Arzuxan Əlizadə: “O üzdən, Ərdoğan-Putin görüşündən narahatdırlar”
Məlum olduğu kimi, Soçidə Rusiya prezidenti Vladimir Putinlə Türkiyə dövlət başçısı Rəcəb Tayyib Ərdoğan arasında keçirilən görüşdən sonra Dağlıq Qarabağ münaqişəsinin həll edilməsi məsələsi yenidən aktuallaşıb. Məsələ ondadır ki, məhz həmin görüşdən sonra Rusiya xarici işlər naziri regiona səfər edəcəyini bəyan edib. Bununla yanaşı, xarici işlər nazirləri arasında təmaslar intensivləşir.
Bu arada diqqətçəkən məqamlardan biri də ondan ibarətdir ki, erməni mediası Putin-Ərdoğan görüşünü olduqca pessimist əhval-ruhiyyədə dəyərləndirir. Daha doğrusu, sözügedən görüş onlarda olduqca bədbin ovqat yaradıb.
Erməni politoloq, “Modus Vivendi” mərkəzinin direktoru Ara Papyan da Ərdoğan-Putin görüşünün indiyə qədərki görüşlərdən çox fərqləndiyini bildirib. Onun sözlərinə görə, Rusiya prezidenti ilə Türkiyə dövlət başçısının Qarabağ müzakirələri Ermənistan üçün yaxşı heç nə vəd etmir: “Rusiya ilə Türkiyə Qarabağ münaqişəsinin həlli formulunu tapmağa çalışırlar. Onlar özləri də etiraf edirlər ki, Minsk Qrupu formatında bu razılaşmanı əldə etmək mümkün olmayacaq”.
Ancaq o, yaranmış vəziyyətdə Rusiya və Türkiyənin fərqli addımlar ata biləcəyini istisna etmir. Lakin qeyd edir ki, Azərbaycanın Rusiya və Türkiyə ilə indiki münasibətləri nəzərə alınarsa, atılan addımlar İrəvanın lehinə olmayacaq. Bununla yanaşı, Papyan Ermənistana bundan sonra təzyiqlərin artacağını da proqnozlaşdırır. O qeyd edib ki, İrəvanı yola gətirmək üçün Moskva yeni hərbi əməliyyatlara “yaşıl işıq” yandıra bilər. Papyan Ermənistan ordusunun zəifliklərini Azərbaycanın yaxşı bildiyinə də diqqət çəkərək, yeni əməliyyatların ölkəsi üçün daha böyük problemlərlə yekunlaşa biləcəyini də xüsusi olaraq vurğulayıb. Onun fikrincə, Azərbaycanın Ermənistandan üstünlüyü həm də ondadır ki, insan ehtiyatlarına deyil, texnologiyalara istinad edir.
Bütün bu deyilənlərin fonunda, erməni mediasının pessimizmə köklənməsini ekspertlər necə şərh edir? Məsələyə münasibət bildirən AMİP-in baş katibi Arzuxan Əlizadə bunu bir sıra amillərlə əlaqələndirdi: “Bunun kökündə bir sıra faktorlar dayanır. Artıq bir çox ermənilər dərk edirlər ki, Rusiyanın yardımı ilə Azərbaycan ərazilərinin işğal edilməsi və bunun indiyə qədər davam etməsi hər şeyi həll etmir. Azərbaycan torpaqlardan imtina etməyəcəyini zaman-zaman bəyan edib. Adətən görürsən ki, döyüşdə məğlub olan tərəf qarşı tərəfin şərtlərini qəbul edir. Ancaq bunların heç biri baş verməyib. Əksinə, 1994-cü illə müqayisədə Azərbaycan daha da güclənib və bu özünü bir sıra sahələrdə göstərir. Ermənistan de-fakto torpaqları ələ keçirsə də, ötən müddət ərzində de-yure nəyəsə nail ola bilməyib. Yəni hüquqi baxımdan bu sahədə hansısa uğur əldə edə bilməyib. Əksinə, işğal olunmuş Azərbaycan əraziləri ilə bağlı müxtəlif beynəlxalq səviyyəli qətnamə və qərarlar var. Başqa bir tərəfdən, ötən müddət ərzində Azərbaycan neft strategiyası sayəsində ölkədə iqtisadi inkişafa nail olub. Qərb şirkətləri Azərbaycanda bir sıra böyük layihələr həyata keçirirlər. Çəkilən neft-qaz kəmərləri, bu günlərdə istifadəyə verilən Baki-Tiflis-Qars dəmir yolunu misal göstərmək olar. Bütün bunlarla yanaşı, Azərbaycanın Ermənistanla yetərincə yaxşı münasibətlərə malik olan Rusiya və İranla uğurli iqtisadi əlaqələr qurması erməniləri məyus edir. Söhbət “Şimal-Cənub” nəqliyyat dəhlizi və digər layihələrdən gedir. Hansı ki, 3 ölkə prezidentinin bu günlərdə Tehranda bir araya gəlməsi bu istiqamətdə işlərin sürətləndirilməsinə təkan verir. Qorxurlar ki, Rusiya onları satacaq. Erməniləri məyus edən odur ki, Azərbaycan bütün tərəflərlə faydalı əmakdaşlıq qurur. O üzdən, Ərdoğan-Putin görüşündən məyusdular. Başqa bir tərəfdən, ermənilər onun da fərqindədirlər ki, Ermənistan Rusiyanın əlində bir alətdir. Yəni rəsmi Moskva öz təsir imkanlarını qorumaq üçün ermənilərdən istifadə edir”.
Vidadi ORDAHALLI
