Qabil Hüseynli: “Dağlıq Qarabağ problemilə bağlı Ermənistanın siyasi dairələri, hətta rəsmiləri arasında fikir ayrılığı mövcuddur”
Dağlıq Qarabağ münaqişəsinin nizama salınması ilə bağlı münaqişə tərəflərinin prezidentlər səviyyəsində Cenevrədə keçirdiyi görüş barədə müzakirələr səngimir. Bu barədə hər iki ölkə ictimaiyyəti fəallıq nümayiş etdirir. Ermənistan daxilində gedən siyasi müzakirələrdən belə nəticəyə gəlmək olar ki, həmin görüş barədə istər rəsmilər, istərsə də siyasi dairələr arasında yekdil rəyin formalaşdığı nəzərə çarpır. Birmənalı şəkildə bildirilir ki, Sarkisyan Cenevrədə İlham Əliyevə uduzdu.
Tanınmış erməni politoloqu Manvel Sarkisyan açıqlamasında deyib ki, Ermənistan Cenevrədə Vyana və Sankt-Peterburq razılaşmalarından (atəşkəsə nəzarət mexanizmi - red.) imtina edərək, məğlub oldu. Onun sözlərinə görə, Ermənistan Cenevrə görüşünə məcburi getdi: “Azərbaycan Prezidenti ora niyə getdiyini bilirdi. O bütün dünyaya sübut etdi ki, Ermənistanın belə tələbi yoxdur, Minsk Qrupunda da belə tələb yoxdur. Bəs Ermənistan niyə getdi? Bu haqda suallar cavabsızdır. Çoxları yazır ki, Ermənistanı buna məcbur etdilər. Biz buna öyrəşmişik, çünki ilk dəfə deyil. “Aprel müharibəsi”ndən sonra biz dəfələrlə gördük ki, qəbul edilən qərarlar bizim dövlət maraqlarımıza ziddir, əksinə, Rusiyanın, yaxud Azərbaycanın maraqlarına uyğundur. Biz Cenevrədə Əliyevə məğlub olduq”.
Bu müzakirələrdən belə bir nəticəyə gəlmək olarmı ki, Ermənistanın siyasi dairələrində Dağlıq Qarabağla bağlı yekdil fikir yoxdur və ziddiyyətli yanaşmalar getdikcə dərinləşir?
Politoloq Qabil Hüseynlinin sözlərinə görə, bu ziddiyyət bütün parametrlər üzrə özünü büruzə verir: “Son danışıqlar formatının baş tutmasını belə Sarkisyanın məğlubiyyəti kimi qələmə verirlər. Ən maraqlısı isə budur ki, həmin fikir daha çox Ermənistanın daxili ictimai rəyində, siyasi kuluarlarında dominantlıq edir. Bunun da səbəbi tam aydındır. Çünki Ermənistan hakimiyyəti apreldə baş verən hadisələrdən sonra danışıqlar prosesini tərk etdi və prosesə qayıtmağın irəli sürdüyü şərtlərin qəbul olunmasından sonra mümkün olacağını bildirdi. Azərbaycan tərəfi həmin şərtləri rədd etdi, heç birini qəbul etmədi, ancaq Sarkisyan yenə danışıqlar masasında əyləşdi. Bu hadisə Ermənistanın daxili ictimai rəyində birmənalı qarşılanmayıb. Məhz bu addıma görə orada haqlı olaraq belə qənaətə gəlirlər ki, Sarkisyan Cenevrədə məğlub olub. Dağlıq Qarabağla bağlı onlarda yekdil rəyin olmaması hələ bir müddət əvvəl də nəzərə çarpırdı. Məhz danışıqlar prosesindən imtina ilə bağlı və digər vacib məsələlər ətrafında verilən bəyanatlardan sonra bir neçə dəfə xarici işlər naziri Nalbandyanla Sarkisyanın verdiyi bəyanatlar arasında ziddiyyətin olduğu üzə çıxıb. Sonra məcbur olub onlar bir-birini təkzib ediblər. Onların müxalifətinin də Dağlıq Qarabağ məsələsinin həllinə yanaşması tamamilə fərqlidir. Yadınızdadırsa, eks-prezident Levon Ter-Petrosyan problemin nizama salınması ilə bağlı konsepsiya irəli sürdü. Həmin konsepsiya Sarkisyan hakimiyyətinin yürütdüyü siyasətdən kəskin fərqlənirdi. Bu baxımdan da tam məsuliyyətilə demək olar ki, Dağlıq Qarabağ problemilə bağlı Ermənistanın siyasi dairələri, hətta rəsmiləri arasında fikir ayrılığı mövcuddur”.
Məhəmmədəli QƏRİBLİ
