Bir vaxtlar Rusiyanın ən qüdrətli oliqarxlarından sayılan məhşur azərbaycanlı iş adamı Telman İsmayılov ətrafında baş verənlər onu yenidən medianın diqqət mərkəzinə gətirib. Belə görünür ki, yüz milyonlarla pulu əvvəllər sağa-sola xərcləyən bu şəxs indi həm maliyyə sahəsində ciddi problemlər yaşayır, həm də hüquq-mühafizə orqanları ilə yaşadığı problemlərin miqyası böyüyür.
Hətta “Rosbalt” agentliyinin Federal Təhlükəsizlik Xidməti və Daxili İşlər Nazirliyində mənbələri olan əməkdaşı Yuri Verşov iddia edir ki, Rusiya hüquq-mühafizə orqanları tezliklə Telman İsmayılovun barəsində beynəlxalq axtarış elan etməyə hazırlaşır. Bildirilir ki, Telman İsmayılovın adı sifarişli qətllər, özgə əmlakına qəsdən zərər vurulması da daxil olmaqla bir neçə maddə ilə qaldırılmış cinayət işində artıq fiqurant kimi keçir. Bura Moskvanın Lianozovsk bazarının yandırılması da daxildir.
Qeyd edək ki, harada olduğu dəqiq bilinməyən keçmiş milyarderin Türkiyədə də mövqeləri sıxışdırılır. Məsələn, elə bu yaxınlarda Telman İsmayılovun oğlu Sərxana məxsus lüks avtomobillərdən birinə həbs qoyulub. Həbs yerli şirkətlərdən birinin tələbi əsasında həyata keçirilib. Belə ki, Sərxan İsmayılovun şirkətə 465 min lirə məbləğində borcu var.
Telman İsmayılova məxsus "Mardan Palace" hotelinin baş direktoru Səlcuk Şəntəpə də faktı təsdiqləyib. Onun sözlərinə görə, İsmayılovlar ailəsi maliyyə çətinliyi ilə üzləşib. "Mardan Palace" rəsmisi əlavə edib ki, Türkiyə iqtisadiyyatına 1,5milyard dollarlıq sərmayə yatıran bir şəxslə bu cür rəftar yolverilməzdir: "O, avtomobilinin həbs olunması ilə diqqət mərkəzinə düşməyə layiq deyil". Məlumat üçün billdirək ki, üzərinə həbs qoyulan avtomobilin dəyəri 2 milyon dollardır. Bundan başqa, Türkiyənin ən dəbdəbəli otellərindən biri, Telman İsmayılov tərəfindən tikilmiş “Mardan Palace” qapanma ərəfəsindədir. Qeyd edək ki, oteli Telman İsmayılovun obyektlərinin müflisləşməsinə çalışan Rusiyanın VTB bankı ələ keçirmək istəyir. Bəzi mənbələrə görə, bu artıq 2017-ci ilin payızında baş tuta bilər. Xatırladaq ki, Telman İsmayılov bu otelin tikintisinə 1,5 milyard dollar pul xərcləyib. Lakin obyekt rentabelli olmayıb və tezliklə öz sahibini borc bataqlığına çəkməyə başlayıb. Digər tərəfdən, məhz bu oteldən sonra Rusiyada Telman İsmayılova münasibət dəyişib. Son günlərdə isə hüquq-mühafizə orqanlarının Telman İsmayılova qarşı fəaliyyəti daha da genişlənib.
Elə bu günlərdə Rusiyada ona aid 12 ünvanda qəfil axtarış aparılıb. Hüquq-mühafizə orqanları axtarış barədə şərh verməyib. Rusiya mediası yazır ki, Telman İsmayılovun adı qardaşı Rafiq İsmayılovun təşkil etdiyi sifarişli qətllərdə keçir. Xatırladaq ki, Rafiq İsmayılov biri keçmiş ortağı olmaqla iki biznesmenin qətlini sifariş etmək ittihamı üzrə həbsdədir. Digər qardaşı Vaqif İsmayılov da bu qətllərlə bağlı axtarışa verilib. İstintaqa ifadə verən gizli şahid Telman İsmayılovun hüquq-mühafizə orqanlarının yüksək rütbəli əməkdaşlarını pulla ələ aldığını danışıb. Və bu ifadə əsasında bəzi generalların da həbsi gözlənir. “Rosbalt” isə bildirir ki, Rusiya İstintaq Komitəsi hazırda İsmayılovlarla bağlı beş maddə ilə qaldırılmış cinayət işinin istintaqını aparır. Bura mütəşəkkil cinayətkar qruplaşma yaratmaq, qətllər, qanunsuz silah saxlama, qanunsuz bank fəaliyyəti, özgə əmlakının yandırılması maddələri daxildir.
Hələlik İsmayılovların daxil olduğu mütəşəkkil cinayətkar qruplaşma iki sifarişli qətldə ittiham olunur. Lakin İsmayılovları daha üç nəfərin qətlində şübhəli bilirlər. Mənbə deyib ki, reallıqda İsmayılovların əlaqəli olduğu qətllərin sayı 10-dan çox ola bilər. O bildirib ki, Rafiq İsmayılovun ”sağ əli“ hesab edilən Harri Belotserkovski hazırda istintaqla fəal əməkdaşlıq edir. Mənbənin bildirdiyinə görə, Rafiq İsmayılov ailədə güc əməliyyatlarına cavabdeh olub, o, ailənin işlərinə mane olanların aradan götürülməsini təşkil edib və kriminal aləmlə əlaqələr saxlayıb. Telman İsmayılov özü isə “Kommersant”a bildirib ki, onun ətrafında son günlər baş verənlər təxribatdır. Biznesmen eyham edib ki, onlar onun uşaqlarını və nəvələrini qorxudublar, ancaq axtarışları kimin və nə məqsədlə apardığını bilmir. Amma baş verənlər artıq keçmiş milyarderin qalmaqallı həbsinin olacağını istisna etmir. Artıq Rusiyanın bir çox media orqanlarında bu xüsusda çoxsaylı məlumatlar səslənir. Özü də İsmayılovların işi üzrə cinayət işində tezliklə güc strukturlarının bir neçə yüksək rütbəli nümayəndəsi də fiqurant ola bilər. Məlumatlara görə, İsmayılov qardaşlarının işi üzrə əməliyyat tədbirlərinə Federal Təhlüksizlik Xidmətinin mərkəzi aparatının əməkdaşları da qoşulub. Bütün bunlar Telman İsmayılov üçün artıq vəziyyətin çox gərginləşdyini göstərir. Üstəlik, əvvəlki himayədarları da bu şəxsdən üz dönədrib ki, belə vəziyyət də onun durumunu daha da ağırlaşdırır.
Nahid SALAYEV
