Daşdəmir Əliyev: “Ermənistanın belə istiqamətlər üzrə məşqlər etməsi gülünc görünür”
Oktyabrın 5-də Ermənistanda Kollektiv Təhlükəsizlik Müqaviləsi Təşkilatına (KTMT) üzv ölkələrin silahlı qüvvələrinin “Axtarış-2017” beynəlxalq hərbi təlimlərinin ikinci mərhələsi start götürüb. Bu barədə Ermənistan Müdafiə Nazirliyinin mətbuat xidmətinin məlumatında bildirilir.
Məlumata görə, təlimlərin ikinci mərhələsində Çevik Kollektiv Qüvvələrinin (ÇKQ) birgə əməliyyatının hazırlanması üçün bütün kəşfiyyat qüvvələrindən və vasitələrdən istifadə etmək, kəşfiyyat məlumatlarını toplamaq və təhlil etmək, həmin məlumatların kəşfiyyat qüvvələrinin birgə komanda məntəqəsi və ÇKQ komandanlığı arasında mübadiləsini təmin etmək və qeyri-formal hərbi birləşmələrə qarşı taktikaların seçilməsi kimi tapşırıqların həyata keçirilməsi nəzərdə tutulub. Bundan başqa, mühüm obyektlərin KTMT xüsusi təyinatlı qüvvələri tərəfindən ələ keçirilməsi və məhv edilməsi kimi tapşırıqlar yerinə yetiriləcək.
Qeyd edək ki, “Axtarış-2017” hərbi təlimlərinə Rusiya, Belarus, Ermənistan, Qazaxıstan, Qırğızıstan və Tacikistan silahlı qüvvələrinin kəşfiyyat və xüsusi təyinatlı qüvvələri cəlb edilib. Ümumilikdə təlimlərdə 700-ü rusiyalı olmaqla, 1000-dən çox hərbçi iştirak edir.
Təlimlərdə məşq olunacağı anons edilən sahələr arasında ən çox diqqət çəkənlərdən biri də qeyri-formal hərbi birləşmələrlə mübarizə ilə bağlı olandır. Bu istiqamətin seçilməsi hansı zərurətdən doğa bilər?
Ekspert Daşdəmir Əliyevin sözlərinə görə, KTMT-nin hərbi təlimləri, bir növ, formal xarakter daşıyır: “Fikir versəniz görərsiniz ki, qurumun hərbi təlimləri daha çox Ermənistanda keçirilir. Həmin qurum, demək olar ki, Rusiyanın nəzarəti altındadır. Qurumda təmsil olunan başqa ölkələrin KTMT daxilindəki fəallığı nəzərə çarpmır. Rusiya bununla bir sıra mesajlar verir. Həm NATO üzvü olan Türkiyə ilə həmsərhəd olan ölkədə mövcudluğunu sübut edir, həmçinin, Cənubi Qafqazda mövcudluğunu Gürcüstan və Azərbaycana göstərir. Bildirmək istəyir ki, Ermənistan formal olaraq müstəqildir. Faktiki olaraq onun ərazisindən Rusiya istədiyini edə bilər. Başlıca məqsəd budur. Təlimlərin gündəliyinə salınan məsələlər isə daha çox çevik hərbi əməliyyatların keçirilməsi üçün nəzərdə tutulan sahələri əhatə edir. Qeyri-formal hərbi birləşmələrlə mübarizə dedikdə isə məlumdur ki, terror təşkilatları nəzərdə tutulur. Belə əməllərdən daha çox Rusiyanın əziyyət çəkmək təhlükəsi var. Onlar hər an dini zəmində qarşıdurmaların olmasını öz ərazilərində gözləyirlər. Ermənistana gəldikdə isə həmin ölkənin özü birbaşa terrorizmlə məşğuldur. Başqa bir ölkənin torpaqlarını qəsb edib. Bu baxımdan da Ermənistanın belə istiqamətlər üzrə məşqlər etməsi gülünc görünür”.
Məhəmmədəli QƏRİBLİ
