Məhəmməd Əsədullazadə: “İrəvanda keçirilən mitinqlərdə həbs edilənlər hələ də həbsdə saxlanır”
Azərbaycana qarşı növbəti qarayaxma kampaniyası, ölkəmizin imicinə zərbə vurma kimi məkrli plan həyata keçirilir. Hər zaman olduğu kimi, bu dəfə də antiAzərbaycan kampaniyasının sifarişçiləri erməni lobbisi, icraçıları isə erməni lobbisinin maliyyəsi ilə fəaliyyət göstərən Avropa və Qərbdəki bəzi siyasi təsisatlar və parlamentarilərdir.
Əgər əvvəllər erməni lobbisi Azərbaycana qarşı kampaniyada beynəlxalq qeyri-hökumət təşkilatları şəbəkəsindən istifadə edirdisə, bu dəfə nə qədər təəccüblü və təəssüfedici olsa da, Avropa Şurasını da öz çirkin məqsədlərinə alət edə biliblər. Hər halda bu günlərdə Avropa Şurası Parlament Assambleyasında Azərbaycanla bağlı qəbul edilmiş iki qətnamə belə deməyə əsas verir.
İndiki mərhələdə Avropa Şurasının timsalında Qərb və qoca qitənin Azərbaycana qarşı qərəz nümayiş etdirməsi, anti-Azərbaycan kampaniyasının həyata keçirilməsinin başlıca məqsədi vəziyyəti Ermənistanın xeyrinə dəyişmək niyyətidir. Çünki hər kəsə məlumdur ki, Ermənistanda ölkə vətəndaşlarının bütün siyasi hüquqları pozulur. Ancaq nədənsə, AŞ PA bunu görmək istəmir. Halbuki, bir müddət əvvəl erməni hüquq müdafiəçisi bəyan etdi ki, ölkədə 94 siyasi məhbus var. Sarkisyan rejimi müxtəlif formada insan hüquqlarını pozur. Belə olan halda, haqlı olaraq ortaya sual çıxır: AŞ PA nəyə görə Ermənistanda olan siyasi məhbusları unudur?
Bununla yanaşı, AŞ PA, əslində. Ermənistandakı vəziyyətə, bu ölkənin yeritdiyi işğalçılıq siyasətinə diqqət yetirməli idi. Çünki Avropa Şurası özü 2005-ci ildə Ermənistanı işğalçı kimi qiymətləndirib və onların işğal etdiyi torpaqlarda etnik təmizləmə siyasəti apardığını təsdiqləyib.Yaxşı olardı ki, qurum bu barədə qətiyyət göstərsin.
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, nədənsə, Ermənistanın AŞ PA qarşısında götürdüyü öhdəliklər yada salınmır: “Ermənistan Cənubi Qafqaz ölkəsi olaraq, Azərbaycanla birgə 2001-ci ildən qurumun üzvüdür. Hər iki ölkə bu təşkilata qəbul ediləndə öhdəliklərin yerinə yetirilməsi üçün vaxt götürmüşdülər. Azərbaycan daim bu qurumla sıx əlaqələr saxlayıb və öhdəlikləri yerinə yetirməyə çalışıb. Azərbaycandan fərqli olaraq, Ermənistan bu qurum qarşısında götürdüyü öhdəlikləri yerinə yetirməkdən dolayı yollarla yayınıb. Qeyd edim ki, Ermənistanda insan hüquqları və demokratiya sahəsində ciddi problemlər var və bunların həlli istiqamətində siyasət aparılmır. Bu ölkədə kütləvi həbslər, vətəndaşların hüquqlarının kobud pozulması geniş vüsət alıb. Korrupsiya və ədalətsiz məhkəmə qərarları Avropa İnsan Haqları Məhkəməsində də çox ciddi bir prosesə səbəb olub. Erməni hakimiyyəti, göründüyü kimi, Avropa Şurası qarşısında götürdüyü öhdəlikləri yerinə yetirmir. Bütün bunlara baxmayaraq, AŞ PA da bu ölkəyə qarşı hər hansı bir təzyiqlər etmir. Ermənistanda onlarla siyasi məhbus var, amma nədənsə, bunların azadlığı üçün AŞ PA vaxt qoymur. Təbii ki, bu, ikili standartların bariz nümunəsidir. Hesab edirəm ki, bu ədalətsizlikdir. O üzdən, Ermənistan daha çox təzyiqlərlə üzləşməlidir. İlk növbədə bu ölkənin işğalçı siyasəti, beynəlxalq hüququ pozması göz önündədir. AŞ PA rəsmiləri Ermənistana loyal, Azərbaycana radikal siyasət sərgiləyirsə, bu qəbuledilməzdir. Hər bir ölkənin problemləri var. O cümlədən, bir sıra Avropa ölkələrində də problemlər var. İstənilən halda, yaranan problemlər dialoq yolu ilə həll olunmalıdır. AŞ PA-nın kəskin ritorikası ilk növbədə Ermənistana şamil olunmalıdır. İrəvanda keçirilən mitinqlərdə həbs edilənlər hələ də həbsdə saxlanır. Yaxşı olardı ki, AŞ PA bunlara reaksiya versin və Ermənistandan üzərinə götürdüyü öhdəlikləri yerinə yetirməsini tələb etsin”.
Vidadi ORDAHALLI
