Elşən Mustafayev: “Bunun üçün onların təmsil olunduqları ölkə mövqeyini açıq ifadə etməlidir”
Məlumdur ki, Dağlıq Qarabağ münaqişəsinin nizama salınması ilə ən aktiv məşğul olan təsisat ATƏT-in Minsk Qrupudur. Bu qrupa üç həmsədri ölkə daxildir - Rusiya, Fransa və ABŞ. Hər üç ölkə öz diplomat nümayəndələrini qrupa həmsədr təyin edir.
Minsk Qrupunun fəaliyyəti səmərəsiz olduğu üçün, ölkələr bir neçə həmsədr dəyişməyə məcbur olublar. Bu müddət ərzində qəribə hal müşahidə edilib. Minsk Qrupunun həmsədrləri olan diplomatlar postlarda olduqları vaxt yalnız növbətçi, ütülü bəyanatlar verməklə məşğul olublar. Vəzifədən çıxandan sonra isə prosesin niyə dalana dirəndiyi, hansı addımların atılmasının zəruriliyi haqda açıqlamalar verməyə başlayıblar. Biz bunu eks həmsədrlər: Kazimirovun, Keri Kovannanın, Metyu Baryzanın, Hoqlandın və nəhayət, Uorlikin timsalında görmüşük. Buradan maraqlı sual yaranır: eks həmsədrlər bu cür aktivliyi, açıq danışmağı niyə postda olduqları vaxt etməyiblər?
Politoloq Elşən Mustafayev qəzetimizə bildirdi ki, bunun bir çox səbəbləri var: “Mən, ümumiyyətlə, ATƏT-in Minsk Qrupunun indiyə qədər olan fəaliyyətini səmərəsiz sayıram. Nəticə göz qabağındadır. Həmsədrlərin davranışına gəldikdə isə, bunun cavabı sadədir. Postda olan vaxt onların bütün bəyanatları təmsil olunduqları ölkənin mövqeyi kimi qiymətləndirilir. Bu səbəbdən də diplomatlar həmin vaxt daha çox ümumi bəyanatlar verməklə kifayətlənirlər. Daha doğrusu, öz ölkələrinin mövqeyini ifadə edirlər. Postu tərk etdikdən sonra isə onlar müstəqil adam kimi, yalnız öz adlarından danışırlar. Bir növ, məsuliyyətləri azalmış olur. Bir fakta diqqət edək, həmin diplomatlar həmsədrlikdən başqa bir diplomatik posta keçəndə də səmimi olmurlar. Yəni Dağlıq Qarabağ probleminin həlli istiqamətində açıq-aşkar danışmırlar. Tamamilə müstəqilləşəndən sonra, daha dəqiq desək, təqaüdə çıxanda səmimiləşməyə başlayırlar. Daha çox münaqişədən xəbəri olan müstəqil politoloq xarakteri bağışlayırlar. Gəlin bir anlıq götürək ki, həmsədrlər postda olanda bu bəyanatlarla çıxış edirlər. Yəni bununla ölkələrinin tutduğu mövqeyə qarşı çıxmış olarlar ki, bu da onların dərhal dəyişdirilməsilə nəticələnə bilər. Çünki həmsədr ölkələr belə sərbəstlikdə maraqlı deyillər. Bir faktı da deyim ki, həmin eks həmsədrlər vəzifədən sonra da elə bir sensasion fikir səsləndirməyiblər. Bu yöndə daha çox fəallıq göstərən Kazimirov olub. Onun həmsədrlikdən sonrakı açıqlamalarına diqqət edin. Hamısı ermənilərin xeyrinə, Azərbaycanın ziyanına olub. Ən başlıcası isə o, hadisələri təhrif edərək danışıb. Son vaxtlar isə Uorlik bu yöndə fəaldır. Onun da açıqlamaları danışıqlar prosesində ifadə olunan məlumatların ruhuna uyğundur. Bu baxımdan da həmsədrlərin nə vaxt, necə danışması prosesə kardinal dəyişiklik etmək təsirinə malik deyil. Bunun üçün onların təmsil olunduqları ölkə mövqeyini açıq ifadə etməlidir”.
Məhəmmədəli QƏRİBLİ
