Vüqar Qədirov: “Biz Fransanın timsalında belə halla ilk dəfə deyil ki, rastlaşırıq”
Fransa prezidenti Emmanuel Makron Klikiya erməni kilsəsinin katalikosu Birinci Arama məktub ünvanlayıb. Ermənistan mətbuatı həmin məktubun mətnini dərc edib. Məktubda prezident qeyd edir ki, Fransa dünyanın bütün nöqtələrində yaşayan ermənilərin səmimi dostu sayılır.
Makronun belə məzmunlu məktubu katalikosa hansı səbəbdən yazması məlum deyil. Ancaq iddia olunur ki, bu, Yaxın Şərqdə yaradılması nəzərdə tutulan yeni düzənin qurulması ərəfəsində təsadüfən edilmir. Maraqlıdır ki, Makron öz məktubunda ermənilərin iddia etdiyi qondarma “soyqırım”ı bir reallıq kimi qəbul etdiyini ifadə edir, hətta bu “acı xatirə”nin yad edilməsinə Türkiyəni də dəvət edir.
Makronu bu şəkildə erməni sevgisini ifadə etməyə nə vadar edə bilər?
Ekspert Vüqar Qədirovun sözlərinə görə, bu haldan dərin təəssüf keçirməyə dəyər: “Çünki bunu dünyanın nüfuzlu ölkələrindən birinin rəhbəri edir. Eyni zamanda, bu ölkə Dağlıq Qarabağ münaqişəsinin tənzimlənməsində vasitəçilik missiyasını üzərinə götürüb. Belə erməni sevgisi olan ölkənin başçısından bu məsələdə hansı ədaləti gözləmək olar? Biz Fransanın timsalında belə halla ilk dəfə deyil ki, rastlaşırıq. Yadıızdadırsa, məhz qondarma “soyqırım” iddialarına görə ən sərt qanunu da onlar qəbul etdi. Sözdə “erməni soyqırımı”nın inkarına görə hətta həbs cəzasının nəzərdə tutulduğuna dair qanun qəbul etdilər. Baxın, Avropanın demokratik ölkələrindən biri olduğunu iddia edən dövlət sözdə “erməni soyqırımı”nın olmadığını deyənlərə qarşı cinayət məsuliyyəti tətbiq edir və hətta həmin adamlar həbs olunurdu. Göründüyü kimi, Fransa bu məsələdə ermənipərəstliyini gizlətmir. Makronun məktubundakı frazaları da həmin siyasətin davamı kimi qeyd edə bilərik. Bununla Makron bildirmək istəyir ki, Yaxın Şərqdə onların əlində erməni kartı da olacaq. Erməniləri hər yerdə istifadə edirlər. Qafqazda Rusiya etdiyi kimi, Yaxın Şərqdə də Fransa etmək istəyir. Fransa ilə ermənilərin dostluğunun kökündə duran ən mühüm amillərdən biri də həmin ölkədə olan güclü erməni diasporudur. Bu amil danılmazdır. Onların Fransa siyasətinə birbaşa təsiri var. Buna görə də biz Fransanın dövlət başçılarından belə hərəkətləri görürük. Təəssüflə qeyd etməliyik ki, nisbətən cavan siyasətçi olan Makron da bu məsələdə öz sələflərinin yolunu gedir. Bir neçə gün əvvəl isə ABŞ-ın vitse-prezidenti Ermənistanı xristianlığın yayıldığı ən qədim torpaq kimi xarakterizə etmişdi. Bu da bizim problemimizlə məşğul olan, müşahidəçiliyi və vasitəçiliyi üzərinə götürən başqa bir həmsədr ölkə. Görün bunlarda erməni sevgisi hansı aşırı dərəcəyə çatıb ki, onlar hətta öz dövlətlərinin adından yalan danışırlar”.
Məhəmmədəli QƏRİBLİ
