Zahid Oruc: “Güclü siyasi iradə sərgiləyən Prezident İlham Əliyevin sayəsində bu layihə gerçəkləşdi”
Bakı-Tiflis-Qars dəmir yolunun istismara verilməsi Ermənistanda, sözün həqiqi mənasında, vahimə yaradıb. Görünən odur ki, Ermənistan mediası BTQ ilə bağlı son prosesi böyük narahatlıqla izləyir. Ermənistan mediası əvvəl sözügedən dəmir yolunu siyasi layihə hesab edirdisə, indi bunun belə olmadığını görürlər.
“Armtimes.com” saytında dərc olunan məqalədə bu barədə ətraflı söhbət açılır. Müəllif Ayk Qevorkiyan yazır ki, hələ 10 il əvvəl BTQ-nin əsası qoyulanda İrəvanda İqtisad İnstitutunun tələbələri qarşısında çıxış edən Robert Köçəryan bəyan etmişdi ki, ictimaiyyətin Ermənistanın iqtisadi blokadaya düşməsi haqqında narahatlığı əsassızdır. Çünki BTQ-nin iqtisadi səmərəsi yoxdur və bu dəmir yolu tikilib başa çatdırılmayacaq. Lakin R.Köçəryanın fikri özünü doğrultmadı, BTQ-nin əsası qoyuldu və tikinti işləri başladı. Bir müddət sonra İrəvan Dövlət Universitetində çıxış edən R.Köçəryan yenə də jurnalistlərin bu barədə sualına cavab vermək məcburiyyətində qaldı. Jurnalistlər R.Köçəryana belə bir sual verdilər: “Bəs siz deyirdiniz BTQ tikilməyəcək. Lakin layihənin əsası qoyulub və tikinti işləri başlayıb”. R.Köçəryan cavab verdi ki, bəli, tikinti işləri başlayıb, amma İrəvanın Qərbdəki müttəfiqləri bu layihəni dəstəkləmir və tikintinin başa çatacağı sual altındadır. Doğrudan da həmin vaxt bir neçə ermənipərəst ABŞ konqresmeni erməni lobbisinin səyləri ilə bəyanatla çıxış edərək BTQ-nin tikintisinin səmərəsiz olduğunu bildirdilər və Birləşmiş Ştatlar hökumətini bu layihəni dəstəkləməməyə çağırdılar.
O dövrdə rəsmi İrəvan düşünürdü ki, ABŞ konqresmenlərinin bəyanatı tikintinin qarşısını almaq üçün yetərlidir. Lakin zaman göstərdi ki, yetərli deyil.
Müəllif yazır ki, Azərbaycan, Gürcüstan və Türkiyə öz səyləri ilə BTQ-ni tikib başa çatdırdılar. Qlobal xarakter daşıyan BTQ istismara verildi. ABŞ və Avropa İttifaqı BTQ-nin istismara verilməsini alqışladılar.
A.Qevorkiyanın fikrincə, bu minvalla Ermənistan böyük yolların kəsişməsindəki hündür daşın üzərində oturan min yaşlı kor bayquşa çevrilir.
Məsələyə münasibət bildirən millət vəkili Zahid Orucun fikrincə, BTQ layihəsi ilə Azərbaycan Ermənistana növbəti ağır zərbəni vurdu: “Ermənistan mediasının bunu böyük narahatlıqla izləməsinin kökündə onların istəklərinin yerinə yetməməsi dayanır. Hətta Gürcüstan ərazisində yükdaşımalara qoşula biləcəklərinə absurd ümidlər bəsləyirlər. Birinci Qarabağ savaşında qazanan dövlət bu möhtəşəm layihəni tamaşaçı kimi seyr etməkdədir. Onlar zənn edirlər ki, guya bu prosesdə iştirak edəcəklər, Gürcüstanda hansısa yükdaşımalara qoşula biləcəklər. Amma özlərinə də bəllidir ki, xəttin istismarı ilə bağlı Gürcüstanda idarəçilik rəsmi Bakının ixtiyarında olacaq. Ortada dövlətlərarası müqavilələr var. Ona görə də hesab edirəm ki, bunu Ermənistan əleyhinə “dəmir döyüş” də adlandırmaq olar. Çünki neft siyasətinin fonunda onlar doğrudan da ziyan çəkdilər. Mən yaxşı xatırlayıram, Serj Sarkisyan xülyasını növbəti dəfə ifadə edərək “bu layihəni niyə Qarabağdan keçirmirlər?” demişdi. İndiki reallıqda Azərbaycan Ermənistana növbəti dəfə ağır zərbə vurmağı bacardı. Bu məsələ gündəmə gələndən dərhal sonra İran-Ermənistan və Ermənistan-Rusiya dəmir yolu xətlərinin işə düşməsi ilə bağlı ilkin hazırlıqlara başlandı. Məqsəd başadüşülən idi. Onlar Azərbaycanın siyasi iradəsini sındırmaq, prosesi əngəlləmək üçün hər cür təxribatlara əl atırdılar. Ancaq 2009-cu ildən kreditlərin ayrılmasına, ilkin təməlin qoyulmasına rəğmən, Tehran və İrəvan arasında nə qədər təşəbbüs etdilərsə də, proses ölü nöqtədən tərpənmədi. Çətin mübarizədən qalib çıxan Azərbaycan Prezidenti açılışını etdiyi layihə ilə ölkəmizin müstəqillik təməlinə daha möhkəm bəndlər qoydu. Güclü siyasi iradə sərgiləyən Prezident İlham Əliyevin sayəsində bu layihə gerçəkləşdi”.
Vidadi ORDAHALLI
