Məhəmməd Əsədullazadə: “Qəti şəkildə bildirilməlidir ki, Ermənistan konstruktiv danışıqların aparılmasında və münaqişənin həllində maraqlı deyil”
Məlum olduğu kimi, uzun fasilədən sonra Azərbaycan Prezidenti İlham Əliyevlə Ermənistan prezidenti Serj Sarkisyan arasında oktyabrın 16-da Cenevredə danışıqlar baş tutub. Görüşdən sonra açıqlanan bəyanatda danışıqların konstruktiv keçdiyi bildirilib.
Tərəflər razılaşdırılmış məqamlardan əlavə, hələlik heç bir bəyanatın səsləndirilməməsinə razılıq versə də, görüşdən həmən sonra Sarkisyan anlaşmanı pozub. O, erməni diaspor təmsilçiləri qarşısında çıxış edərkən Dağlıq Qarabağı müstəqil və Azərbaycan hüdudlarından kənarda gördüyünü deyib. Daha sonra isə xarici işlər naziri Edvard Nalbandyan bənzər təxribatçı açıqlama ilə çıxış edib. Bu onu göstərir ki, rəsmi İrəvan yenidən danışıqlar prosesinin pozulmasına çalışır. Azərbaycan isə sülh prosesinə sadiqliyini nümayiş etdirir. Artıq neçənci dəfədir Ermənistanın hazırkı rəhbərliyi danışıqları pozur.
Rəsmi Bakı substantiv danışıqların aparılmasının tərəfdarıdır. Bu, təmasların davamlılıqla getməsini, ardıcıllıq prinsipinə söykənməyi, nəhayət, cari və əsaslı gündəliyin işlənməsini nəzərdə tutur. Belə metodika olmayacaqsa, onda proses nəinki illərlə, hətta onilliklərlə davam edə bilər və nəticədən danışmaq ümumiyyətlə yersiz olar. Sarkisyanın İsveçrə erməni icması qarşısında açıqladığı mövqe bir daha təsdiqlədi ki, rəsmi İrəvan Dağlıq Qarabağ münaqişəsinin həllində maraqlı deyil.
O da məlumdur ki, danışıqlarda vasitəçilik missiyasını ATƏT-in Minsk Qrupu həyata keçirir. Ermənistanın danışıqları pozması bu qurumun, xüsusən də həmsədr dövlətlərin nüfuzuna xələl gətirir. Ermənistanın sərgilədiyi qərəzli mövqe danışıqları pozmaqla yanaşı, xalqların sülhə hazırlanması işini də baltalayır. Bu baxımdan, Azərbaycanın rəsmi olaraq ATƏT-in Minsk Qrupu həmsədr ölkələrinin dövlət başçılarına müraciət etməsinə ekspertlər necə yanaşır? Yəni Ermənistanın danışıqlarda sərgilədiyi pozuculuq mövqeyi ilə bağlı ABŞ, Rusiya və Fransa prezidentlərinə müraciət etmək məqsədəuyğundurmu?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə belə bir müraciətin edilməsinə müsbət prizmadan yanaşır: “Cenevrə danışıqlarından sonra Ermənistan prezidenti Serj Sarkisyanın Qarabağla bağlı danışıqların ruhuna zidd açıqlamaları, demək olar ki, aparılan və bərpa olunan müzakirələrə zərbə oldu. Hesab edirəm ki, Sarkisyanın mövcud açıqlamasından sonra cəbhədə erməni təxribatının artması bunun davamıdır. Göründüyü kimi, rəsmi İrəvan danışıqlara hazır olmadığını bir daha sübut edir. Təbii ki, Azərbaycanın Ermənistanın bu siyasətinə qarşı adekvat cavabları olacaq. Cəbhədə erməni təxribatının genişlənməsini də istisna etmirəm. Çünki Sarkisyan gələn il öz kürsüsünü qorumaq üçün xalqı Qarabağda baş verə biləcək növbəti təxribatlara hazırlayır. Azərbaycan Ermənistana qarşı bütün tədbirləri görməlidir. Azərbaycan Ermənistanın qeyri-konstruktiv mövqeyini Minsk Qrupunun həmsədrləri olan dövlətlərin prezidentlərinə rəsmən bildirməlidir. Bununla bağlı rəsmi müraciət etməsi lazımdır. Qəti şəkildə sözügedən ölkələrin prezidentlərinə bildirilməlidir ki, Ermənistan konstruktiv danışıqların aparılmasında və münaqişənin həllində maraqlı deyil. ABŞ, Rusiya və Fransa prezidentləri münaqişənin həlli ilə bağlı konkret ortaq məxrəc ortaya qoymalıdırlar. Ancaq ABŞ və Rusiya arasında ziddiyyətlər də münaqişədə əsas problem kimi özünü göstərəcək. Hazırda ABŞ və Rusiya ayrı-ayrı həll planlarına malikdir. ABŞ mərhələli, Rusiya isə paket həllini dəstəkləyir. Azərbaycan Ermənistanın imitasiya siyasətinə qarşı mütləq öz adekvat siyasətini ortaya qoyacaq. Bu, aprel toqquşmalarını təkrarlaya bilər”.
Vidadi ORDAHALLI
