Ağa Seyidli: “Azərbaycan dinlər arasında münasibət və tolerantlıq baxımından doğrudan da bütün dünyaya nümunədir”
ATƏT sədrinin antisemitizm üzrə xüsusi nümayəndəsi bu günlərdə bildirib ki, Azərbaycanda müxtəlif dinlərin birgə yaşayışı ilə bağlı əla model mövcuddur. ATƏT nümayəndəsini bu qənaətə gəlməyə hansı faktorlar məcbur edib?
Ekspert Ağa Seyidli qəzetimizə bildirdi ki, bu ifadəni yalnız dediyiniz nümayəndə işlətməyib: “Biz dünya liderlərinin, din xadimlərinin dilindən də bu fikirləri dəfələrlə eşitmişik. Bilirsiniz ki, Azərbaycan Cənubi Qafqazda mühüm strateji rol oynayır. Əhalisinin əksəriyyəti müsəlmanlar olan Azərbaycan bir sıra başqa etnik və dini qrupların, o cümlədən qədim zərdüştilik, xristian və yəhudi icmalarının nümayəndələrinin də doğma evi sayılır. Şərq ilə Qərbin arasında yerləşən ölkəmiz əsrlər boyu müxtəlif dinlərə mənsub insanların vətəni olub. Tarixə nəzər salsaq, ən qədim zamanlardan indiki dövrə qədər bu ərazidə müxtəlif xalqların və dinlərin nümayəndələri sülh şəraitində birgə yaşayıblar. Həmin müxtəliflik və zənginlik hazırda da davam edir. Azərbaycanın tarixi memarlıq abidələrinə, arxitektura nümunələrinə baxdıqda əsrlər boyu bu ərazidə yaşamış müxtəlif xalqların və dinlərin izlərini bariz şəkildə görmək mümkündür. Azərbaycan hökuməti ölkədə bu zənginliyi qoruyub saxlamağa həmişə böyük diqqət yetirib. Dini və mədəni zənginliyimizə olan münasibətimizin ən gözəl göstəricilərindən biri torpaqlarımızın 20 faizini işğal edən, həmvətənlərimizi qaçqın və məcburi köçkün vəziyyətinə salan Ermənistan ilə müharibə şəraitində olmağımıza baxmayaraq, Bakının mərkəzində erməni kilsəsinin dini və mədəni abidə kimi qorunub saxlanmasıdır. Eyni zamanda, Azərbaycanda müsəlmanlar, xristian və yəhudi icmasının nümayəndələri əsrlər boyu mehribanlıq, dostluq, qardaşlıq şəraitində birgə yaşayıblar və yaşamaqda davam edirlər. Azərbaycanda heç vaxt dini zəmində münaqişələr müşahidə olunmayıb. Azərbaycan dinlər arasında münasibət və tolerantlıq baxımından doğrudan da bütün dünyaya nümunədir. Təbii ki, bütün sadalanan faktorlar ATƏT rəsmisini bu qənaətə gətirib. Ölkəmiz yalnız bu siyasəti həyata keçirməklə kifayətlənmir. Eyni zamanda, onu bütün dünyaya təbliğ edir. Ölkəmizdə dini tolerantlıq və multikulturalizmlə bağlı çoxlu sayda elmi konfrans və tədbirlər keçirilir. Doğrudan da bu modelin dünya tərəfindən mənimsənilməsinə ciddi ehtiyac var”.
Məhəmmədəli QƏRİBLİ
