Qabil Hüseynli: “Bu, Azərbaycanın siyasi nüfuzunun artmasına dəlalət edir”
Azərbaycan Prezidentinin ictimai-siyasi məsələlər üzrə köməkçisi-şöbə müdiri Əli Həsənovun Azərbaycan, İran və Rusiya prezidentlərinin noyabrın 1-də Tehranda keçirilmiş üçtərəfli görüşü ilə bağlı fikirlərini açıqlayıb: “Bu görüş onu göstərdi ki, Azərbaycan, İran və Rusiya arasında səmimi dostluq əlaqələri mövcuddur. Üç ölkə arasında qarşılıqlı hörmət və səmərəli əməkdaşlıq ümumilikdə regionun aktual məsələlərinin həlli üçün böyük önəm daşıyır və bütün iştirakçılar səmərəli əməkdaşlıq kursunu davam etdirmək əzmindədirlər.
Onu da qeyd etməliyəm ki, son dövrlərdə bölgədə reallaşdırılan həm ikitərəfli, həm də çoxtərəfli görüşlərin bir çoxunun təşəbbüskarlığı və liderliyi Azərbaycana məxsusdur. Azərbaycan, İran və Rusiya üçtərəfli görüşünün, onların arasında formalaşmış tərəfdaşlıq kursunun, həyata keçirilən və nəzərdə tutulan birgə layihələrin təşəbbüsü də Azərbaycandan gəlib və artıq öz pozitiv nəticələrini göstərməkdədir”.
Göründüyü kimi, Əli Həsənov son dövrlərdə bölgədə reallaşdırılan həm ikitərəfli, həm də çoxtərəfli görüşlərin bir çoxunun təşəbbüskarlığı və liderliyinin Azərbaycana məxsusluğunu vurğulayıb. Bu fikri necə dəyərləndirmək olar?
Politoloq Qabil Hüseynlinin sözlərinə görə, Prezident İlham Əliyevin İrana rəsmi səfəri və bundan əvvəl keçirilən ikitərəfli və üçtərəfli formatdakı görüşlər doğrudan da ölkəmizin aktiv rola malik olduğunu təsdiqləmiş olur: “Bütün bunlar onu göstərir ki, Azərbaycan regionda açar rolunu oynayan bir dövlət halına gəlib. Beynəlxalq münasibətlərdə dinamik rol oynayır. Bir çox iqtisadi məsələləri həll etməkdə vasitəçi, təşəbbüskar, həm də bir çox hallarda əsas maliyyə vəsaitlərini yatıran bir ölkə kimi çıxış edir. Bu, Azərbaycanın siyasi nüfuzunun artmasına dəlalət edir. Yaxın zamanlarda Azərbaycan öz problemlərinin həlli üçün həm də bölgənin ən nüfuzlu və aparıcı dövlətinə çevriləcək. Artıq bu görüş formatlarına bizim təşəbbüskarlıq etməyimiz müəyyən problemlərin aradan qaldırılmasına da kömək edir. Məsələn, elə son zirvənin iştrakçısı olan İranla münasibətləri buna misal çəkə bilərik.
İranla dərin tarixi və mədəni əlaqələrimiz var. Hər ikimiz müsəlman ölkəsiyik. İranın Dağlıq Qarabağ məsələsində müsəlman ölkəsi kimi haqqın tərəfində olması vacib şərtdir. Azərbaycanın da haqqıdır ki, bu məsələdə müsəlman xalqlarına müracət etsin. İran həm yaxın qonşumuz, tarixi əlaqələrimiz olan, həm də 35 milyon soydaşımızın yaşadığı bir ərazidir. Bizim mənəvi haqqımız var ki, münaqişənin həll olunması istiqamətində haqqın tərəfində durmağı tələb edək. Əminəm ki, bizim siyasi və iqtisadi fəallığımız , böyük iqtisadi layihəni həyata keçirməyimiz İran üçün də çox mənfəətlidir. Bu da İran tərəfinin özünün Ermənistanla bağlı siyasətinə düzəliş etməsilə nəticələnəcək. Azərbaycanın bölgədə liderliyi ələ alması və deyilən formatlarda görüş təşkil etməsi başqa ölkələr arsında olan münasibətləri də tənzimləmək gücünə malikdir. Bununla da Azərbaycan həm də mühüm və etibarlı beynəlxalq vasitəçiyə çevrilmiş olur”.
Məhəmmədəli QƏRİBLİ
