Rusiya Ermənistana müasir silahlar almaq üçün 200 milyon dollar kredit verməklə, ATƏT-in Minsk qrupunun həmsədri kimi öhdəliklərini pozur. Bunu Trend İnformasiya Agentliyinin baş direktorunun müavini, siyasi ekspert Arzu Nağıyev deyib.
A.Nağıyev qeyd edib ki, Rusiya münaqişə tərəflərinin birinə hərtərəfli yardım göstərməklə bitərəflik tələbinə əməl etmədiyini açıq göstərir.
Ekspert bildirib ki, Ermənistan bugünkü iqtisadi vəziyyəti ilə bu krediti qaytarmaq imkanında deyil: "Rusiya Ermənistanı müasir silahlarla təchiz edir, təcavüzkar və işğalçı dövlətin hərbi potensialını gücləndirməyə çalışır. Rusiyanın Ermənistanı silahlandırması Azərbaycanla olan dostluq, yaxın qonşuluq və strateji tərəfdaşlıq prinsiplərinə ziddir. Rusiyanın Ermənistan-Azərbaycan, Dağlıq Qarabağ münaqişəsinin həllində heç də bitərəf olmadığını və daha çox Ermənistanın maraqlarına uyğun hərəkət etdiyi aydın görünür".
A.Nağıyev əlavə edib ki, Rusiya Ermənistanı silahlandırmaqla beynəlxalq hüququn tələblərini kobud şəkildə pozur.
Qeyd edək ki, 2015-ci il noyabrın 26-da imzalanmış razılaşmaya əsasən, Rusiya Ermənistana müasir silahlar almaq üçün 200 milyon dollar kredit vermək öhdəliyi götürüb. Ermənistan hökuməti oktyabrın 12-də 100 milyon dollarlıq birinci kredit paketini təsdiq edib. Müqaviləyə əsasən, 100 milyonluq kredit Ermənistana 20 il müddətinə verilir. Bu müddətin 5 ilinin illik 3 faiz dərəcəsi ilə güzəştli olması nəzərdə tutulub.
Bu məsələnin Azərbaycan və Ermənistan prezidentlərinin görüşü ərəfəsində qaldırılması…
Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Aydın Mirzəzadə isə deyir ki, Rusiyanın Ermənistana müasir silahlar almaq üçün 20 il müddətinə kredit verməsində məqsəd həmin ölkəni silahlandırmaqdır.
Onun sözlərinə görə, ATƏT-in Minsk qrupu həmsədrlərindən biri olan Rusiyanın Ermənistana müasir silahlar almaq üçün kredit verməsi Azərbaycanda da müəyyən suallar yaradır: "Nəzərə alaq ki, silahlar satılmır, onlar kreditlə verilir. Bu gün Ermənistan çox zəif iqtisadiyyata malikdir və büdcəsini çətinliklə toplayır. Kreditin 20 il müddətində verilməsində məqsəd Ermənistanı silahlandırmaqdır. Hesab edirəm ki, bu məsələnin Azərbaycan və Ermənistan prezidentlərinin görüşü ərəfəsində qaldırılması heç də doğru addım deyil".
A.Mirzəzadə əlavə edib ki, müqaviləyə əsasən, 100 milyon dollar məbləğində kredit Ermənistana 20 il müddətinə verilir.
Onun fikrincə, 100 milyon dollar bu gün müharibə aparan ölkə üçün çox aşağı bir məbləğdir: "Ermənistana 100 milyon dollarlıq silah tədarük ediləcək. Ermənistanın sərbəst vəsaiti olsaydı, o, silah bazarında özünün sərbəst seçimini edə bilərdi. Reallıq odur ki, Ermənistan yenə də xarici ölkələrdən asılı vəziyyətdədir. Ermənistanın siyasəti ona nə güc, nə nüfuz, nə də kapital gətirə bilmir. Azərbaycanın müstəqil xarici siyasəti isə onun bir dövlət kimi güclənməsinə, bölgə üçün əhəmiyyətli olan layihə iştirakçısına çevrilməsinə, ən əsası ösə özünün haqq-ədalət işini dünyada qəbul etdirməsinə səbəb olub".
"Rusiya belə davam eləsə, Azərbaycan ondan üz döndərə bilər"
"Rusiyanın Ermənistanı kredit adı altında silahlandırması, əslində, Azərbaycanla olan dostluq və strateji tərəfdaşlıq prinsiplərinə tam ziddir. Rusiyanın bəzi dairələrində son zamanlar bir sıra məsələlərdə də Azərbaycana qarşı nümayiş etdirdiyi mövqe heç də tam anlaşılan deyil. Unutmayaq ki, Rusiya ATƏT-in Minsk qrupunun həmsədridir. Lakin Ermənistanı silahlandırmaqla o, öz öhdəliklərini kobud şəkildə pozur. Çünki münaqişə tərəflərinin birinə hərtərəfli qaydada yardım göstərmək bitərəfliyə əməl edilməməsi deməkdir. Ona görə də hazırda özünü Rusiyaya dost hesab edən Azərbaycan dövləti, eləcə də ictimaiyyəti Rusiyadan daha ağıllı addımlar atılmasını, işğalçıya yardımların dayandırmasını və vasitəçi olaraq öhdəliklərini yerinə yetirməsini gözləyir. Əks halda, belə davam eləsə, hazırda balanslaşdırılmış xarici siyasət yürüdən Azərbaycan Rusiyadan üz döndərə də bilər".
Bu barədə isə Milli.Az-a açıqlamasında "Baku International Policy and Security Network" Ekspert qrupunun rəhbəri, təhlükəsizlik və beynəlxalq məsələlər üzrə ekspert Elxan Ələsgərov deyib.
Onun fikrincə, Rusiyanın Ermənistanı guya kredit adı ilə durmadan silahlandırması regionun təhlükəsizliyini sual altına qoyur və bölgədə gərginliyin daha da artmasına xidmət edir: "Rusiyanın növbəti Ermənistana silah və hərbi texnika alınması üçün kredit ayırması əslində, Ermənistanın uzunmüddətli silahlanması siyasətinin davamıdır. Rusiya durmadan yenə də Ermənistanı müasir silahlarla təchiz edir, təcavüzkar və işğalçı dövlətin hərbi potensialını gücləndirməyə çalışır. Bu göstərir ki, Rusiya heç də Ermənistan-Azərbaycan, Dağlıq Qarabağ münaqişəsinin həllində bitərəf deyil. Moskva daha çox Ermənistanın maraqlarını müdafiə etməsi və onu silahlandırması işğalçılığın dəstəklənməsi, eləcə də beynəlxalq hüququn tələblərinin kobud şəkildə pozulması deməkdir".
Ekspert qeyd edib ki, təhlillərə əsasən, hazırda Ermənistan əhalisinin sayına görə, Avropada, bəlkədə dünyada ən çox hərbiləşdirilmiş ölkədir: "Ermənistanda iqtisadiyyat çökür, əhalinin sosial vəziyyəti bərbad gündədir, lakin buna baxmayaraq, orduya əlavə müasir silahlar alınır. Napoleon deyirdi ki, müharibə etmək üçün 3 şey lazımdır - pul, pul, yenə də pul. Azərbaycan ərazilərinin bir hissəsini işğal etmiş və faktiki olaraq Azərbaycanla müharibə şəraitində olan Ermənistanın isə belə maliyyə imkanları yoxdur. Ona görə də bunun üçün ilk növbədə Rusiyadakı erməni diasporunun, oliqarxlarının maliyyəsindən istifadə olunur. Bunun siyasi tərəfi odur ki, Ermənistan tam olaraq Rusiyanın tələblərinə uyğun hərəkət edir. Ermənistan iqtisadiyyatı, demək olar ki, Rusiyanın inhisarındadır. Bundan əlavə, Rusiya buradakı bütün hərbi strukturlara nüfuz edib, 49 illik müqaviləyə əsasən, Rusiyanın Ermənistandakı hərbi bazası da ermənilərin hesabına saxlanılır. Əvəzində isə silah alır".
E.Ələsgərov hesab edir ki, Ermənstana silahlandırılması heç də bəzilərinin dediyi kimi, Türkiyəyə qarşı deyil, məhz Azərbaycana qarşı yönəlib: "Çünki Ermənistan Türkiyə ilə hərbi baxımdan qarşıdurmaya girə, onunla rəqabətə apara bilməz. Lakin bu silahlandırma Ermənistanı Azərbaycan torpaqlarını işğal altında saxlamağa şirnikləndirir. Ermənistanın bu cür silahlanmasına, Rusiyanın hərbi-siyasi dəstəyinə, eləcə də digər dövlətlərlə hərbi əlaqələrinə baxmayaraq, Azərbaycanın qarşısında tab gətirə bilməyəcək. Davamlı müharibə aparmaq üçün güclü iqtisadiyyata malik olmaq lazımdır. Azərbaycan isə bu məsələdə Ermənistanı xeyli üstələyir".
Qeyd edək ki, 2015-ci il noyabrın 26-da imzalanmış razılaşmaya əsasən, Rusiya Ermənistana müasir silahlar almaq üçün 200 milyon dollar kredit vermək öhdəliyi götürüb. Ermənistan hökuməti oktyabrın 12-də 100 milyon dollarlıq birinci kredit paketini təsdiq edib.
Müqaviləyə əsasən, 100 milyonluq kredit Ermənistana 20 il müddətinə verilir. Bu müddətin 5 ilinin illik 3 faiz dərəcəsi ilə güzəştli olması nəzərdə tutulub.
