İlqar Hüseynli: “Etik davranış kodeksi üzərində dəfələrlə yenilənmə aparılıb”
Etik davranış qaydalarını pozan millət vəkillərinin qanunvericiliyin tələbinə uyğun olaraq cəzalandırılması Milli Məclisdə müzakirə olunacaq.
Məlum olduğu kimi, Prezident İlham Əliyev “Azərbaycan Respublikası Milli Məclis deputatının etik davranış qaydaları haqqında” Azərbaycan Respublikasının 2017-ci il 30 iyun tarixli, 766 VQ nömrəli Qanununun tətbiqi barədə Sərəncam imzalayıb. Sərəncamla Nazirlər Kabineti Azərbaycan Respublikası qanunlarının və Azərbaycan Respublikası Prezidentinin aktlarının “Azərbaycan Respublikası Milli Məclisi deputatının etik davranış qaydaları haqqında” Azərbaycan Respublikasının Qanununa uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etməlidir.
Sərəncama əsasən, Ədliyyə Nazirliyi mərkəzi icra hakimiyyəti orqanlarının normativ-hüquqi aktlarının və normativ xarakterli aktların “Azərbaycan Respublikası Milli Məclisi deputatının etik davranış qaydaları haqqında” Azərbaycan Respublikasının Qanununa uyğunlaşdırılmasını təmin edib Nazirlər Kabinetinə məlumat verməlidir.
Milli Məclisin iclaslarında deputatların etik davranış qaydalarının müzakirəsi zamanı ortaq məxrəcə gəlinməməsinin səbəbi məlum olub. Milli Məclisdən media orqanlarına verilən məlumata görə, buna səbəb deputat mandatının geri alınması qaydasının tənzimlənməsi istiqamətində bir sıra məsələlərdə ortaq məxrəcə gəlinməməsidir.
Bildirilib ki, ziddiyyətlilik yaranan məsələlərdən biri deputatın cəzalanma qaydasıdır. Konstitusiyaya görə, deputat etik davranış qaydalarını pozduğu halda mandatdan məhrum edilə bilər. Deputatın mandatdan məhrum edilməsi işinin Ali Məhkəmə, Konstitusiya Məhkəməsi, Milli Məclisin İntizam Komissiyasında baxılması istiqamətində çoxvariantlılıq var. Layihə ilə bağlı müzakirələr parlamentin növbəti sessiyasında aparılacaq.
Ekspertlər də etik davranış qaydalarını pozan millət vəkillərinin cəzalandırılmasının vacib olduğunu bildirirlər.
Sosial sahə üzrə ekspert İlqar Hüseynli bizimlə söhbətində bildirdi ki, nəinki parlament üzvləri arasında, o cümlədən ciddi birliklərin özlərində belə davranış kodeksi hazırlanır: “Avropa Şurasının Parlament Assambleyasında da etik davranış kodeksi sənədi var. Davranış qaydalarının tələbini kəskin şəkildə pozan hər bir kəs haqqında müəyyən cəza tədbirləri nəzərdə tutulur. Etik davranış kodeksi üzərində dəfələrlə yenilənmə aparılıb. Ancaq bəzi millət vəkillərinin etik davranış kodeksinə tam şəkildə əməl etməməsi hər kəsə bəllidir. Tək Azərbaycan deputatları deyil, xarici ölkələrin millət vəkilləri də, demək olar ki, etik davranış qaydalarına ciddi şəkildə riayət etmirlər. Biz dəfələrlə xarici ölkələrin parlament üzvlərinin davranış qaydalarını pozması halına rast gəlmişik. Etiraf edək ki, Azərbaycan deputatları arasında dava-dalaş halı yaşanmayıb. Xatırladım ki, illər öncə millət vəkilləri arasında analoji hal yaşanmışdı. Davranış qaydalarını pozan deputatın mandatı ləğv olunmuşdu. Etik davranış qaydalarını pozan millət vəkilləri cəzalandırılmalıdır”.
Günel CƏLİLOVA
