Bu gün Azərbaycan-Türkiyə münasibətlərinin xarakteri onun strateji müttəfiqlik səviyyəsinə yüksəldiyini aydın şəkildə nümayiş etdirir. Ötən dövr ərzində Azərbaycan və Türkiyə bir millət, iki dövlət olduqlarını əməli olaraq sübuta yetirə bilib. Elə dünya miqyasında da ölkələrimiz daim bir-birinin yanında olduqlarını təsdiq edib, hər zaman ortaq mövqe sərgiləyiblər.
Lakin təəssüf ki, son zamanlar buna qarşı bəzi Türkiyə vətəndaşları tərəfindən addımlar atılır və belə vəziyyət ikitərəfli münasibətlərə müəyyən dərəcədə kölgə salır. Xüsusən də həmin adımlara qarşı rəsmi Ankara tərəfindən Azərbaycan cəmiyyətinin gözlədiyi reaksiya və cəza tədbirlərinin yoxluğu şəraitində.
Xatırlatmaq yerinə düşərdi ki, ötən ay Türkiyədən olan bir qrup “ziyalı”nın Ermənistan tərəfindən işğal olunmuş Azərbaycanın ərazilərinə səfər etməsi ölkəmizdə haqlı olaraq böyük narazılığa gətirib çıxardı. Həmin vaxt Türkiyədən olan bu “ziyalı”lar, konkret olaraq Əli Bayramoğlu, Səid Çəkinoğlu, sabiq millət vəkili, “Yaşıllar və Sol Gələcək Partiyası”nın rəsmisi Ufuk Uras, yazıçı və aparıcı Erol Katırçıoğlu “Qərbi Ermənistan Konqresi” adlanan təşkilatın təşəbbüsü ilə Dağlıq Qarabağa qanunsuz səfər edib. Burada onlar anti-Azərbaycan xarakterli, ermənipərəst fikirlər səsləndiriblər. Hadisələrin bu həddə gəlib çıxması fonunda Azərbaycan ictimaiyyətində haqlı bir hiddət özünü göstərdi. Gözlənirdi ki, Türkiyə dövləti bu şəxslər haqqında ən ciddi tədbirləri görəək. Lakin ötən zaman kəsiyi bu gözləntilərin özünü doğrultmadığını göstərdi. İş o yerə gəlib çıxdı ki, beynəlxalq qanunları pozan bu şəxslər nəinki cəzalandırılmadı, hətta əksinə, indinin özündə belə sərbəst fəaliyyət göstərir, Türkiyənin kütləvi informasiya vasitələrində səfərlərinin nəticələri haqqında mövqelərini əks etdirirlər. Ən təəssüfdoğuruju məqamlardan biri də budur ki, barəsində bəhs edilən şəxslər səfərləri fonunda həm Ermənistanı, həm də işğal edilmiş ərazilərmizdə yaradılan qondarma rejimi müdafiə edirlər. İndinin özündə belə Türkiyənin müvafiq qurumlarının bu məsələyə göz yummaları isə çox məyusedici bir haldır və yuxarıda qeyd olunduğu kimi, haqlı olaraq Azərbaycan cəmiyyətində ciddi narazılığa yol açır. Düzdür, artıq Azərbaycan Baş Prokurorluğu həmin şəxslərlə bağlı cinayət işi açıb və Türkiyənin müvafiq qurumlarına bu haqda məlumat verilib. Lakin təəssüf ki, indiyə qədər Türkiyənin müvafiq qurumları tərəfindən bu istiqamətdə hansısa adekvat addım atılması müşahidə edilmir. Bu da, öz növbəsində, Azərbaycan-Türkiyə dostluq münasibətlərinə zərbə deməkdir.
Qardaş ölkədən, onun vətəndaşlarından, o cümlədən rəsmi şəxslərindən gözləmədimiz daha bir addım Avropa Şurası Parlament Assambleyasının (AŞPA) payız sessiyasında özünü göstərdi. Belə ki, Avropa Şurası Parlament Assambleyasında Azərbaycanla bağlı aparılan müzakirələrdə Türkiyə Böyük Millət Məclisinin CHP partiyasından olan deputatları - Dəniz Baykal, Gülsün Bilgəhan, İlhan Kəsici Azərbaycanın öhdəliklərinə dair həmməruzəçilər Stefan Şennax və Sezar Florin Predanın hazırladıqları "Azərbaycanda demokratik təsisatların vəziyyəti" adlı tənqidi hesabat üzrə qətnamənin lehinə səs verdilər. Halbuki, bu qətnamə sırf qərəz üzərində köklənib və bu, həmin türk deputatların özünə də yaxşı məlum idi. Amma nədənsə, onlar Azərbaycan əleyhinə olan qərəzi müdafiə etdilər. Bu hadisə də cəmiyyətimizdə son dərəcə ciddi etirazla qarşılandı. İndi Azərbaycan gözləyir ki, bu məsələlərlə də bağlı Türkiyə hakimiyyəti tədbirlər görsün. Axı Azərbaycan hər zaman ən çətin günlərində Türkiyənin yanında olub. Elə dəfələrlə Azərbaycan Prezidenti İlham Əliyev Türkiyənin olmadığı beynəlxalq tədbirlərdə qardaş ölkəyə yönəlmiş ittihamlara ən sərt formada layiqli cavablar verib. Xatırladaq ki, Avropa İttifaqının “Şərq tərəfdaşlığı” proqramının sammitində Ermənistan prezidenti Serj Sarkisyan Türkiyə dövlət başçısı, dövləti, xalqı haqqında yalanlar söyləyərkən, şər-böhtan səsləndirərkən Azərbaycan Prezidenti İlham Əliyev qətiyyətlə onun səsini kəsdi və dedi ki, Türkiyə nümayəndələri burada yoxdursa, mən varam. Dövlət başçısı Ermənistan prezidentinin yalanlarına faktlarla tutarlı cavab verdi. Ötən ilin iyulunda Türikyədə məlum çevriliş cəhdində Ankaranın yanında ilk yer alan məhz Azərbaycan olub, AKP iqtidarına hər cür dəstək verilib. Bu zaman da İlham Əliyev dərhal və qətiyyətlə öz mövqeyini ifadə etdi, Türkiyə dövlətinin, Türkiyə xalqının yanında olduğunu, Azərbaycanın Türkiyənin legitim hakimiyyətini, yəni Rəcəb Tayyip Ərdoğan hakimiyyətini müdafiə etdiyini bildirdi. Terrorçu FETÖ-yə bağlı bəzi şəxsləri məhz Azərbaycanın sayəsində zərərsizləşdirmək mümkün olub. Azərbaycanın rəsmi şəxsləri, tanınmış ictimai-siyasi xadimləri, vətəndaş cəmiyyəti institutlarının nümayəndələri heç vaxt Azərbaycanın və Türkiyənin maraqları arasında fərq qoymayıblar. İndi də Azərbaycan dövləti və cəmiyyəti hər zaman yanında olduğu Türkiyədən, onun hökumətindən ölkəmizə xəyanət edənlərin cəzalandırılmasını gözləyir. Amma təəssüf ki, hələ bu gözləntilər özünü doğrultmur. Halbuki, bu, Azərbaycan-Türkiyə qardaşlıq, dostluq münasibətlərinə xələl gətirmək istəyənlərə ən tutuarlı cavablardan biri olardı.
Tahir TAĞIYEV
