Fazil Mustafa: “Bu cür təzahürlər mütləq lokallaşdırılmalıdır ki, insanların ümumi əxlaq prinsiplərini zədələməsin”
Avropa Şurasının insan hüquqları üzrə komissarı Nils Mujnieksin Azərbaycana qarşı qərəzli prizmadan çıxış etməsi yeni deyil. Zaman-zaman o, Azərbaycana qarşı hesabatlarla çıxış edib. Ənənəsinə sadiq qalan Mujnieks bu dəfə iddia edib ki, guya Azərbaycanda cinsi azlıqların hüquqları pozulur.
Azərbaycanın daxili işlər naziri, general-polkovnik Ramil Usubov Bakıda cinsi azlıq nümayəndələrinin saxlanması ilə bağlı məlumatların təqdim edilməsi barədə Avropa Şurasının insan hüquqları üzrə komissarı Nils Mujnieksin müraciətinə cavab verib. Nazir bəyan edib ki, saxlanan cinsi azlıqların hüquqlarının pozulması ilə bağlı iddiaların heç bir əsası yoxdur. Azərbaycanda bütün qrup insanların hüquqları heç bir məhdudiyyət olmadan təmin edilir və cinsi azlıqlarla bağlı respublikamızda mövcud olan vəziyyət əksər Avropa dövlətlərindəki vəziyyətdən fərqlənmir. Cənab nazir cavabda aydın ifadə edib ki, həmin əməliyyat o adamların cinsi azlığa mənsub olduqları ilə yox, xuliqanlıq və başqa formalarda konkret qanun və asayiş pozuntusu ilə bağlı olub.
Həqiqətən də Azərbaycanda bütün ölkə vətəndaşlarının hüquqları qanun çərçivəsində qorunur və ayrıseçkilik edilmir. Bu baxımdan baş verənləri dəqiq araşdırmadan, guya ölkədə cinsi azlıqların hüquqlarının pozulmasını iddia etmək tamamilə absurddur. Nəzərə alsaq ki, görülən profilaktik tədbirlər zamanı onlar polisə müqavimət göstərib, o zaman hüquq-müafizə orqanlarının qanuna uyğun olaraq bir sıra tədbirlər görməsi tam əsaslıdır. Digər tərəfdən, Mujnieks bilməlidir ki, Azərbaycan müsəlman ölkəsi olduğuna görə ictimaiyyət bu kimi məsələlərə son dərəcə həssas yanaşır və Azərbaycanda bu cür məsələləri qərəzlə qabartmaq xalqımıza həqarətdən başqa bir iş deyil. Baxmayaraq ki, Azərbaycan dünyanın ən tolerant dövlətlərindən biridir. Belə olan halda, Azərbaycanı buna görə tənqid etmək nə dərəcədə doğrudur? Cinsi azlıqlara bu təəssübkeşlik Mujnieks üçün nə deməkdir?
Məsələyə münasibət bildirən millət vəkili Fazil Mustafanın fikrincə, bu doğru deyil. Onun sözlərinə görə, utanmazlığın bundan o tərəfini təsəvvür etmək mümkün deyil: “Hörmətli nazirimiz Ramil Usubov Avropa rəsmilərinin müraciətinə mədəni formada haqlı cavab verib ki, cinsi azlıq olmaq hüquq pozuntusuna yol vermək üçün xüsusi imtiyaz yaratmır. Adamlar konkret olaraq yoluxucu xəstəliklər yayırlar və buna görə də inzibati məsuliyyətə cəlb olunublar. Fikrimcə, Azərbaycan polisinin bu addımı doğru və cəmiyyətin dəstəklədiyi bir addımdır. Mən insan haqlarından da, dindən də, siyasətdən də az-çox başı çıxan adamam. Düşünürəm ki, xəstə insanlardır, Allah normal insani keyfiyyətləri bu kateqoriyadan olanlara nəsib etməyib. Yaradanın yaratdığına qarşı bizlərin də mərhəmətli olması vacibdir. Ancaq cəmiyyət əxlaqı deyilən bir şey var. Bu cür təzahürlər mütləq lokallaşdırılmalıdır ki, insanların ümumi əxlaq prinsiplərini zədələməsin. İnkişaf etmiş ölkələrdə fahişəliyin məkan olaraq lokallaşdırılması və xüsusi yerlərdə lisenziya vasitəsilə mümkünlüyünün nəzərdə tutulması səbəbsiz deyil. Onsuz da istəsən də, istəməsən də cinsi azlıqlar, fahişələr, narkomanlar, alkoqoliklər həm qədim dünyanın, həm də müasir dünyanın reallıqlarıdır, həmişə olmuş və olacaq. Ancaq bu təzahürlərin cəmiyyət çoxluğuna təzyiq və təsir göstərməsinə, öz həyat tərzini bu və ya digər vasitələrlə cəmiyyətə sırımasına biganə yanaşmaq olmaz. Ona görə də bu kateqoriyadan olan insanlar üçün xüsusi lisenziyalaşdırılmış yerlərin müəyyən olunması, marginallaşması üçün addımlar atılmalıdır. Dövlət nəzarəti öz üzərinə götürür, vergisini alır, bu kateqoriyadan olan insanlar, icmalar müəyyən olunmuş məkanlardan kənarda öz vərdişlərini nümayiş etdirməyə çalışarlarsa, o zaman qanunda nəzərdə tutulan sərt tədbirlər görülür. Bu problemə sanki Daxili İşlər Nazirliyinə aid məsələ kimi baxaraq cəmiyyətin düşünən insanlarının yaxasını kənara çəkməsi yanlış yoldur. Bu problemlə bağlı dəqiq hüquqi tənzimləmələr olmazsa, ciddi narahatedici hadisələrin gələcəkdə də yaşanması qaçılmaz olacaq”.
Vidadi ORDAHALLI
