Aqşin Əliyev: “Həm Azərbaycan, həm də Ermənistan bərabərhüquqlu tərəf kimi bu təşkilatda yer alırlar”
“MDB daxilində olan ölkələrdə konfliktlərin həll edilməməsi, istər-istəməz, dövlətlər bir-birinə olan münasibətinə mənfi təsir göstərmiş olur”. Məlum olduğu kimi, bu günlərdə Rusiya Federasiyasının Soçi şəhərində MDB Dövlət Başçıları Şurasının məhdud tərkibdə iclası olub.
Azərbaycan Respublikasının Prezidenti İlham Əliyev iclasda iştirak edib və nitq söyləyib. Prezidenti çıxışında MDB-nin gələcəyinə böyük ümid bəslədiyini deyib: “Əvvəlcə demək istərdim ki, Azərbaycan ənənəvi olaraq MDB-nin işində iştirak etməyə çox böyük əhəmiyyət verir, bu təşkilatın fəal üzvüdür və əmindir ki, MDB-nin böyük gələcəyi var. Bu məkan bizə müntəzəm surətdə fikir mübadiləsi aparmaq imkanı verir”.
Şübhəsiz ki, MDB də ona bəslənən bu inamı doğrultmaq üçün müəyyən addımlar atmalıdır. Təbii ki, hər bəslənən ümiddə bir gözlənti də var. Yəqin ki, Azərbaycanın da bu qurumdan ən böyük gözləntisi Dağlıq Qarabağ probleminin həlli ilə bağlıdır. Heç şübhəsiz ki, Prezident Əliyev MDB-nin Qarabağ probleminə təsir imkanlarını nəzərdən qaçırmır və MBD-nin Qarabağ prosesinə təsirini gücləndirəcəyini, Ermənistana təzyiqlər göstərəcəyini gözləyir. MDB-nin bu problemə təsir etmədən böyük gələcəyi ola bilərmi?
Ekspert Aqşin Əliyevin sözlərinə görə, ölkə başçısının qurumun gələcəyilə bağlı optimist fikir səsləndirməsi ondan gözləntilərin olmamasına dəlalət edə bilməz: “Azərbaycanın bir ölkə kimi qarşısında duran ən qlobal problem Dağlıq Qarabağla bağlıdır. Bilirsiniz ki, biz dinamik templə inkişaf edən ölkəyik. Qarşımızda belə bir problem olmasaydı, inkişafımız bundan da sürətli olardı. MDB bizim üçün yad qurum deyil. Çünki biz orada təmsil olunan ölkələrlə əvvəllər də eyni çətirin altında yaşamışıq. Bizim ümumi və inkaredilməz bir tariximiz var. Bu detalları İlham Əliyev xüsusi olaraq vurğuladı. Azərbaycan rəsmiləri, xüsusilə də Prezident bütün görüşlərdə, toplantılarda Dağlıq Qarabağdan danışır. Bu problemin həlli ölkənin bütün qurumları üçün ön sıralarda durur. MDB-nin gələcəyinin parlaq olması üçün problemin həllinə nail olmalıdır. Bu təşkilat həmin istiqamətdə töhfə verə bilər və bunun əsaslandırılmasını biz hamıdan gözəl bilirik. Əvvəla həmin qurumda Rusiya təmsil olunur və hamı bilir ki, münaqişənin həllinə Moskvanın təsir etmək imkanları daha artıqdır. İkinci bir tərəfdən isə, həm Azərbaycan, həm də Ermənistan bərabərhüquqlu tərəf kimi bu təşkilatda yer alırlar. Buna görə də MDB-nin gələcəyi bu iki ölkə arasındakı konfliktin həllindən çox asılıdır. Düzdür, münaqişənin həlli ilə birbaşa həmin qurum məşğul olmur. Amma səmimi mühitin yaranması, gələcək inkişafın təminatı baxımından belə konfliktlərin həllinə MDB ölkələri müdaxilə etməlidirlər. Ən azından Rusiya bu təşəbbüsü ələ ala bilər. Belə bir sülhün yaranmasına MDB formatında nail olunsa, onda doğrudan da quruma rəğbət daha da artar. MDB daxilində olan ölkələrdə konfliktlərin həll edilməməsi, istər-istəməz, dövlətlərin bir-birinə olan münasibətinə mənfi təsir göstərmiş olur”.
Məhəmmədəli QƏRİBLİ
