İsmayıl Ağayev: “Azərbaycan isə az qalır multikulturalizmdən dünyaya dərs keçsin”
İndiyə qədər Dağlıq Qarabağ münaqişəsinin həllilə bağlı heç bir addım atmayan AŞ PA yenidən Azərbaycana qarşı qərəzli mövqe sərgiləyir. Qurum həqiqətən də ötən illər ərzində Dağlıq Qarabağ probleminin həlli istiqamətində əməli sayılacaq hansısa addım atmayıb. Bununla Avropa Şurası əslində separatçılığın genişlənməsinə, bir növ, rəvac vermiş olub.
İndi Azərbaycan Avropa Şurasını Qarabağ məsələsində konkert iş görməyə dəvət edir. Amma bunun əvəzində qurumda bəzi şəxslər Azərbaycana qarşı əsasən erməni lobbisinin təsiri altında olduqca aqressiv bir mövqe sərgiləyirlər. Məsələn, Avropa Şurasının baş katibi Torbyorn Yaqland bu gün açıq şəkildə ermənipərəst bir mövqedən çıxış edərək işğalçı tərəfin yanında yer alır, Azərbaycana qarşı əsassız fikirlər səsləndirir. AŞ PA-da Azərbaycan nümayəndə heyətinin rəhbəri Səməd Seyidov da bildirir ki, Azərbaycan Avropa Şurasına üzv olduğu 16 il ərzində nəhəng islahatlar həyata keçirib və keçirməyə də davam edir. Lakin təəssüf ki, bunların heç biri nəzərə alınmır və Azərbaycana təzyiq göstərmək cəhdindən əl çəkilmir: “Assambleyamızın bəzi üzvləri, hətta Avropa Şurasının baş katibi Azərbaycanla məşğul olmağı gündəlik məşğuliyyətə çevirib. Avropa Şurasının baş katibi vəzifəsindəki “baş” sözünü qəbul edib, lakin bu vəzifənin içində “katib” kəlməsinin olduğunu unudub. Katibin işi ölkələr arasında dialoqun kəsilməsi üçün cəhd etmək yox, dialoqun təşviqi olmalıdır. Anlamaq olmur ki, cənab Yaqland Azərbaycanla əlaqələrin kəsilməsi üçün niyə bu qədər vaxt və güc sərf edir”.
Amma görünən odur ki, Torbyorn Yaqland vəzifədən uzaqlaşdırılmayana qədər anti-Azərbaycan mövqeyindən əl çəkməyəcək. Bununla Yaqland elə özünün rəhbərlik etdiyi Avropa Şurasını gözdən salmaqda davam edir. Çox maraqlıdır ki, o bu yaxınlarda milli azlıqlar və onların ana dilindən istifadə məsələsi üzrə dərc etdirdiyi məqaləsində Azərbaycan barədə heç nə yazmayıb.
Yaqlandın milli azlıqlar mövzusunda erməniləri tərifləməsi nəyin əlaməti sayıla bilər?
Beynəlxalq Diaspor Mərkəzinin sədri İsmayıl Ağayev qəzetimizdə bildirdi ki, bu mövzuda Yaqlandın ortya qoyduğu mövqe qərəzin aşırı dərəcədə olduğunu, ermənilərə bəslənən hörmətin isə ifrata vardığını sübut edir: “Məhz bu amildir ki, Yaqlandı belə yalan danışmağa vadar edir. Ermənistan faktiki olaraq elə bir ölkədir ki, orada mili azlıq deyilən bir məfhum yoxdur. Azərbaycan isə az qalır multikulturalizmdən dünyaya dərs keçsin. Belə olan halda, Yaqland bunu görmür. Belə şəxsin Qarabağ məsələsində də obyektiv mövqe tutması sadəcə mümkünsüz sayılır. Ermənistan hazırda monoetnik ölkə kimi tanınır. Düzdür, bəzi QHT-lərin əlilə guya orada assurilərin və kürdlərin yaşadığı haqda məlumatlar yaymağa çalışırlar, ancaq bunlar reallıqları əks etdirmir. Bir əsrin içində ermənilər yürütdükləri deportasiya siyasəti nəticəsində indiki Qərbi Azərbaycanda milli azlıqdan çoxluğa çevrilə bildilər. Ora tarixən Azərbaycan torpağı olub. Bu səbəbdən çoxluğun bizim millətdən olması təbiidir. Bir neçə deportasiyadan sonra ermənilər sayda önə çıxa bildilər. Ən son deportasiya ilə isə Ermənistan tam monoetnik ölkəyə çevrildi. Çünki bütün azərbaycanlılar oranı tərk etdilər. Qeyd edim ki, Azərbaycanlılarla yanaşı, həmin ölkəni orada yaşayan kürdlər də tərk edib. Qalan az sayda ruslar isə ölkədə hökm sürən səfalət ucbatından emiqrasiya ediblər. Hazırda Ermənistanda elə ağır sosial vəziyyətdir ki, heç ermənilərin özləri orada qalmırlar. Belə olan halda, hansı entik azlıqlardan danışmaq olar? Sayı 100 minlərlə ölçülən etnik azlıqlar Azərbaycanda sülh və əminamanlıq içərisində yaşadığı halda, Yaqland bunu görmür, ancaq Ermənistanda olmayan bir halı dünyanın gözünə soxur. Bu fakt bir daha onun qərəzli olmasını açıq şəkildə sübut edir”.
Məhəmmədəli QƏRİBLİ
