Ağa Seyidli: “Yaxşı olar ki, dünyanın bir çox ölkələri terrorizmlə mübarizədə Azərbaycan praktikasından bəhrələnsinlər”
Məlum olduğu kimi, Prezident İlham Əliyev bir qrup avropalı səfiri qəbul edərkən dünyanı narahat edən qlobal terrorizmlə mübarizə üsullarından danışıb:
“Azərbaycan çoxmillətli və çoxkonfessiyalı ölkədir. Bunu siz də qeyd etdiniz və bu, məlum məsələdir ki, bizim ölkədə dini və etnik tolerantlıq yüksək səviyyədədir. Biz multikulturalizmin mərkəzlərindən biri kimi tanınırıq və ötən il Azərbaycanda “Multikulturalizm ili” elan edilib. Bütün etnik və dini qrupların nümayəndələri Azərbaycanda sülh şəraitində, bir ailə kimi yaşayır və hesab edirəm ki, bu bizim uğurlu inkişafımızın vacib elementidir. Yeri gəlmişkən, düşünürəm ki, bu məsələ müzakirələrin bir hissəsi olmalı və sazişə daxil edilməlidir. Azərbaycan Avropa ilə müsəlman dünyası arasında coğrafi körpü rolu ilə yanaşı, mədəni və müəyyən dərəcədə siyasi körpü rolunu oynayır. 2008-ci ildə biz “Bakı prosesi”nə start verdik. Həmin il biz Avropa Şurasına üzv dövlətlərin mədəniyyət nazirlərinin iclasına İslam Əməkdaşlıq Təşkilatına üzv olan ölkələrin müvafiq nazirlərini dəvət etdik. İlk dəfə idi ki, 100-dən artıq dövlətin nümayəndəsi bir araya gəldi və artıq bu gün o, “Bakı prosesi” adlanır. Həmin proses inkişaf etməkdə davam edir və BMT tərəfindən dəstəklənir. Müasir, dünyəvi müsəlman ölkəsi kimi Azərbaycanın rolu artır və deyərdim ki, ölkəmizdə cəmiyyətin dünyəvilik statusunun dəstəklənməsi üçün gördüyümüz işlər təkcə bizim üçün deyil, region üçün də olduqca əhəmiyyətlidir.
Beynəlxalq terrorizmlə bağlı məsələlərə gəldikdə, bir qədər əvvəl qeyd etdiklərim bununla bilavasitə əlaqəlidir. Bizim mövqeyimiz ondan ibarətdir ki, beynəlxalq terrorizmlə mübarizədə yalnız hərbi vasitələrlə uğur qazanmaq mümkünsüzdür. Çünki əvvəlcə ideoloji təhlükələrdən qorunmaq lazımdır. İnsanları qane edəcək yaşayış standartları və rahatlıq təmin olunmalıdır ki, onlar həyatlarından məmnun olsunlar. Onlar təhsil almalıdırlar. Qeyd etdiyim kimi, Azərbaycanda savadlılıq səviyyəsi 100 faizə yaxındır. Azərbaycanda getdikcə daha çox savadlı gənclər müxtəlif mühüm vəzifələrdə çalışırlar. Yəni bu, ekstremizmə qarşı əsas səddir. Terrorizm prosesin son mərhələsidir. Manipulyasiya, savadsızlıq, təbliğat, narazılıq, sosial qeyri-bərabərlik, yoxsulluq, işsizlik və nəhayət, terrorizm. Yəni bütün bu amillər aradan qaldırılmalıdır...”.
Göründüyü kimi ölkə başçısı terrorizmlə mübarizənin yalnız hərbi yolla aparılmasını yetərli saymır və qeyd edir ki, ortaya mütləq ideoloji mübarizə istiqamətlərini də qoymaq lazımdır. Prezidentin bu yanaşmasını nə dərəcədə praqmatik saymaq olar?
Ekspert Ağa Seyidli qəzetimizə bildirdi ki, terrorizmlə mübarizə sahəsində əldə olunan uğurlarla bağlı ölkə başçısı maraqlı fikirlər səsləndirdi: “Bu baxımdan doğrudan da Azərbaycanın əldə etdiyi nailiyyətlər gözəl örnək sayıla bilər. Qlobal terrorizm sərhəd tanımır. Ondan bütün ölkələr əziyyət çəkə bilər. Bu səbəbdən də terrorizm yalnız hansısa ölkənin indvidual problemi sayıla bilməz. Artıq qlobal səciyyə daşıyan terrorçuluqla mübarizə üsullarının effektivliyi də ciddi nəzərdən keçirilməyə başlanıb. Azərbaycan müsəlman ölkəsidir. Ancaq dünyəvi quruluşa malik olan ölkəmizdə dini tolerantlıq sahəsində ciddi uğurlara imza atmışıq. Təriqətlərarası münasibətlər də çox qənaətbəxşdir. Prezident çox doğru olaraq qeyd edib ki, terrorizmlə mübarizə yalnız silahla, hərbi üsullarla olmamalıdır. Həmin bəlanı beşiyində boğmaq lazımdır. Bunun üçün qabaqlayıcı ideoloji vasitələrdən, təbliğatdan geniş istifadə olunmalıdır. Bunun üçün kompleks tədbirlərin həyata keçirilməsi vacibdir. Dövlət vətəndaşının probleminə sahib çıxmalıdır. Sosial bərabərsizlik, cəmiyyətdəki haqsızlıq bəzən insanların radikal cərəyanlara meylini artırır. Bununla bağlı Azərbaycanda kifayət qədər iş görülüb. Yoxsulluq, demək olar ki, minimum həddə çatıb. Hüquqi dövlət anlayışına aid olan normativ qanunvericilik bazasında edilən yeniliklər həmin meyllərin qarşısını həm inzibati, həm də ideoloji olaraq alır. Yaxşı olar ki, dünyanın bir çox ölkələri terrorizmlə mübarizədə Azərbaycan praktikasından bəhrələnsinlər”.
Məhəmmədəli QƏRİBLİ
