Akif Nağı: “Yaxşı olardı ki, Belçika rəsmiləri bu məsələyə aydınlıq gətirsinlər”
Qondarma “Dağlıq Qarabağ Respublikası”nın rəhbəri Bako Saakyan Brüsselə etdiyi səfər çərçivəsində Flamandiya parlamentində olub. Həmin parlamentdə yaradılan qondarma “respublika” ilə dostluq qrupunun iclasında iştirak edib.
Görüş zamanı qondarma “respublika”nın rəhbəri bu işdə əməyi olan hər kəsə minnətdarlıq ifadə edib və deyib ki, Flamandiya erməni diasporunun qədim ocaqlarından sayılır. Qeyd edək ki, sözügedən parlament Belçikanın bir hissəsində fəaliyyət göstərir və həmin ölkənin qanunları ilə idarə edilir. Dünyanın heç bir ölkəsi tərəfindən tanınmayan bir qondarma qurum rəhbərliyinin rəsmi qəbul olunması, hətta həmin separatçılarla dostluq qrupu təsis etmək Belçika ilə Azərbaycan arasında münasibətlərə necə təsir edə bilər?
Qarabağ Azadlıq Təşkilatının sədri Akif Nağı qəzetimiə açıqlamasında bildirdi ki, bu hadisəyə iki aspektdən yanaşmaq olar: “İstənilən halda, buna rəsmi Bakı tərəfindən etiraz edilməlidir. Belçikanın paytaxtı Brüssel şəhəri demokratiyanın beşiyi sayılır. Dünyanın mühüm demokratik təsisatlarının mənzil qərargahı məhz oradadır. Belə olan halda, həmin ölkədə bu cür həssas bir mövzuya bəslənən münasibət təəccüblü görünür. Digər tərəfdən isə buna separatçılığa meylli olan iki qrupun görüşü kimi də qiymət vermək olar. Belçikanın quruluşuna yaxşı bələd olanlar bilirlər ki, ölkə, demək olar ki, iki yerə ayrılıb - valonlar və flamanların yaşadığı ərazi. Flamanlar hollandillidirlər və daim müstəqil olmağa can atırlar. Məhz həmin parlamentdə qondarma qurumla əlaqələrin qurulması təsadüfi deyil. Ancaq bunu sırf separatçılıqla da eyniləşdirmək olmaz. Məsələn, Abxaziya və ya Cənubi Osetiya parlamenti belə bir qərar versəydi, bunu anlamaq olardı və sırf separatçıların ittifaqı kimi dəyərləndirə bilərdik. Burada isə vəziyyət tam başqadır. Bir var separatçılığa meylli, bir da var separatizm çərçivəsində nəyəsə nail olmaq. Flamanlar ola bilsin ki, mərkəzi hakimiyyətdən ayrılmaq istəyirlər. Ancaq, faktiki olaraq, bu baş verməyib. Onların qəbul etdiyi bütün qərarlar, atdıqları addımlar Belçika hökumətinin ayağına yazılır. Bu baxımdan da hesab edirəm ki, deyilən hadisə Azərbaycan- Belçika münasibətlərinə ciddi şəkildə xələl gətirmək gücündədir. Yaxşı olardı ki, Belçika rəsmiləri bu məsələyə aydınlıq gətirsinlər. Xarici İşlər Nazirliyi səviyyəsində etiraz olunan kimi, məsələ Belçika hökumətinin ciddi reaksiyasına səbəb olacaq. Maraqlı burasıdır ki, dünyanın demokratik ölkələrindən biri heç Ermənistanın edə bilmədiyinə imza atır. Bilirsiniz ki, Ermənistan hələ də separatçı qurumun “müstəqilliyini” tanımayıb. Təəssüf doğuran hadisədir ki, Belçikada belə addım atılıb”.
Məhəmmədəli QƏRİBLİ
