Sədaqət Vəliyeva: “Sərgidə iştirak edəcək ölkələrin, şirkətlərin nümayəndələri bir daha Azərbaycan reallıqları haqqında dolğun və əyani məlumat alacaq”
Məlum olduğu kimi, Parisdə Beynəlxalq Sərgilər Bürosunun (BIE) 162-ci Baş Assambleyasında "EXPO-2025" sərgisinə evsahibliyi etmək üçün namizədliyi irəli sürülən şəhərlərin təqdimatı keçirilib. Azərbaycan "EXPO-2025" sərgisinə bəşəriyyət üçün böyük əhəmiyyət kəsb edən "İnsan kapitalının inkişafı: daha yaxşı gələcəyin qurulması" layihəsini təqdim edib.
Tədbirdə iştirak edən Azərbaycanın Birinci vitse-prezidenti Mehriban Əliyeva qeyd edib ki, dünya sərgisi bütün mədəniyyətlərə bərabərlik və hörmət prinsipinə əsaslanan müxtəlifliyi sərgiləmək üçün bir platformadır. Bu sərgilər qlobal müzakirələr və əməkdaşlıq üçün bütün beynəlxalq ictimaiyyəti nadir bir məkanda bir araya gətirir. Birinci vitse prezident əmin olduğunu bildirib ki, Azərbaycan bu universal platformaya evsahibliyi etmək üçün ən yaxşı məkanlardan biridir.
M.Əliyeva qeyd edib ki, münaqişəyə, yeni siyasi sistemə və bazar iqtisadiyyatına keçidin yaratdığı əlavə çağırışlara baxmayaraq, Azərbaycan uğurlu inkişaf strategiyasını tətbiq edərək, zəruri siyasi və iqtisadi islahatları həyata keçirə bilib. Azərbaycanını yüksələn xətlə inkişaf edən dövlət olduğunu qeyd edən Mehriban Əliyeva deyib ki, indi ölkəmizin iddiası 2025-ci ildə Ümumdünya Sərgisinə evsahibliyi etmək və bütün dünyanı qəbul etmək hüququnu qazanmaqdır.
Məlumat üçün bildirək ki, Azərbaycan “Expo 2025 Bakı” Sərgisini mayın 10-dan noyabrın 10-dək təşkil etmək təklifini irəli sürüb. Sərginin mövzusu isə “İnsan kapitalını inkişaf etdirək, daha yaxşı gələcək quraq” olacaq.
Bakının “EXPO-2025" sərgisinə evsahibliyi qəbul olunarsa, Azərbaycan bundan nələr əldə edəcək?
Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva mövzu ilə bağlı “Bakı-Xəbər”ə açıqlamasında bunları dedi: “Fransanın paytaxtında Bakının Ümumdünya Sərgisinə namizəd şəhər olması münasibətilə qəbul təşkil edilib. Həmin tədbirdə iştirak edən Azərbaycan Respublikasının Birinci vitse-prezidenti Mehriban Əliyeva ölkəmizin inkişaf etmiş, güclü və qüdrətli dövlət kimi nailiyyətlərini təqdim edib, Bakı şəhərinin isə beynəlxalq tədbirlərin, sərgilərin yüksək səviyyədə keçirilə biləcək mərkəz kimi imkanlarını diqqətə çatdırıb”.
S.Vəliyevanın sözlərinə görə, 2000-ci ildən “Expo” hərəkatının fəal üzvü olan Azərbaycan Beynəlxalq Sərgilər Bürosunun işinə özünəməxsus töhfələrini verə bilib. Hətta Azərbaycanın son 3 il ərzində keçirdiyi sərgilərin ziyarətçilərinin sayı milyondan çox olub: “Ona görə də bu gün Avropa və Asiyanın qovuşuğunda yerləşən, sivilizasiyalararası dialoqda əhəmiyyətli rol oynayan Azərbaycanın ümumi bərabərliyi, hörmət prinsiplərini özündə əks etdirən unikal birgə fəaliyyət platforması olan Beynəlxalq Sərgilər Bürosunun Ümumdünya Sərgisinə evsahibliyi etməyə mənəvi haqqı çatır. Azərbaycanın sosial-iqtisadi sahədə əldə etdiyi nailiyyətlər, beynəlxalq hesabatlardakı yüksək nəticələri, müxtəlif qlobal əhəmiyyətli tədbirlərə evsahibliyi etməsi, insan kapitalının formalaşdırılmasında yeni model ortaya qoyması, hətta sərginin təşkilinə 20 mindən çox könüllünü cəlb etməsi Azərbaycanın “Expo 2025” Ümumdünya Sərgisini yüksək səviyyədə təşkil etməsinə tam əsaslar yaradır”.
Millət vəkili onu da qeyd etdi ki, bu gün Bakı şəhəri dünyanın inkişaf mərkəzi kimi diqqətdədir və sərginin paytaxtımızda keçirilməsi haqqında müsbət qərar olarsa, bu, bütövlükdə, ölkəmizin perspektiv tərəqqisi baxımından böyük əhəmiyyət kəsb edəcək: “Expo - 2025” Ümumdünya Sərgisi dünyaya Azərbaycanın timsalında yeni güc, inkişaf, tolerantlıq və multikulturalizm mərkəzi təqdim edə bilər. Əlbəttə, sərgidə iştirak edəcək ölkələrin, şirkətlərin nümayəndələri bir daha Azərbaycan reallıqları haqqında dolğun və əyani məlumat alacaq, eyni zamanda, Azərbaycanda iş qurmaq, sərmayə yatırmaq istəyən dünya iqtisadiyyatı subyektləri, xarici kompaniyalar üçün əlavə imkanlar yaranacaq. Bununla yanaşı, Azərbaycan öz timsalında dünyaya multikulturalizmin, tolerantlığın nümunəsini təqdim edəcək. Düşünürəm ki, ümumilikdə “Expo - 2025” Ümumdünya Sərgisi Bakı şəhərində keçirilərsə, bundan həm dünya ölkələri, həm də Azərbaycan böyük dividendlər əldə edəcək, eləcə də “Expo - 2025” Beynəlxalq Sərgilər Bürosunun tarixinə xüsusi sərgi kimi həkk olunacaq”.
Günel CƏLİLOVA
