Zahid Oruc: “Azərbaycan tələb edə bilər ki, onlar gəlib Qarabağda monitorinq aparsınlar”
Aqşin Əliyev: “BMT, ATƏT, Avropa Parlamentinə etiraz ünvanlamalı və faktın araşdırılmasını tələb etməliyik”
Rusiya işğalçı Ermənistanı silahlandırmaqda davam edir. Bu isə regionda onsuz da yüksək olan gərginliyi bir qədər də artıra bilər. Söhbət 200 milyon dollarlıq müasir silahların alınmasından gedir. Ermənistan hökuməti bu il oktyabrın 12-də 100 milyon dollarlıq birinci kredit paketini təsdiq edib. Müqaviləyə əsasən, 100 milyonluq kredit Ermənistana 20 il müddətinə verilir. Bu müddətin 5 ilinin illik 3 faiz dərəcəsi ilə güzəştli olması nəzərdə tutulub.
Həmin vəsaitə Ermənistanın “Smerç” reaktiv sistemləri, “İqla - S” zenit raket kompleksləri, “Avtobaza - M” radiotexniki kəşviyyat kompleksləri, TOC – 1A “Solnsepyok” ağır odsaçan sistemləri və digər sursatlar alacağı gözlənir. Göründüyü kimi, Rusiya Ermənistanı müasir silahlarla təchiz edir, təcavüzkar və işğalçı dövlətin hərbi potensialını gücləndirməyə çalışır.
ATƏT-in Minsk Qrupunun həmsədri kimi Rusiya öz öhdəliklərini pozur, münaqişə tərəflərinin birinə hərtərəfli yardım göstərməklə bitərəflik tələbinə əməl etmədiyini açıq göstərir. Rusiyanın Ermənistanı silahlandırması Azərbaycanla olan dostluq, yaxın qonşuluq və strateji tərəfdaşlıq prinsiplərinə zidd olmaqla yanaşı, rəsmi Moskvanın Ermənistan-Azərbaycan, Dağlıq Qarabağ münaqişəsinin həllində heç də bitərəf olmadığını və daha çox Ermənistanın maraqlarına uyğun hərəkət etdiyini aydın göstərir.
Yaranmış vəziyyətlə bağlı Azərbaycan beynəlxalq miqyasda Rusiyanın bu əməlinə qiymət verilməsini tələb edə bilərmi?
Millət vəkili Zahid Oruc hesab edir ki, indiki Rusiya rəhbərliyinin siyasəti keçən əsrin 90-cı illərindəki siyasətdən elə də ciddi fərqlənmir: “Keçən əsrin 90-cı illərindən regionda Rusiyanın o zamankı siyasi rəhbərliyinin qərarı ilə Ermənistana verilən böyük texnika, hərbi texnologiyalar və silah-sursatın çox ağır nəticələrini öz həyatımızda yaşamışıq. Bizə elə gəlirdi ki, SSRİ rəhbərliyinin yerinə demokratiya libası altında yeni qüvvələr hakimiyyətə gəlsə, bizə qarşı münasibət dəyişəcək. Lakin belə olmadı. İndi də sanki Rusiyanın bizə qarşı siyasətində bir varislik ənənəsini, dəyişilməz mövqeyi görməkdəyik.
Burada yeganə meydana çıxan fərqli bir müstəvi ondan ibarətdir ki, Azərbaycan indiki reallıqda Rusiya ilə bütün iqtisadi-siyasi münasibətlərin sferasında yaxın əlaqələrə malikdir. Belə olan təqdirdə Rusiyanın Ermənistana hərtərəfli dəstək verməsi bir qədər anlaşılmazdır. Belə olan təqdirdə Azərbaycan bütün beynəlxalq təşkilatlara müraciət etməlidir ki, bu məsələ araşdırılsın. Sırf bu işlə məşğul olan təsisatlar da var. ATƏT-in adi silahlar üzrə xüsusi komissiyası var. Azərbaycan tələb edə bilər ki, onlar gəlib Qarabağda monitorinq aparsınlar, orada olan silahların hansı ölkənin istehsalı olduğunu müəyyənləşdirsinlər. Bu halda görəcəyik ki, Qarabağ əsasən Rusiyanın hərbi sənaye kompleksi tərəfindən silahlandırılır ki, bu da bölgədə təhlükəsizliyə ciddi zərbə vurmaqla yanaşı, bu ölkənin sülhpərvər missiyasına xələl gətirir”.
Ekspert Aqşin Əliyev də hesab edir ki, Rusiya Ermənistana böyük partiyada silah verməklə öz vasitəçilik və neytrallıq imicinə kölgə salır: “Rusiya bununla qazanc götürdüyünü deyir. Ancaq bu sırf maliyyəyə bağlı olan məsələ deyil. Azərbaycan məcburdur ki, işğal altında olan torpaqlarını azad etmək üçün güclü ordu formalaşdırsın. Dünyanın müxtəlif ölkələrindən müasir silahlar alırıq. Buna da bizi Ermənistan məcbur edib. Əks halda biz müdafiə xərclərinə bu qədər vəsait xərcləməzdik. Rusiya kredit adı ilə Ermənistana böyük güzəştlə silah satır. Bununla da Azərbaycanın xeyrinə olan güc balansını dəyişmiş olur. Biz Ermənistanın Rusiya tərəfindən silahlandırılması ilə bağlı BMT, ATƏT, Avropa Parlamentinə etiraz ünvanlamalı və faktın araşdırılmasını tələb etməliyik”.
Məhəmmədəli QƏRİBLİ
