Qabil Hüseynli: “Dağlıq Qarabağ məsələsi ilə bağlı, kiçik də olsa, ümidverici rəylər var, ancaq nədənsə hərəkətlilik nəzərə çarpmır”
ATƏT-in Minsk Qrupunun həmsədrləri regiona səfərlərinin yekununa dair bəyanat yayıblar. Bəyanatda vurğulanır ki, həmsədrlər oktyabrın 6-da İrəvanda Ermənistan prezidenti Serj Sarkisyan, oktyabrın 7-də isə Bakıda Azərbaycan Prezidenti İlham Əliyevlə görüşüblər. Onlar Azərbaycan və Ermənistan prezidentlərinin görüşünə hazırlığı müzakirə ediblər. Hər iki prezident münaqişənin sülh yolu ilə həll edilməsi məqsədilə danışıqları bərpa etməyə hazır olduqlarını təsdiqləyiblər.
Həmsədrlərin son bəyanatını necə dəyərləndirmək olar? Politoloq Qabil Hüseynlinin sözlərinə görə, xarici işlər nazirlərinin BMT görüşündən sonra həmsədrlərin cəlbedici təkliflərinin olması, hətta bu təkliflərin prezidentlərin görüşünü zəruri edə biləcəyi ilə bağlı ehtimallar çox idi: “Həmsədrlər regiona səfər etdikdən sonra məlum oldu ki, elə bir ciddi yenilikdən söhbət getmir. Onların nail olduqları ən böyük hədəf hər iki ölkə prezidentini görüşməyə razı salmaq olub. Bunun özü də danışıqlar prosesində mühüm detal sayıla bilər. Çünki uzun müddətdir Ermənistan danışıqlarla bağlı qeyri-konstruktivlik nümayiş etdirərək prosesi tərk etmişdi. Ancaq, hər halda, Azərbaycan xarici işlər naziri bu məsələdə müəyyən qədər nikbin görünürdü. Nazir son görüşdə də bir daha vurğuladı ki, Azərbaycan öz torpaqlarından bir qarış belə güzəştə getməyəcək. Görünür, həmsədrlərin hazırladığı yeni təkliflərdə yenə kompromislərdən söhbət gedir və Azərbaycanın da hansısa güzəştlərə getməsi tələb olunur. Çox mürəkkəb bir vəziyyət yaranıb. Son zamanlar ABŞ-ın mövqeyində müəyyən qədər çəkingənlik nümayiş etdirməsi və Minsk Qrupunundakı həmsədrini geri çəkərək oraya dövlət katibinin Avropa və Asiya üzrə köməkçisinin müavinini təyin etmək kimi fikrə düşməsi anlaşılan deyil. Bu cür ciddi bir məsələyə Vaşinqtonun belə münasibəti heç bir məntiqə sığmır. Bu baxımdan məsələnin tənzimlənməsi istiqamətində ortaq bir fikrə gəlmək hələ ki, mümkün deyil. Üstəlik, Rusiya da susqunluq nümayiş etdirir. Minsk Qrupunun həmsədrləri fəal olsa da, həmsədr ölkələrdən elə bir ciddi münasibət görünmür. Bundan başqa, bəzi subyektiv məsələlər də var ki, danışıqlar prosesinə əngəl törədir. Bir sözlə, Dağlıq Qarabağ məsələsi ilə bağlı, kiçik də olsa, ümidverici rəylər var, ancaq nədənsə hərəkətlilik nəzərə çarpmır. Ona görə də qəti və aydın fikir bildirmək çox çətindir”.
Məhəmmədəli QƏRİBLİ
