Fikrət Sadıqov: “Sarkisyan bütün bu faktorların Azərbaycanın lehinə işləməsindən bərk narahatdır”
Məlum olduğu kimi, Ermənistan prezidenti Serj Sarkisyan Moskvaya gedib. Sarkisyan 15-16 noyabr tarixlərində Moskvada keçirilən erməni mədəniyyət günlərində iştirak edib.
Bu arada erməni KİV-nin yaydığı məlumata görə, Moskvada səfərdə olan Ermənistan prezidenti S.Sarkisyan Rusiya prezidenti Vladimir Putinlə görüş keçirib. Görüş zamanı iki ölkə arasında siyasi, iqtisadi əlaqələr, təhlükəsizlik və humanitar sahələrdə əməkdaşlıq məsələləri ilə yanaşı, Qarabağ münaqişəsinin nizamlanması prosesinə də toxunulub.
Yayılan ümumi bəyanatda münaqişənin müzakirə edildiyi vurğulansa da, bu barədə ətraflı məlumat verilməyib.
Aydın məsələdir ki, Sarkisyan Moskvaya təkcə erməni mədəniyyət günlərində iştirak etmək məqsədilə getməyib. Bu baxımdan Putinlə Sarkisyanın nələr müzakirə etdiyi maraqlıdır. Xüsusilə noyabrın 13-də Soçidə Ərdoğan-Putin görüşü keçirildi və iki lider qapalı müzakirələrdə Qarabağ münaqişəsinə də toxundular. Hətta Ərdoğanla Putinin Qarabağla bağlı yeni planının olduğu, Rusiya XİN rəhbəri Sergey Lavrovun da məhz bu planı müzakirə etmək üçün noyabrın 19-da Bakıya, 20-də isə İrəvana səfər edəcəyi haqda fikirlər var.
Dağlıq Qarabağla bağlı müzakirələrin aparıldığı Soçi görüşündən sonra Putinin Sarkisyanı Moskvaya dəvət etməsi diqqət çəkir. Bu kontekstdə, Putinlə Sarkisyanın Moskvada Dağlıq Qarabağ məsələsini xüsusi müzakirə etdiyi güman olunur. Ərdoğan-Putin görüşündə Qarabağla bağlı müəyyən müzakirələrin aparılacağı, bundan sonra Putinin Sarkisyana yeni plana uyğun hərəkət etmək haqda təlimat verəcəyi fikirləri əvvəldən mövcud idi. Ehtimal olunur ki, Putin-Sarkisyan görüşündə məhz Qarabağla bağlı hansısa yeni müzakirələr aparılıb. Bu müzakirələrin münaqişənin mövcud status-kvonun dəyişməsi ilə nəticələnən həlli üzərində olacağı ehtimalı böyükdür.
Maraqlıdır, bəs ekspertlər Sarkisyanın qəfil Moskva səfərini necə şərh edirlər?
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, erməni mədəniyyət günlərində iştirak etmək sadəcə bir pərdədir: “Aydındır ki, mədəniyyət günləri bir pərdədir. Çox güman ki, Sarkisyan Putinlə görüşdə Ermənistanı narahat edən məsələləri müzakirə edib. Görünən odur ki, Sarkisyan çox narahatdır. Məsələ ondadır ki, son vaxtlar Rusiya Dağlıq Qarabağ məsələsində təşəbbüslər irəli sürür. Putinlə Ərdoğan noyabrın 13-də görüşərkən bir sıra məsələləri müzakirə ediblər. Çox güman ki, Dağlıq Qarabağ məsələsi də tərəflər arasında müzakirə mövzusu olub. Həmçinin, bütün bunlardan sonra Rusiya XİN rəhbəri Sergey Lavrovun regiona səfər edəcəyi təsadüfi deyil. Görünən odur ki, Dağlıq Qarabağ münaqişəsinin həllində müəyyən canlanma hiss olunur. Ehtimal ki, bu, Sarkisyanı artıq dərəcədə narahat edən bir məqamdır. Görünür, o, Rusiya tərəfindən özünə təsəlli gözləyir. Hesab edirəm ki, Sarkisyanın Moskvaya getməsi, Putinlə görüşməsi həm də buna hesablanıb. Yəni Sarkisyan rəsmi Moskvadan dəstək umur. Çünki növbəti ildə o, konstitusiya dəyişikliyi ilə əlaqədar olaraq baş nazir olmaq istəyir. Başqa bir tərəfdən, Azərbaycan artıq regionda bir sıra layihələrə imza atıb. Bir neçə gün əvvəl Baki-Tiflis-Qars dəmir yolu işə salındı. Həmçinin, “Şimal-Cənub” nəqliyyat dəhlizi ilə bağlı önəmli qərarlar qəbul olundu. Xüsusən də bu layihə Ermənistanı çox məyus edib. Çünki bütün bunların nəticəsində Azərbaycanın bölgədə rolu artır. Ermənistan rəhbərliyi də bütün bunların fərqindədir. Bu, şəxsən Sarkisyanı narahat edən məsələlərdən biridir. Sarkisyan bütün bu faktorların Azərbaycanın lehinə işləməsindən bərk narahatdır”.
Vidadi ORDAHALLI
