Əli Əliyev: “Bütün siyasi partiyalar bunu etməlidirlər” Razi Nurullayev: “Mövcudluğu olmayan partiyalar, ümumiyyətlə, ləğv olunmalıdır”
Son günlər Azərbaycanda fəaliyyət göstərən siyasi partiyalarla bağlı yeni müzakirələrin olacağı haqda fikirlər yazılır. Hətta məsələyə YAP səviyyəsində də münasibət bildirilib.
Partiya funksionerlərinin verdiyi məlumata görə, dünyada siyasi partiyaların, o cümlədən ictimai təşkilatların maliyyələşdirilməsinin müxtəlif forma və vasitələri var: “Azərbaycanda siyasi partiyalar dövlət büdcəsindən, üzvlük haqlarından və vətəndaşların ianələri hesabına maliyyələşir. İstər dövlət büdcəsindən, istərsə də üzvlük haqlarından, vətəndaşların ianə və yardımlarından maliyyələşən siyasi partiyalar şəffaflığın təmin olunması üçün aidiyyəti orqanları, bu olmadıqda isə ictimaiyyəti məlumatlandırmalıdır. İndiyədək, yəni qanuna dəyişiklik edilənədək YAP-dan başqa heç bir siyasi partiya maliyyələşdirilməsi ilə bağlı ictimaiyyətə məlumat verməyib. Digər siyasi partiyalar da bunu etməyib. Soruşanda da təzyiq hesab edirdilər. Çünki onların maliyyələşməsində şəffaflıq yoxdur, orada qaranlıq məqamlar var. Bu səbəbdən patiyanın bir üzvünün çox yaxşı təminatı var, digəri isə yaşayışını çox çətinliklə təmin edir. Bu səbəbdən də “Siyasi partiyalar haqqında” Qanunda maliyyələşmənin şəffaflığının təmin edilməsi üçün MSK-ya hesabat verilməsi əksini tapıb”.
Gedən müzakirələrdən bu nəticəyə gəlinir ki, siyasi partiyalarla bağlı qanunvericilik çərçivəsində yeni təftiş başlaya bilər. Bunun nə kimi nəticələri ola bilər?
Vətəndaş və İnkişaf Partiyasənən sədri Əli Əliyevin sözlərinə görə, bu tələblərin sərtləşməsindən sonra bəzi siyasi partiyalar ləğv oluna bilər: “Biz artıq üçüncü il olacaq ki, həm vergi orqanlarına, həm də MSK-ya maliyyə hesabatları veririk. Bütün siyasi partiyalar bunu etməlidirlər. Biz qanunlar çərçivəsində fəaliyyət göstərdiyimiz üçün bunları edirik. Partiyaların nizamnamələrindən irəli gələn işlərə də nəzarət gücləndirilib. Ədliyyə Nazirliyi partiyaların nizamnamə ilə keçirdikləri qurultayları nəzarətdə saxlayır. Hakimiyyət qanun çərçivəsində bunları edir. Öz tərəfimizdən deyirəm ki, bu il mayın 28-də dördüncü qurultayımızı keçirdik. Ədliyyə Nazirliyi tərəfindən heç bir problem yaradılmadı, əksinə, sənədlərin tərtibatında yardım göstərilib. Qurultay sənədlərimiz də təsdiq olunub. Bu baxımdan, düşünmürəm ki, qarşıdan gələn seçkilərdə hər hansı bir maneələrlə üzləşək”.
Yeni yaradılan partiyalardan birinin sədri Razi Nurullayev isə hesab edir ki, partiyaları iki hissəyə bölməliyik, fəaliyyəti olan və neçə illərdir kağız üzərində mövcudluğunu saxlayan partiyalar: “Elə partiyalar var ki, fəaliyyətləri zəifdir. Amma elələri də var ki, ümumiyyətlə, fəaliyyət göstərmirlər. Mən də razıyam ki, statistika xatirinə partiyaların saxlanması düzgün deyil. Mövcudluğu olmayan partiyalar, ümumiyyətlə, ləğv olunmalıdır. Bizim partiyanın qeydiyyatı hələ həll edilməyib. Ola bilsin ki, qarşıdan gələn seçkilərdə partiyanın namizədi kimi iştirak edə bilmədik. Amma qanunvericiliyimizdə digər vasitələrlə iştirak etmək imkanlarımız var. Bir neçə siyasi partiya ilə bloklaşma ola bilər və bu halda həmin blokun namizədi olmaq mümkündür”.
Məhəmmədəli QƏRİBLİ
