Qabil Hüseynli: “Çünki belə konkret münasibət Ermənistanın məsuliyyətini artırmış olar”
Rusiya XİN-in rəsmi nümayəndəsi Mariya Zaxarova Moskvada keçirdiyi brifinqdə Azərbaycan və Ermənistan prezidentlərinin Cenevrə görüşünü şərh edərkən deyib ki, Rusiya XİN Bakının və Yerevanın təmas xəttində gərginliyin azaldılmasına yönəlmiş əlavə tədbirlər görməyə hazır olduğunu alqışlayır:
“Biz tərəflərin danışıqlar prosesini intensivləşdirməyə və təmas xəttində gərginliyin azaldılmasına yönəlmiş əlavə addımlar atmağa hazır olmasını alqışlayırıq”. M.Zaxarova qeyd edib ki, Moskva ATƏT-in Minsk Qrupunun həmsədrlərinin Azərbaycan və Ermənistan xarici işlər nazirlərinin növbəti görüşünə hazırlıqla bağlı səylərini dəstəkləyir. Həmin görüşdə “münaqişənin tənzimlənməsi ilə bağlı mühüm məsələlərin və vəziyyəti sabitləşdirmək üzrə mümkün tədbirlərin müzakirə edilməsi” nəzərdə tutulur.
Mariya Zaxarova daha sonra deyib: “Təəssüf ki, münaqişə zonasında vəziyyət mürəkkəb olaraq qalır. Biz Bakını və Yerevanı həll edilməmiş məsələlərə dair çıxış yolu axtarışına konstruktiv yanaşmağa çağırırıq”.
Göründüyü kimi, Rusiya rəsmisi təmas xəttində yaranmış vəziyyətə özünəməxsus tərzdə münasibət bildirib. Yəni konkret olaraq ünvan göstərilməyib. Münaqişə tərəflərinə ümumi müraciət edilib. Məsələyə daha dəqiq aydınlıq gətirmək üçün Minsk Qrupu həmsədr ölkələrinin dövlət başçılarının Cenevrə danışıqlarından sonra cəbhədəki vəziyyəti təhlil edən konkret münasibət açıqlamalarına ehtiyac varmı?
Politoloq Qabil Hüseynli qəzetimizə bildirdi ki, belə bir münasibətin açıqlanmasına zərurət yaranıb: “Cenevrə danışıqlarına Sarkisyanı zorla gətirdilər. Bilirsiniz ki, o, şərt qoymuşdu ki, dedikləri olmasa, danışıqlara qatılmayacaq. Təzyiqlərə tab gətirməyib danışıqlarda iştirak etdi. Onun sonrakı davranışlarına fikir verin. Danışıqlardan çıxan kimi, gedib erməni diasporu ilə görüşüb məsuliyyətsiz, danışıqlar prosesinə uyğun olmayan bəyanatlar verməyə başladı. Onun məsuliyyətsiz açıqlamalarında belə bir qənaət hasil oldu ki, zorla bura gətirilsəm də, danışıqlar formal xarakter daşıyır və mən heç bir sənədə imza atmamışam. Cenevrədəki danışıqlardan sonra bəyan edildi ki, yekunda iki istiqamət üzrə razılıq əldə olunub. Onlardan biri də atəşkəsə əməl olunmasına nəzarəti gücləndirmədir. Ancaq biz tamamilə fərqli bir mənzərənin şahidi olduq. Erməni silahlıları təmas xəttində daha da fəallaşdılar, atəşkəsi mütəmadi şəkildə pozmağa başladılar. Bütün bunların nə üçün edildiyi bizə bəllidir: diqqəti təhlükəsizliyin vacibliyinə yönəltmək və status-kvonu dəyişmədən saxlamaq. Təbii ki, bu vəziyyət Ermənistana sərf edir və atəşkəsin pozulmasında da başlıca təqsirkar odur. Ancaq Rusiyanın rəsmisi yenə tərəflər deyə müraciət edir. Hesab edirəm ki, həmsədr ölkələrin başçıları Cenevrə görüşündən sonrakı 10 gün ərzində kimin özünü necə aparması haqda konkret fikir bildirsələr yaxşı olar. Çünki belə konkret münasibət Ermənistanın məsuliyyətini artırmış olar. Tərəfləri nəyəsə çağırmaqla isə heç kimin üzərinə konkret məsuliyyət qoyulmur. Bu da sülh danışıqlarının ruhuna zidd olan vəziyyətin yaranmasına səbəb olur”.
Məhəmmədəli QƏRİBLİ
