Azərbaycanın Belarusdan yeni reaktiv yaylım atəşi sistemləri alması, gözlənildiyi kimi, Ermənistanda böyük narahatlığa yol açıb. Erməni mediası yazır ki, bu fakt Azərbaycanın Ermənistanla müqayisədə Belarus üçün daha vacib tərəfdaş olduğunu aydın şəkildə meydana qoyur.
"İravnuk" qəzeti vurğulayır ki, Ermənistan Belarusla birlikdə Kollektiv Təhlükəsizlik Müqaviləsi Təşkilatında, Avrasiya İqtisadi İttifaqında təmsil olunsa da, Belarus, İrəvanın bütün narazılıqlarına rəğmən, Bakı ilə əməkdaşlığını daha da genişləndirir: "Elə Qarabağ məsələsində də Belarus Azərbaycanın mövqeyini dəstəkləyir. Bu azmış kimi, Minsk Bakıya ən yeni müasir silahlar da satır. Ermənistan isə, mütəffiq olmasına baxmayaraq, Belarusdan belə silahlar almaq imkanlarından məhrumdur. Bu vəziyyət bir daha Belarus üçün kimin əhəmiyyətli olduğunu aydın surətdə meydana qoyur".
Xatırladaq ki, elə bu yaxınlarda Azərbaycan Belarusdan 170 milyon dollar məbləğində silah alıb. Stokholm Dünya Problemlərinin Tədqiqi Beynəlxalq İnstitutu (SIPRI) faktı təsdiqləyib. İnstitutun məlumatına görə, reaktiv yaylım atəşi sistemi "Polonez"in alınması ilə bağlı Belarusla Azərbaycan arasında sövdələşmə də baş tutub. İnformasiyanı "Belarus xəbərləri" nəşri də təsdiq edib. Bildirilir ki, Azərbaycan tərəfi reaktiv sistemin ixracı üçün avans ödəyib. Qeyd edək ki, proses Azərbaycan müdafiə naziri, general-polkovnik Zakir Həsənovun Belarusa səfəri zamanı rellaşıb. Bir neçə gün əvvəl baş tutan səfər zamanı nazir bu ölkənin hərbi-sənaye kompleksinin istehsal etdiyi döyüş texnikası və hərbi təyinatlı digər məhsullarla tanış olub. Bura Ermənistanın çox ehtiyat etdiyi “Polonez” reaktiv yaylım atəşi sistemləri də daxildir. Ekspertlr isə bildirir ki, bununla Azərbaycan Ermənistana növbəti zərbəni vurmağı bacarıb. Digər tərəfdən faktdır ki, Bakı-Minsk hərbi əməkdaşlığının hazırkı səviyyəsi Azərbaycanın öz siyasi hədəflərinə çatdığının mühüm göstəricisidir. Təhlilçilər bu əməkdaşlığın “İsgəndər” raket sistemlərinə rəqib sayılacaq “Polonez” reaktiv yaylım atəş sistemlərinin alınması ilə daha üst səviyyəyə qalxdığını da xüsusi olaraq vurğulayır. Bir məqamı da qeyd edək ki, Bakının əsas məqsədi, nəinki Belarusla raket texnikası sahəsində əməkdaşlıq etmək, lazım gələrsə, bu istehsal sahəsini Azərbaycana da daşımaqdır. Sözügedən sistemlər öz səmərəliliyinə görə dörd istiqamətə atəş açmaq və bununla da havada daha çox raket texnikasını zərərsizləşdirmək imkanına malikdir. Minskin Azərbaycanın hərbi sənaye kompleksinin yaradılmasına bu qədər yaxından yardımı ölkəmizə verilən dəyərdən xəbər verir. Azərbaycanın Belarusla qarşılıqlı faydalı hərbi ticarət əlaqələri hər iki tərəf üçün böyük səmərə vəd edir. Ən əsası da odur ki, yeni əməkdaşlıq sayəsində Azərbaycan Rusiyanın Ermənistana verdiyi “İsgəndər“ raketlərinə uğurlu alternativ əldə edib. İkincisi, istisna deyil ki, heç də uzaq olmayan müddətdə Azərbaycan raket texnikası istehsalı sahəsində elə Belarusla birgə müəssisələr yarada bilər. Bütün bunlar isə müəyyən dairələri, o cümlədən Ermənistanı çox ciddi şəkildə narahat edir.
Onu da bildirək ki, Belarusun ən yeni “Polonez” reaktiv yaylım atəşi sistemləri dördoxlu MZKT-7930 “Astroloq” şassisi üzərində yerləşdirilmiş 8 kontenyerdən ibarət buraxılış qurğusudur. “Polonez” sistemləri 301 millimetr kalibrli, 200 kilometr mənzilli yüksək dəqiqlikli raketlərlə təchiz olunub. Raketlərin hədəfdən yayınması hətta 1 metrdən də azdır. “Polonez” sistemləri Çinin CALT şirkətinin istehsalı olan A200 raketləri ilə təchiz edilib. Bu raketlərin uzunluğu 7.65 metrdir, üç növ döyüş başlığı ilə təchiz edilə bilər, start kütləsi 750 kilodur. Sistemin daha bir özəlliyi budur ki, 8 ayrı hədəfə cəmi 50 saniyə ərzində zərbə endirə bilir. Başqa sözlə, “Polonez” döyüş əməliyyatları zamanı həm düşmənin əsas cəmləşmə rayonlarına, iri hərbi infrastrukturuna, döyüş texnikasına kütləvi zərbələr endirməyə imkan verən reaktiv yaylım atəşi sistemidir, eyni zamanda kiçik hədəflərə dəqiq zərbələr endirə bilən silahdır. Sistemin atəşə hazırlığı 10 dəqiqə çəkir, “Polonez”in konteynerlərinin raketlərə təzədən doldurulması isə 20 dəqiqə vaxt aparır. Bunun üçün sistemin şassisi üzərində xüsusi kran quraşdırılıb.
Azərbaycanın “Polonez”lərə maraq göstərdiyi haqda məlumatlar hələ bu silahın işlənib hazırlanma mərhələsində yayılmışdı. İndi isə Bakı bu istiqamətdə istəyini reallaşdıra bilib. Artıq faktdır ki, Azərbaycan “Polonez” sistemlərini əldə etməklə Ermənistanın Rusiyadan aldığı “İsgəndər”lərə ciddi alternativ əldə edib. Belə vəziyyət isə ordumuzun döyüş potensialını əhəmiyyətli dərəcədə artırıb. Elə erməni tərəfini də qorxuya salan əsas məqam budur. Düşmən hərb müstəvisində gedərək Azərbaycandan daha böyük ölçüdə geri qaldığını aydın şəkildə görür.
Nahid SALAYEV
