Vüqar Qədirov: “Ölkəmiz məhz möhkəm iradəsi sayəsində qitələri birləşdirən layihələrin təşəbbüskarı və iştirakçısı kimi tarixə düşdü”
Prezident İlham Əliyev Bakı-Tiflis-Qars (BTQ) dəmir yolu xəttinin istifadəyə verilməsi münasibətilə Bakıda keçirilən təntənəli mərasimdə bildirib ki, bu yol vasitəsilə birinci mərhələdə 5 milyon, ondan sonrakı mərhələdə 17 milyon, daha sonrakı mərhələdə isə daha böyük həcmdə yüklərin daşınması nəzərdə tutulub: “Bakı-Tbilisi-Qars dəmir yolu tarixi, strateji əhəmiyyətli layihədir. Bu yolun uzunluğu təxminən 850 kilometrdir, onun da 405 kilometri Azərbaycan ərazisindən keçir. Bakı-Tbilisi-Qars dəmir yolu Avropa ilə Asiyanı birləşdirən ən qısa və etibarlı yoldur.
Bir sözlə, bu dəmir yolu Avrasiyanın nəqliyyat xəritəsinin önəmli hissəsinə çevrilir. Bu yolun fəaliyyəti nəticəsində yol boyunca yerləşən ölkələr arasındakı ticarət dövriyyəsi artacaq. Qarşılıqlı sərmayə qoyuluşu da artacaq, bütün bu yoldan istifadə edən ölkələr arasındakı əməkdaşlıq dərinləşəcək. Bu yol sabitliyə, təhlükəsizliyə xidmət göstərəcək. Bu yolun istifadəsi zamanı turizmin inkişafı geniş vüsət alacaq. Dəmir yolunun fəaliyyəti ölkərimizin geosiyasi əhəmiyyətini artıracaq, bizim üçün əlavə imkanlar yaradacaq. Dəmir yolunun tikintisi ilə bağlı anlaşma Gürcüstanda bağlanmışdır, ondan sonra Türkiyədə təməlqoyma mərasimi keçirilmişdir. Nəhayət, bu gün Azərbaycanda-Ələtdə bu yolun açılışını qeyd edirik. Bu yolun tikintisi Azərbaycan, Türkiyə, Gürcüstan arasındakı dostluğun, qardaşlığın nəticəsidir. Üç ölkə bütün sahələrdə uğurla əməkdaşlıq edirlər, bir-birlərini dəstəkləyirlər. Ölkələrimiz, xalqlarımız dünya üçün önəmli olan layihələri icra edirik. Bakı-Tbilisi-Qars dəmir yolu bu layihələrin arasında xüsusi yer tutmuş layihədir”.
Prezident İlham Əliyev Bakı-Tiflis-Ceyhan, Bakı-Tiflis-Ərzurumun da məhz bu şərtlərlə gerçəkləşdiyini bildirərək, Bakı-Qarsdan sonra “Cənub Qaz Dəhlizi”nin də uğurla yekunlaşacağını ifadə etdi.
Prezidentin açılış mərasimində etdiyi geniş məzmunlu çıxışdan aydın olur ki, bu 4 layihənin reallaşmasında iki önəmli faktor olub - Azərbaycanın möhkəm iradəsi və layihə iştirakçıları olan ölkələrin dostluğu, qarşılıqlı anlaşması.
Ekspert Vüqar Qədirovun sözlərinə görə, nəinki bu layihənin, ümumiyyətlə, başqa böyük layihələrin reallaşmasında da Azərbaycanın iradəsi, əzmi böyük rol oynayıb: “Ölkəmiz bu layihələrdə təşəbbüskar kimi səylərə başlayıb. Əvvəl belə böyük layihələrin başa çatacağına inam az olub, hətta istehza ilə qarşılayanlar da var idi. Araşdırsanız görərsiniz ki, bizim müxalif dairələrin özü də BTQ ilə bağlı bədbin proqnozlar veriblər. Bunun reallaşmaması üçün beynəlxalq təzyiqlər də az olmayıb. Bəziləri, ümumiyyətlə, layihənin reallaşmasını istəməyib, bəziləri isə, nəyin bahasına olursa-olsun, Ermənistanı ora soxmaq istəyiblər. Azərbaycan bunların heç birilə razılaşmayıb, ancaq layihəni həyata keçirə bilib. Təsəvvür edirsinizmi, şərtlərə əməl etmədiyimiz üçün, bizə bu layihə üçün kredit də ayırmayıblar. Elə zənn edirdilər ki, Azərbaycanın təzyiqlərə iradəsi tab gətirməyəcək. Ancaq rəqəmlərə fikir versəniz görərsiniz ki, layihə ilə bağlı ən iri həcmdə investisiya qoyuluşu Azərbaycanın payına düşür. Ölkəmiz hətta digər investorlara da güzəştli şərtlərlə kredit ayırıb ki, iş ləngiməsin. Nəticə ortadadır. Nə Ermənistan layihədə yer alır, nə də hansısa başqa maneələr bizim qarşımızı ala bildi. Bunun əhəmiyyətindən geniş danışıldığı üçün, təkrarçılığa yol vermək istəmirəm. Bir sözlə, deyə bilərəm ki, ölkəmiz məhz möhkəm iradəsi sayəsində qitələri birləşdirən layələrin təşəbbüskarı və iştirakçısı kimi tarixə düşdü. Prezident bildirdi ki, layihənin davamı olaraq Şimal-Cənub xəttinə inteqrasiya nəzərdə tutulur. Bununla da yaxın qonşularımız olan Rusiya və İranın da maraqları nəzərə alınmış olacaq”.
Məhəmmədəli QƏRİBLİ
