Məhərrəm Zülfüqarlı: “Mehriban xanımın bununla bağlı səsləndirdiyi arqumentlər reallığı əks etdirir və tamamilə doğru yanaşmadır”
Noyabrın 14-də Parisdə, Royal Pavilyonda Azərbaycanın paytaxtı Bakının Beynəlxalq Sərgilər Bürosunun 2025-ci ildə keçiriləcək Ümumdünya Sərgisinə namizəd şəhər olması münasibətilə qəbul təşkil edilib. Tədirdə iştirak edən Azərbaycanın Birinci vitse-prezidenti Mehriban Əliyeva çıxışı zamanı bir sıra məqamlara toxunub.
Onun sözlərinə görə, Azərbaycan 2000-ci ildən etibarən “Expo” hərəkatının fəal üzvüdür: “Bizim pavilyonlarımız son üç sərgidə - 2015-ci ildə pavilyonumuzu üç milyondan çox insanın ziyarət etdiyi Milanda, 2016-cı ildə Antalyada və 2017-ci ildə Astanada mükafatlar qazanıb. Beynəlxalq Sərgilər Bürosunun işinə sadə töhfəmizin bu cür qiymətləndirilməsindən qürur duyuruq.
Biz sərgi məkanının yaradılmasına və istismarına bütün lazımi vəsaiti ayırmağa, həmçinin, inkişaf etməkdə olan ölkələrin sərgidə iştirakını dəstəkləməyə hazırıq.
Sonda, əziz dostlar, mən Ümumdünya Sərgisinə evsahibliyi etmək üçün bizim təklifimizi dəstəkləmək məqsədilə əsas məqamları bir daha diqqətinizə çatdırmaq istəyirəm:
1. Bizim müxtəlif dinlərə və etnik mənşəyə mənsub olan insanlar arasında multikulturalizm və qarşılıqlı hörmət ənənələri ilə zəngin olan qədim tariximiz var. 2. Avropa ilə Asiyanın kəsişməsində yerləşən, asanlıqla çıxış əldə oluna bilən coğrafi mövqeyimiz Ümumdünya Sərgisinin keçirilməsi üçün yeni bir məkandır. 3. Biz siyasi və iqtisadi sabitliyə, maliyyə imkanlarına, yüksək səviyyəli təhlükəsizliyə malik gənc müstəqil ölkəyik. 4. Sürətlə inkişaf edən infrastruktura malik Bakı şəhəri özündə tarixin və müasirliyin nadir qarışığını təcəssüm etdirir. 5. Azərbaycan turist axınının sürətlə artdığı və 90-dan artıq ölkənin vətəndaşlarına asan girişi və onlara elektron vizaların verilməsini təmin edən ölkədir. 6. Zəngin mətbəximiz, xoş iqlimimiz və ənənəvi qonaqpərvərliyimiz əlbəttə ki, bizim üstünlüyümüzdür”.
Məlumat üçün qeyd edək ki, Azərbaycan “Expo - 2025 Bakı” Sərgisini mayın 10-dan noyabrın 10-dək təşkil etmək təklifini irəli sürüb. Sərginin mövzusu isə “İnsan kapitalını inkişaf etdirək, daha yaxşı gələcək quraq” olacaq. Bakı ilə yanaşı, Rusiyanın Yekaterinburq, Yaponiyanın Osaka və Fransanın Paris şəhərlərinin də “Expo - 2025” Ümumdünya Sərgisinin keçirilməsi üçün namizədliyi irəli sürülüb.
Ümumilikdə, Mehriban xanımın sadaladığı 6 arqument Bakının digər şəhərlərlə rəqabətdə uğur əldə etməsində necə rol oynayacaq?
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, sözügedən arqumentlərə görə Bakının qalib olmaq şansı böyükdür: “Çünki sərgiyə namizəd olan digər şəhərlər bütün bunlara sahib deyil. Məsələn, Azərbaycan Asiya ilə Avropanın kəsişməsində yerləşir. Ancaq nə Yekaterinburq, nə Paris və nə də Osaka buna sahib deyil. Bununla yanaşı, sözügedən ölkələrin heç biri Azərbaycan qədər tolerant deyil. Eyni zamanda, namizəd şəhərlərin heç biri Bakı qədər zəngin mətbəxə və qonaqpərvərliyə malik deyil. O cümlədən, digər məsələlərdə də Bakı öndədir. O baxımdan Mehriban xanımın bununla bağlı səsləndirdiyi arqumentlər reallığı əks etdirir və tamamilə doğru yanaşmadır. Çünki bunların hamısı obyektiv fikirlərdir və mən bunu dəstəkləyirəm. Ancaq bundan fərqli olaraq, sərgiyə iddia edən digər şəhərlər sadalanan xüsusiyyətləri özündə birləşdirmir. Bu baxımdan rəqabətdə Bakının udma şansı digərlərinə baxanda daha böyükdür. Başqa bir tərəfdən, onu da nəzərə almaq lazımdır ki, Azərbaycanın paytaxtı Bakı uzun müddətdir bir sıra beynəlxalq tədbirlərə evsahibliyi edir. İndiyəcən keçirilən bütün tədbirlər yüksək səviyyədə təşkil olunub və Azərbaycan özünü doğruldub. Bu bir daha Azərbaycanın belə tədbirlər keçirməyə qadir olduğunu təsdiq edir. Bununla bağlı zəngin ənənə və təcrübə var. Ona görə də Bakının rəqabətdə qalib olma şanslarını yüksək qiymətləndirirəm. Ümid edirəm ki, bütün bu faktorlar nəzərə alınacaq”.
Vidadi ORDAHALLI
