Məhəmməd Əsədullazadə: “Qarabağ danışıqlarına başlamaqla bu ölkə artıq Azərbaycanın hərbi gücünü də anlayır”
Məlum olduğu kimi, 3 ölkə prezidentinin Tehranda keçirdikləri üçtərəfli görüş böyük marağa səbəb olub. Sözügedən görüş “Şimal-Cənub” nəqliyyat dəhlizinin ərsəyə gətirilməsi istiqamətində görülən işlərə ciddi təkan verəcək.
Nəzərə almaq lazımdır ki, bu layihə Bakı-Tiflis-Qars layihəsi kimi Azərbaycanın bölgədəki iqtisadi və siyasi çəkisini artıracaq. Bakı-Tiflis-Qars dəmir yolunun işə düşməsindən iki gün sonra Azərbaycan, Rusiya və İran prezidentlərinin Tehranda görüşüb Azərbaycandan keçəcək digər dəmir yolu layihəsini müzakirə etməsi Ermənistanın təcridini daha da gücləndirəcək. Məsələ ondadır ki, Ermənistan bu layihənin qarşısını almaq üçün çox çalışdı, amma nəyəsə nail ola bilmədi. Bu ölkə ilə yaxşı münasibətdə olan Rusiya və İran Ermənistanın təklif etdiyi layihələrə ciddi yanaşmadılar. Çünki Ermənistan ərazisindəki dağ yollarında dəmir yolu çəkmək üçün milyardlar lazım idi. O üzdən, hər iki dövlət Azərbaycan marşrutuna üstünlük verdilər. Nəzərə almaq lazımdır ki, kasıb Ermənistandan fərqli olaraq, Azərbaycan bu kimi layihələrdən ötrü hansısa ölkədən kredit almır. Əksinə, bəzi ölkələrə kredit yardımı edir. O üzdən, hər iki layihə çox əhəmiyyətlidir. Hər iki layihənin geosiyasi əhəmiyyəti böyükdür. Zamanla dəmir yolları tam gücü ilə işlədikdə bunun təsirini daha çox hiss edəcəyik.
Bütün bunlar onu deməyə əsas verir ki, Azərbaycanın fəal iştirakı və təşkilatçılığı ilə son həftələr regionda bir sıra uğurlar əldə olundu. Azərbaycanın bir uğuru da ondan ibarətdir ki, Ermənistan oktyabrın 16-da Cenevrədə qeyd-şərtsiz danışıqlara məcbur edildi. Bütün bunlar Ermənistanın təcrid olunmasında və zəiflədilməsində hansı rol oynayır?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, hər iki aspektdən bunun Ermənistana təsiri olacaq: “Cənubi Qafqazda son günlər böyük layihələr formalaşır. Cənubi Qafqaz, xüsusilə Azərbaycan dünyanın diqqət mərkəzindədir. Bakı-Tiflis-Qars dəmir yolunun açılışı, Tehranda Azərbaycan, Rusiya və İran prezidentlərinin görüşü, “Şimal-Cənub” nəqliyyat dəhlizinin reallaşması Azərbaycanın regionda siyasi rolunu artırır. Bu meqalahiyələr ölkəmizin əsas söz sahibi olmasına zəmin yaradır, regionda aparıcı qüvvə kimi rolunu artırır. O üzdən, bütün bunlar Ermənistanı daha da zəiflədəcək. Hazırda Ermənistanın Azərbaycana qarşı işğalçı siyasəti bu ölkəni regional layihələrdən kənarda qoyub. Qeyd edim ki, Ermənistan iqtisadi və siyasi olaraq dalana dirənib. Qarabağ danışıqlarına başlamaqla bu ölkə artıq Azərbaycanın hərbi gücünü də anlayır. Hesab edirəm ki, bu danışıqlar sonunda Azərbaycanın qələbəsi ilə yekunlaşacaq. Ermənistan əsrin böyük layihəsi olan BTQ dəmir yoluna qoşulmağa çalışır. Təbii ki, bu, ölkənin iqtisadi vəziyyətinə müsbət dinamika qata bilər. Ancaq BTQ dəmir yolundan istifadə yalnız işğala son qoyulandan sonra baş verə bilər. Ermənistan regionda Rusiyanın satalleti olan bir ölkədir. Onun Qarabağda hərbi fəaliyyəti yalnız özünütəcridə xidmət edir. Bu gün Azərbaycan Qərblə Şərqi və Şimalla Cənubu birləşdirən əsas nəqliyyat mərkəzidir. Ona görə də qonşu ölkələr və Qərb Azərbaycanın Qarabağ münaqişəsində mövqeyini ciddi dəstəkləməli və Ermənistana təzyiq etməlidirlər. Qafqazda münaqişə həll edilərsə, bu, regionun ümumi təhlükəsizliyinə töhfə verəcək. BTQ, Bakı-Tiflis-Ceyhan və Şimal-Cənub nəqliyyat dəhlizi Azərbaycanın meqalayihələridir”.
Vidadi ORDAHALLI
