Novruz Feyruzov: “O üzdən, Ermənistan Azərbaycan Ordusunda belə raket sistemlərinin olmasından çox narahatdır”
Prezidentlərin Cenevrə danışıqlarından dərhal sonra təmas xəttində gərginliyin artan xətlə gücləndiyi müşahidə olunur. Əvvəlcə erməni tərəfi hərbi hissələrdə baş alıb gedən “bespredel” nəticəsində öldürülmüş əsgərlərinə görə Azərbaycan tərəfini günahlandırmağa çalışıb. Bakını prezidentlərin təmas xəttində sakitliyə riayət olunmasına dair əldə etdikləri razılaşmanı pozmaqda günahlandırıb. Hansı ki, çox keçmədən Ermənistan tərəfi özü də etiraf edib ki, ötən həftə təmas xəttində iki erməni əsgərini onların xidmət yoldaşları güllələyib. Bu insidentə görə iki erməni hərbçisi həbs olunub.
Bununla belə, düşmən təmas xəttindəki vəziyyəti gərginləşdirmək xəttini götürərək ötən bazar günü Azərbaycan Ordusunun mövqelərini atəşə tutub. Nəticədə bir əsgərimiz şəhid olub. Bu azmış kimi, erməni tərəfi, yeri gəldi-gəlmədi, Azərbaycanın “Spayk” raketlərindən istifadə etdiyini bəyan edir. Guya Azərbaycan Ordusu oktyabrın 22-də təmas xəttinin Ağdərə-Madagis istiqamətində artilleriya qurğularından və “Spayk” tank əleyhinə raketindən istifadə edib. İddia olunur ki, erməni mövqelərinə 5 minaatan mərmisi və 1 “Spayk” raketi atılıb.
Azərbaycan Müdafiə Nazirliyi isə bunun iftira olduğunu açıqlayıb. Nazirlik bəyan edib ki, qorxu və səksəkə içində olan ermənilərin gözünə hər yerdə müasir Azərbaycan silahları, o cümlədən tank əleyhinə idarə olunan “Spayk” raket kompleksləri görünür.
Bütün hallarda, sözügedən raket kompleksləri hansı texniki göstəricilərə malikdr və üstünlükləri nədədir?
Sözügedən məsələyə aydınlıq gətirən Qarabağ müharibəsi iştirakçısı Novruz Feyruzovun sözlərinə görə, “Spayk” raket kompleksləri tank əleyhinə ən yaxşı silah hesab olunur: “Məsələ ondadır ki, bu raketlər hədəfi son dərəcə dəqiq vurmaq imkanına malikdir. “Spayk” raketini İsrailin “Rafael” şirkəti istehsal edir. 1981-ci ildə İsrail ordusunun arsenalına daxil edilsə də, uzun müddət məxfi saxlanıb. Bu raketin mövcudluğu yalnız 2010-cu ildə bəyan edilib. Hazırda dünyanın 20-yə yaxın ölkəsində bu raket kompleksindən var. “Spayk” tank əleyhinə raket kompleksi Azərbaycan Ordusunun arsenalına bir neçə il öncə daxil edilib. Belə ki, 2016-cı ilin aprel döyüşləri zamanı düşmənin xeyli tank və texnikasının məhv edilməsində “Spayk” raket kompleksinin əvəzsiz rolu olub. Həmçinin, bu il Ermənistan silahlı qüvvələrinin növbəti təxribatının qarışısını alarkən ordumuz “Spayk” tank əleyhinə raket kompleksi ilə Ermənistanın “OSA” zenit-raket kompleksi və nəqliyyat-doldurucu maşınını sıradan çıxarıb. Nəticədə düşmən qüvvələrinin şəxsi heyəti məhv edilib. “Spayk” tank əleyhinə idarə olunan raketin bir neçə növü mövcuddur. Bunlar hər biri özünəməxsus xüsusiyyətə malikdir. Çəkisi 75 kiloqram olan raket kompleksinin uçuş məsafəsi 25 kilometrdir. Hədəfi 95 faiz dəqiqliklə vurur. “Spayk” raketlərinin elə növü var ki, uzaq məsafədəki hədəfləri vurmaq üçün nəzərdə tutulub. Həmin raketlər 4000 metrə qədər olan hədəfləri məhv edir. Eləsi var ki, ən yaxın məsafələri məhv etmək üçün nəzərdə tutulub. Müşahidələr göstərir ki, dünyada tank əleyhinə ən yaxşı raket hesab olunur. O üzdən, Ermənistan Azərbaycan Ordusunda belə raket sistemlərinin olmasından çox narahatdır”.
Vidadi ORDAHALLI
