Fikrət Sadıqov: “Çünki elə məsələlər var ki, buna hansısa formada çevik reaksiya verilməlidir”
Ukrayna Ali Radasını təmsil edən bir neçə deputatın Avropa Şurasının Parlament Assambleyasında (AŞPA) Azərbaycan əleyhinə qətnaməyə səs verməsinə Ukrayna Baş nazirinin birinci müavini, iqtisadi inkişaf və ticarət naziri Stepan Kubiv münasibət bildirib.
Kubiv deyib ki, bir qrup şəxsin AŞPA-da Azərbaycana qarşı səs verməsi rəsmi Kiyevin mövqeyini əks etdirmir: “Qətnamələrin lehinə Ukraynanın 12 nümayəndəsindən yalnız 5-i səs verib. Səsvermədə iştirak edən deputatlardan heç biri P.Poroşenko blokuna daxil deyil. Onlar Ali Radada təmsil etdikləri siyasi qüvvələrin fikirlərini ifadə edirlər”.
Nazir qeyd edib ki, bu addım Poroşenkonun siyasətinə zərbə vurmaq məqsədi ilə atılıb: “Təxribatçı hərəkətlərin məqsədi tam aydındır. Məqsəd Ukraynanın Avropaya inteqrasiya kursunun təmin edilməsi və bunun dost Azərbaycanla qarşılıqlı strateji əməkdaşlığa mənfi təsir göstərməməsi kursu yeridən prezident Poroşenkonun siyasətinə zərər vurmaqdır”.
Kubiv, həmçinin, qeyd edib ki, Ukrayna və Azərbaycanın əməkdaşlığı bütün sahələrdə fəal genişlənmə və aktivləşmə mərhələsindədir.
Bütün bunlar öz yerində. Ancaq məsələ ondadır ki, bu xoşagəlməz halın baş verməsinə Ukrayna prezidenti Poroşenko hansısa formada münasibət bildirməyib. Biz başa düşürük ki, Ukrayna Avropaya inteqrasiya yolunu tutub, ölkədə demokratik islahatlar həyata keçirilir, prezident deputatların fikirlərinə müdaxilə edə bilməz. Ancaq onu da nəzərə almaq lazımdır ki, Azərbaycan-Ukrayna münasibətləri yüksələn xətt üzrə inkişaf edir. Hər iki dövlət separatizmdən əziyyət çəkir. O baxımdan Poroşenkonun hansısa formada buna münasibət bildirməməsi təəssüf doğurur.
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Poroşenkonun buna münasibət bildirməməsi təəssüf doğurur: “Rəsmi Kiyev dövlət başçısı başda olmaqla bu məsələyə öz münasibətin bildirsəydi, bu, yerinə düşərdi və vəziyyətə uyğun bəyanat səslənərdi. Ancaq təəssüflər olsun ki, prezident bunu etmədi. Buna rəğmən, Ukrayna Baş nazirinin birinci müavini Bakıda olarkən, hər halda, rəsmi mövqeyini bildirdi. Bəyan etdi ki, bu, rəsmi Kiyevin mövqeyi deyil. Hətta səsvermədə Ukraynanı təmsil edən deputatların hamısı Azərbaycanın əleyhinə səs verməyib. Çünki Ukraynadan olan 12 deputatdan 5-i Azərbaycan əleyhinə səs verib. Onlar da Poroşenkonun əleyhinə olan deputatlardır. Əlbəttə, biz Ukrayna deputatlarının belə bir hərəkətindən təəssüflənirik. Görünür, onların Avropaya yaxın olmaq, Avropa İttifaqına daxil olmaq niyyəti o qədər güclüdür ki, bunlar Azərbaycan-Ukrayna münasibətlərini arxa plana çəkirlər. Başa düşmürlər ki, bu onlar üçün daha xeyirli və faydalı bir istiqamətdir. Yaxşı bir müsbət amil ondan ibarətdir ki, bu deputatlar, hər halda, Azərbaycan-Ukrayna münasibətlərini həll etmirlər. Onların bu hərəkətləri münasibətlərə müəyyən qədər xələl gətirsə də, hər halda, Azərbaycan-Ukrayna münasibətləri inkişafdadır, normal, sivil səviyyədədir. Bu kimi deputatların neqativ hərəkətləri iki ölkə münasibətlərinə xələl gətirə bilməz. Buna rəğmən, hər halda, cənab Poroşenko məsələyə adekvat reaksiya versəydi, bu daha məqsədəuyğun olardı. Çünki elə məsələlər var ki, buna hansısa formada çevik reaksiya verilməlidir. Biz imkan verməməliyik ki, belə xoşagəlməz hallar baş versin. O üzdən, qarşı tərəf belə məsələlərdə son dərəcə diqqətli olmalıdır”.
Vidadi ORDAHALLI
