, öz növbəsində, Karapetyana dəstəyini davam etdirir. Bundan əvvəl Karapetyan bəyan edib ki, konstitusiyanın tələbləri ona 2018-ci ildə baş nazir postunda fəaliyyətini davam etdirmək imkanı verəcək. Ekspertlərə görə, Sarksiynın buna qarşı gedişləri onunla baş nazir arasında qarşıdurmanı dərinləşdirir, hakimiyyətdaxili savaşı genişləndirir. Bu da onu deməyə əsas verir ki, hazırda Ermənistanda baş verən sistemli böhran hakimiyyətdaxili münasibətlərə də təsir göstərir.
Nahid SALAYEV
