Arzuxan Əlizadə: “Həmsədrlər Ermənistana real təzyiqlər göstərsələr, qarşı tərəf danışıqlarda hansısa konstruktiv addımlar ata bilər”
“Bizə belə gəlir ki, Ermənistan danışıqlar prosesinə qayıdır və bu olduqca vacib məsələdir. Onların danışıqları boykot etmək siyasəti birincisi ağılsız, ikincisi isə səmərəsiz idi. Bildiyimə görə, Ermənistan rəhbərliyinə müxtəlif mənbələrdən, o cümlədən Avropadan mesajlar verilib ki, bu ölkə özünü belə apara bilməz. Onlar əraziləri işğal etməklə yanaşı, etnik təmizləmə aparıb və işğal olunmuş əraziləri viran ediblər. Bütün bunlardan sonra onlar danışıqların bərpası üçün hələ şərtlər də irəli sürürlər. Ancaq bu gün hesab edirəm ki, danışıqlar formatı bərpa olunmaqdadır”.
Məlum olduğu kimi, bunu Prezident İlham Əliyev Avropa İttifaqı Şurasının Siyasi və Təhlükəsizlik Komitəsinin sədri Valter Stevensin rəhbərlik etdiyi nümayəndə heyəti ilə görüşü zaman deyib. Dövlət başçısı bir neçə gün sonra Minsk Qrupunun həmsədrləri ilə görüşəcəyini xatırladaraq qeyd edib ki, gələcək danışıqlar, habelə prezidentlər səviyyəsində mümkün görüş müzakirə ediləcək: “Münaqişəyə yanaşma məsələsinə gəldikdə, xüsusilə də Şərq Tərəfdaşlığı Zirvə görüşü zamanı bizim gözləntimiz ondan ibarətdir ki, postsovet məkanında mövcud olan bütün münaqişələrə münasibətdə Avropa Komissiyası tərəfindən vahid yanaşma nümayiş etdirilsin. Əks təqdirdə, biz haqlı olaraq bunu ikili standartlar yanaşması kimi qəbul edəcəyik. Bu səbəbdən, Dağlıq Qarabağla bağlı yekun bəyannamənin mətnində ərazi bütövlüyünə dair məsələnin aydın ifadə olunması çox vacibdir. Ümumilikdə isə bütün beynəlxalq formatlarda belə məsələlər müzakirə edilərkən bizim mövqeyimiz ondan ibarətdir ki, bütün münaqişələrlə bağlı vahid yanaşma olmalıdır”.
Bütün bu deyilənlərin fonunda, Prezident danışıqlar formatı bərpa olunmaqdadır deyərkən yeni nəyi nəzərdə tuturdu?
Məsələyə münasibət bildirən AMİP-in baş katibi Arzuxan Əlizadənin sözlərinə görə, burada söhbət mərhələli variantdan gedə bilər: “Hesab edirəm ki, hazırkı şəraitdə ən optimal variant danışıqların mərhələli yoluna üstünlük verməkdir. Çox güman ki, ölkə başçısı bunu nəzərdə tutub. Bu zaman hansı yeniliklərin olacağına gəldikdı isə, bunu proqnozlaşdırmaq çətindir. Ona görə ki, danışıqlar qapalı keçirilir. Ancaq onu da nəzərə almaq lazımdır ki, Ermənistan hər vəchlə mərhələli variantı sabotaj etməyə çalışır. Danışıqlar hansısa həlledici mərhələyə çatanda, qarşı tərəf təxribata əl atır. Ehtimal ki, Ermənistan, həmişə olduğu kimi, növbəti dəfə də bənzər mövqe sərgiləyəcək. Onların məqsədi mövcud status-kvonu qoruyub saxlamaqdır. Necə ki, 1994-cü ilin mayından biz bunu müşahidə edirik. Hesab edirəm ki, həmsədrlər Ermənistana real təzyiqlər göstərsələr, qarşı tərəf danışıqlarda hansısa konstruktiv addımlar ata bilər. Ancaq ABŞ və Rusiya arasında geosiyasi mübarizənin kəskinləşdiyini nəzərə alsaq, belə bir təzyiqin ediləcəyini demək çətindir. Əsas odur ki, Rusiya bununla bağlı maraqlı olsun”.
Vidadi ORDAHALLI
