Məhərrəm Zülfüqarlı: “Çox təəssüflər olsun ki, aparıcı dövlətlərin, beynəlxalq qurumların Ermənistanın işğalçılıq siyasətinə...”
Məlum olduğu kimi, Azərbaycan Respublikasının Birinci vitse-prezidenti Mehriban Əliyeva Abşeron rayonunun Masazır qəsəbəsində məcburi köçkünlər üçün salınan şəhərcikdə yeni inşa olunan üç binada mənzillərin təqdim edilməsi mərasimində iştirak edib. Mərasimdə çıxış edən Birinci vitse-prezident Mehriban Əliyeva bir sıra məsələlərə toxunub.
Onun sözlərinə görə, Ermənistan-Azərbaycan, Dağlıq Qarabağ münaqişəsi Azərbaycanın ən ağır problemi, xalqımızın ən böyük ağrısıdır: “Qonşu ölkənin işğalçılıq siyasəti nəticəsində yüz minlərlə soydaşımız doğma torpaqlarını, yurd-yuvalarını tərk edərək qaçqın və köçkün həyatı sürməyə məcburdurlar. Bütün bu illər boyu Azərbaycan dövləti soydaşlarımızın üzləşdiyi problemlərin həlli üçün öz gücü ilə bütün lazımi tədbirləri görüb, lazımi addımları atıb və bunun nəticələri bu gün göz qabağındadır. Ölkəmizdə bir dənə də olsun çadır şəhərciyi qalmayıb, yüzədək müasir yaşayış kompleksi inşa olunub. Bu komplekslər bütün zəruri infrastrukturla təmin edilib. Əlli min qaçqın və köçkün ailəsi, ümumilikdə 250 min insan yeni evlərə, yeni mənzillərə köçürülüb. Dörd yüz min qaçqın və köçkün yeni işlə təmin olunub. Ümumilikdə, dövlətimiz bu tədbirlərin icrası üçün 6 milyard manatdan çox vəsait xərcləyib.
İndiki mərhələdə digər yerlərdə - yararsız binalarda, yarımçıq tikilmiş binalarda, yataqxanalarda, pansionatlarda, uşaq bağçalarında müvəqqəti məskunlaşmış soydaşlarımızın vəziyyəti yaxşılaşdırılmalıdır. İlk mərhələdə ən ağır vəziyyətdə yaşayan insanlar yeni mənzillərə köçürülməlidir. Bundan sonra ardıcıl olaraq digər qaçqın və köçkün ailələrinin yaşayış vəziyyəti yaxşılaşdırılmalıdır. Biz bunun üçün çalışırıq və çalışacağıq. Mən əminəm ki, Azərbaycan dövləti bu problemi öz gücü ilə həll edəcək”.
Göründüyü kimi, ötən illərdə məcburi köçkünlərin vəziyyətinin yaxşılaşdırılması üçün xeyli işlər görülüb. Vaxtında beynəlxalq təşkilatlar erməni separatçılarının qarşısını alsaydılar, insanlar yurd-yuvalarından didərgin düşməsəydilər, 6 milyard manat ölkənin inkişafına sərf olunacaqdı. Ümumən bu, ölkənin inkişafında necə rol oynayacaqdı?
Sözügedən məsələni dəyərləndirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, məlum hadisələr olmasaydı, o zaman Azərbaycan daha sürətlə inkişaf edərdi: “Məsələ ondadır ki, 1994-cü ilin mayına qədər davam edən müharibə Azərbaycan iqtisadiyyatına böyük ziyan vurdu. Dağlıq Qarabağ və ətraf 7 rayonun işğal olunması nəticəsində bütün yaşayış məntəqələri erməni vandalları tərəfindən məhv edildi. Yüzminlərlə insan yerindən-yurdundan didərgin salınaraq məcburi köçkün vəziyyətində yaşamalı oldu. O vaxt dövlətin imkanları indiki kimi deyildi. Azərbaycanın iqtisadi imkanları genişləndikcə, qaçqın və məcburi köçkünlərin sosial vəziyyətinin yaxşılaşdırılması üçün ciddi işlər görüldü. Nəticədə yüzminlərlə qaçqın və məcburi köçkünün mənzil şəraiti yaxşılaşdırıldı. Bu istiqamətdə işlər davam etdirilir. Şübhəsiz ki, Ermənistan ordusu tərəfindən Azərbaycan əraziləri işğal olunmasaydı, həmin vəsait ölkənin inkişafına yönəldilərdi. Bunun nəticəsində ölkədə, demək olar, bütün sosial problemlər həll olunacaqdı. Eyni zamanda, ölkə iqtisadiyyatında qeyri-neft sektorunun payı indikindən daha çox olardı. Həmin vəsait bu tipli istehsal və xidmət müəssisələrinin yaradılmasına yönəldiləcəkdi. Çox təəssüflər olsun ki, aparıcı dövlətlərin, beynəlxalq qurumların Ermənistanın işğalçılıq siyasətinə göz yummaları vəziyyətin bu həddə gəlib çıxmasına gətirib çıxardı. Buna rəğmən, Azərbaycan dövləti bütün çətinliklərin öhdəsindən gəlir”.
Vidadi ORDAHALLI
