Qardaş Türkiyənin PKK terrorçularına qarşı apardığı mübarizənin miqyasının genişlənməsi, separatçı yaraqlıların zərərsizləşdirilməsi istiqamətində digər dövlətlərlə əməkdaşlıq şəraitində atılan addımlar sözügedən təşkilatı çətin vəziyyətə salıb. Belə görünür ki, yaxın tezlikdə PKK-nın əsas qərargahı sayılan Qəndil dağında da qruplaşmanın effektiv şəkildə məhv edilməsi həyata keçriləcək. Bu isə PKK-nın qorunmaq üçün digər bölgələrə qaçış məsələsini meydana çıxarır. Belə bölgələr sırasında isə Ermənistan və Azərbaycanın işğal edilmiş əraziləri ön planda yer alır.
Ümumiyyətlə, real vəziyyət göstərir ki, hazırda PKK terrorçuları üçün ən təhlükəsiz ərazilər Ermənistan və işğal altındakı Azərbaycan torpaqlarıdır. Türkiyənin yeni əməliyyatları fonunda da PKK terrorçularının bu ərazilərə axınının daha da artması gözlənir. Məhz belə bir vaxtda bəlli olub ki, Şimali İraq Kürd Muxtariyyətinə qarşı İraq və İranla birgə hərəkət edən Türkiyə PKK-ya qarşı da bu ölkələrlə birlikdə əməliyyat keçirməyə hazırlaşır. Xüsusilə Ankara və Tehran arasında PKK və terror təşkilatının İran qolu olan PJAK-ı məhv etmə əməliyyatı müzakirə edilir. “Yeni Şəfəq” qəzetinin əldə etdiyi məlumata görə, Türkiyə Silahlı Qüvvələri İranın Baş Qərargahı ilə birgə PKK-nın əsas yuvası olan Qəndildə əməliyyat keçirmək üçün hazırlığa başlayıb. Qeyd olunur ki, əslində, 1990-cı ildən başlayaraq, Türkiyə ordusu sərhəd xaricində PKK-ya qarşı əməliyyatlar keçirir. Lakin bir çox hallarda terror qruplaşması qaçaraq İran tərəfinə keçdiyi üçün ciddi zərbə endirə bilmir. Çünki PKK-nın əsas yuvası olan Qəndil dağının yarısı İran sərhədləri içindədir. PKK terrorçuları türk əsgərindən qaçaraq, İran Qəndili üzərindən Urmiyaya və Şeydan düşərgəsinə keçir, oradan da yenidən Şəmdinli Yüksekova xəttindəki bölgələrə hücum edirdi. İndiyə qədər Ankara dəfələrlə xəbərdarlıq etsə də, Tehran PKK-ya qarşı ciddi addım atmırdı. Lakin Məsud Bərzaninin keçirdiyi referendum bölgədə bütün kartları qarışdırdı və hazırda PKK Türkiyə qədər İran üçün də ciddi təhdiddir. Hazırda Ankara Qəndili təmizləmək üçün Tehrandan ilk olaraq iki şey istəyir: terrorçuların qaçmaması üçün sərhədlər bağlansın; terrorçu liderlər İranda gizlənə bilməsin və onlar həbs edilərək Türkiyəyə verilsin. Bu istəklər Tehran tərəfindən qəbul ediləcəyi təqdirdə Qəndil artıq PKK üçün “təhlükəsiz bölgə” olmayacaq. Terror qruplaşmasını tamamilə məhv etmək üçün başlanacaq əməliyyat həm qurudan, həm də havadan həyata keçiriləcək. Əməliyyat zamanı İran tərəfinin sərhədləri bağlaması, Türkiyə ilə məlumat mübadiləsi aparması, artilleriya və lazım olarsa, quru qoşunları ilə dəstək verməsi gözlənir. İraq ordusu da əməliyyata dəstək verəcək. Qəndildən qaça biləcək terrorçuların İraqın daxili bölgələrinə keçə bilməsinin qarşısı alınacaq. Məlumata görə, PKK-nın yuva qurduğu Mahmur və Sincar bölgələrində də hərbi əməliyyatlara hazırlıq görülür.
O da bildirilir ki, İran və Türkiyə bu məsələdə Rusiyadan da yardım almağı düşünür. Elə İraq da kürd yaraqlılarına qarşı Rusiyadan yardım gözlədiyini bəyan edir. İraq Nümayəndələr Palatasının Beynəlxalq Əlaqələr Komitəsinin rəhbəri Əbdülbari Məhəmməd Zəbari bununla bağlı bildirir: “İraqda kiçikhəcmli silahlı atışmalar davam edir. Hər kəs siyasi müzakirələr yolu ilə mövcud problemlərin həll ediləcəyinə inanır. Rusiyaya bu mənada etibar edirik. Rəsmi Moskvanın ərazi bütövlüyümüzün bərpasında səylərini əsirgəməyəcəyinə inanırıq”.
Bütün bunlar isə PKK-nın yaxın tezlikdə əhəmiyyətli dərəcədə sıxışdırılacağını göstərir. Qeyd olunduğu kimi, terrorçular bu vəziyyətdə təhlükəsizlikləri üçün ermənilərlə işbirliklərini genişləndirəcək. Artıq bəllidir ki, PKK təşkilatının Ermənistanda iki dərnəyi və satın aldığı 2 mərtəbəli qərargahı var. Özü də PKK-ya aid mülklər Ermənistan Milli Təhlükəsizlik Xidmətinin binasının yanında yerləşir. Bu evlərdə terrorçular müalicə olunur. Beynəlxalq Əsilsiz Erməni İddiaları ilə Mübarizə Dərnəyinin (ASİMDER) rəhbəri Göksel Gülbey də elə bu yaxınlarda belə bir açıqlama ilə çıxış etmişdi ki, Ermənistanla PKK arasında gizli anlaşma var: “Bu anlaşmaya görə, Ermənistan PKK-ya hər ay müəyyən sayda viza verir. Terrorçular ayrılan viza sayına görə pasportlarını Ermənistanın Parisdəki səfirliyinə göndərir və oradan istədikləri ölkəyə gedirlər. Bundan başqa, Ermənistan PKK-ya hər cür yardım göstərir. Terrorçular həm İrəvan yaxınlığındakı düşərgələrdə, həm də Azərbaycanın işğal olunmuş Dağlıq Qarabağ bölgəsində təlim keçirlər”.
İndilikdə isə PKK-nın daha çox Ermənistana sığınması ilə əlaqədar olaraq onların Qarabağa gəliş saylarının artması da gözlənir. Terroru dövlət siyasəti səviyyəsinə qaldıran Ermənistanın isə PKK-çılar üçün hər cür şərait yaradacağı şübhə doğurmur.
Nahid SALAYEV
