Elşən Həsənov: “Müxalifətin tədbirinin keçirildiyi yerdə, insanların sayından asılı olmayaraq, effekti daha böyük ola bilərdi...”
DTX-nin İctimai əlaqələr şöbəsindən verilən xəbərə görə, Azərbaycan Respublikasının hüdudlarından kənarda fəaliyyət göstərən dini ekstremist terror təşkilatının tabeliyini qəbul etmiş bir qrup şəxs Bakı şəhəri, Qaradağ rayonunun Lökbatan qəsəbəsində “Abdullah” ləqəbli Azərbaycan Respublikasının vətəndaşı Ələkbərov Bəxtiyar Məmmədsadıq oğlunun yaşadığı evdə toplaşaraq sonuncunu qeyd olunan cinayətkar birliyin tərkibində özlərindən ibarət dəstənin “əmiri” seçiblər.
Həmin şəxslər ardıcıl terror aktları törətmək məqsədilə əldə etdikləri maddə və ləvazimatlarla kustar üsulla partlayıcı-yandırıcı predmetlər hazırlayaraq, 2017-ci il oktyabrın 22-də Bakı şəhəri, Qaradağ rayonunun Lökbatan qəsəbəsi ərazisində seçdikləri məkanda sınaqdan keçiriblər.
Əməliyyat-texniki yolla ətraflı qeydə alınmış həmin şəxslərin görüşlərində onlar ölkədə sabitliyi və təhlükəsizliyi pozmaq, ictimai-siyasi qarışıqlıq yaratmaq məqsədilə 2017-ci il oktyabrın 28-də Bakı şəhərində keçiriləcək mitinqdə terror aktı törətmək barədə razılığa gəliblər.
Dövlət Təhlükəsizliyi Xidmətində başlanmış cinayət işi üzrə barələrində təqsirləndirilən şəxs qismində cəlbetmə haqqında qərar çıxarılan şəxslərin saxlanması üçün 2017-ci il oktyabrın 25-də kompleks əməliyyat tədbirləri keçirilib. Əməliyyat zamanı cinayətkar dəstənin üzvləri - Azərbaycan Respublikasının vətəndaşları Ələkbərov Bəxtiyar Məmmədsadıq oğlu, “Əbu-Yunis” ləqəbi ilə Məsimli Anar Mehman oğlu, “Əbu-Vakkaz” ləqəbli Hüseynli Cavid Hüseyn oğlu odlu silahlardan atəş açmaqla silahlı müqavimət göstərərkən xüsusi əməliyyat qrupu tərəfindən qanunvericiliklə müəyyən edilmiş qaydada cavab tədbiri olaraq xidməti silahdan istifadə olunmaqla məhv ediliblər. Hazırda istintaq-əməliyyat tədbirləri davam etdirilir.
Yayılan rəsmi məlumatda diqqətçəkən məqamlardan biri terror aktını keçirmək üçün planlaşdırılan məkandır. Müxalifətin mitinq keçirəcəyi icazəli aksiyanı terrorçular hansı məqsədlə hədəf seçiblər?
Təhlükəsizlik məsələləri üzrə ekspert Elşən Həsənov qəzetimizə açıqlamasında bildirdi ki, DTX-nın keçirdiyi əməliyyat barədə o da, digərləri kimi, mətbuat səhifələrindən tanışdır: “Milli Şuranın mitinqi zamanı partlayış törətmək istəyən terrorçuların zərərsizləşdirilməsi, əlbəttə ki, vaxtında görülmüş tədbirlərin nəticəsidir. Terrorçuların niyə məhz mitinq zamanı dinc insanları terrora məruz qoymaq istəkləri başadüşüləndir. O mənada ki, terrorun həyata keçiriləcəyi an ölkədə ciddi qarşıdurma və xaos yarana bilərdi ki, bu da nəticəsi bəlli olmayan vəziyyətə gətirib çıxarardı. Azərbaycanda xaotik vəziyyət yaratmaq, vətəndaşları qorxu altında saxlamaq və həm də hakimiyyət dəyişikliyinə nail olmaq Azərbaycanın düşmənlərinin bir nömrəli istəyidir.
Mən belə məsələlərdə vətəndaşlara da ehtiyatlı olmağı, bu cür suallar, şübhəli əməllər meydana çıxdığı zaman müvafiq orqanlara məlumat verməyi tövsiyə edirəm. Sual oluna bilər ki, müxalifətin mitinqləri onsuz da böyük izdihamla keçirilmir, onda niyə daha çox insan toplaşan məkanlar hədəf seçilməyib?
Görürsünüz ki, Azərbaycanın hansısa məsələlərdə güzəştə getməyib prinsipial mövqe tutması xaricdə fəaliyyət göstərən bəzi dairələrin ürəyincə deyil.
Müxalifətin tədbirinin keçirildiyi yerdə, insanların sayından asılı olmayaraq, effekti daha böyük ola bilərdi. Çünki bu, avtomatik olaraq, ölkədə siyasi kataklizmlərin yaranmasına səbəb olardı”.
Məhəmmədəli QƏRİBLİ
