Ramil Hüseynov: “Onların münaqişənin həlli ilə bağlı göstərdikləri səylər səmimi deyil”
Məlum olduğu kimi, oktyabrın 16-da Cenevrədə Azərbaycan Prezidenti İlham Əliyevlə Ermənistan prezidenti Serj Sarkisyan arasında görüş keçirilib. Kritik görüşdən sonra Azərbaycan və Ermənistan xarici işlər nazirləri və ATƏT-in Minsk Qrupunun həmsədrləri birgə bəyanat yayıblar. Bəyanatda qeyd olunub ki, görüş konstruktiv keçib.
Cenevrədəki görüşdən dərhal sonra Ermənistan prezidenti Serj Sarkisyan İsveçrə Konfederasiyasındakı Ermənistan Səfirliyində erməni diasporunun nümayəndələri qarşısında çıxış edərkən görüşün nəticələri barədə danışıb. Bununla yanaşı, Sarkisyan ənənəsinə sadiq qalaraq, danışıqların ruhuna zidd bəzi açıqlamalar verib. Onun sözlərinə görə, yeganə həll odur ki, Qarabağ Azərbaycan hüdudlarından kənarda olsun: “Təbii ki, İlham Əliyev də mənim kimi problemin mürəkkəbliyini anlayır, lakin bu elə bir məsələdir ki, sadə həlli heç zaman olmayacaq. İstəyirəm ki, bir şeydən hamı əmin olsun: bizim üçün Qarabağın təhlükəsizliyini bu və ya başqa mənada poza biləcək həll üsulu ola bilməz. Bizim üçün yeganə həll odur ki, Qarabağ Azərbaycan hüdudlarından kənarda olsun. Heç bir zaman heç bir erməni rəhbər belə bir qərarı qəbul edib gerçəkləşdirə bilməz və bu məqsədlə hər şey edəcəyik, eyni zamanda Ermənistanı inkişaf etdirəcək və onu iqtisadi cəhətdən möhkəmləndirəcəyik”.
Azərbaycanın münaqişənin həlli ilə bağlı mövqeyi məlumdur. Münaqişə ölkənin ərazi bütövlüyü çərçivəsində həll olunmalıdır. Sarkisyanın məlum açıqlaması isə birbaşa beynəlxalq hüququn pozulması deməkdir. Çox təəssüflər olsun ki, ATƏT-in Minsk Qrupunun həmsədrləri, hər zaman olduğu kimi, bu dəfə də buna susqunluqla yanaşdılar. Halbuki, belə açıqlama həm digər ölkənin suverenliyinin təhdid olunması deməkdir, həm də danışıqların pozulmasına yönəlik bir cəhddir. Ancaq nədənsə həmsədrlər bunu görməzdən gəlir.
Məsələyə münasibət bildirən VİP-in sədr müavini Ramil Hüseynovun sözlərinı görə, Sarkisyanın məlum açıqlaması birbaşa danışıqların pozulmasına yönəlib: “Çünki danışıqlardan dərhal sonra belə provokasiya xarakterli açıqlamanın verilməsi onun niyyətini bir daha ortaya qoymuş oldu. Bu həm də həmsədrlərin vasitəçilik missiyasına hörmətsizlikdir. Adətən bu kimi danışıqlardan sonra son dərəcə ehtiyatlı açıqlamalar verilir ki, bu, danışıqların pozulmasına təsir göstərməsin. Ancaq Sarkisyanın açıqlaması o qənaətə gəlməyə əsas verir ki, Ermənistan danışıqların ümumi məzmununa uyğun olmayan mövqeyini ortaya qoyur. Çünki Sarkisyan “Dağlıq Qarabağ Azərbaycanın tərkibində ola bilməz” kimi ifadə işlədir. Ermənistan prezidenti müxtəlif siyasi ifadələrlə əsl niyyətini ört-basdır etmək istəsə də, hər şey göz qabağındadır. O, Dağlıq Qarabağı Azərbaycanın tərkibində yox, müstəqil görür. Bu da ona işarədir ki, Ermənistanın mövqeyində bir dəyişiklik yoxdur və Azərbaycanın ərazi bütövlüyünü tanımır. Hesab edirəm ki, həmsədrlərin bunu susqunluqla qarşılaması onların münaqişənin ədalətli həllində maraqlı olmaması ilə bağlıdır. Dəfələrlə qeyd etmişəm ki, həmsədrlərin məqsədi münaqişənin yenidən hərbi fazaya keçməsini əngəlləməkdir. Onların münaqişənin həlli ilə bağlı göstərdikləri səylər səmimi deyil. İstəkləri, sadəcə, mövcud status-kvonu qoruyub saxlamaqdır. O üzdən, Sarkisyanın məlum pozucu xarakterli açıqlamasına heç bir reaksiya vermədilər. Müşahidələr göstərir ki, məlum görüşdən sonra həmsədrlər xeyli arxayın görünürlər. O mənada ki, onlarda belə bir əminlik yaranıb ki, görüş müharibənin yenidən alovlanması risqini xeyli azaltdı. Ən azı bir neçə ay belə bir təhlükə yoxdur. Fikrimcə, həmsədrlərə də elə bu lazımdır. Bütün hallarda, həmsədrlərin Sarkisyanın məlum pozucu xarakterli açıqlamasına susqunluqla yanaşması riyakarlığın göstəricisidir”.
Vidadi ORDAHALLI
