Arzu Nağıyev: “Araşdırmaların da şəffaf keçəcəyi artıq şübhə doğurur”
Erməni mətbuatı Azərbaycan haqda bəzi xarici media nümunələrində dərc edilən qərəzli məqalələrin təsir dairəsindən çıxa bilmir. Tez-tez həmin məlumatları tirajlayır və ya həmin mövzu ətrafında suyu bulandırır. Onların verdiyi məlumata görə, Avropa Parlamenti 349 səslə həmin iddiaları guya araşdırmaqla bağlı qərar qəbul edib.
Bildirilir ki, araşdırma sırasına guya Azərbaycan tərəfinin bəzi avropalı siyasətçilər və rəsmilərin rüşvət müqabilində mövqelərini dəyişməyə vadar faktoru aid edilib.
Məsələnin müxtəlif aspektləri maraq doğurur. Ermənistan mediasının sərgilədiyi sevincək mövqe aydındır. Çünki düşmən ölkə özü üçün bunu əlverişli şans sayır. Ancaq Avropa Parlamentinin təsdiqini tapmayan bir-iki qəzet məqaləsinə görə belə bir araşdırmaya qərar verməsi təəccüblüdür. Qeyd edək ki, Avropa Parlamenti Azərbaycanla bağlı qərəzli qərarları Avropa Oyunları ərəfəsi və başqa zamanlarda də çıxarıb. Belə reputasiyaya malik bir qurumun analoji araşdırmaları obyektiv və şəffaf aparması nə dərəcədə mümkün ola bilər?
Ekspert Arzu Nağıyev qəzetimizə açıqlamasında bildirdi ki, bu məsələyə erməni mətbuatının bu qədər maraq göstərməsi və tez-tez məlumatları tirajlaması müəyyən mətləblərdən xəbər verir: “Birinci odur ki, ermənilər, nəyin bahasına olursa-olsun, Azərbaycan haqda mənfi imic yaratmaqda maraqlıdır. İkincisi, söhbət insan haqları və Dağlıq Qarabağda guya onun tapdalanmasından gedir və çalışırlar ki, həmin yazıları bununla əlaqələndirsinlər. Bundan başqa, doğrudan da anti-Azərbaycan qüvvələri bu işdə maraqlıdırlar. Azərbaycanın apardığı müstəqil siyasət bir sıra Avropa dövlətlərini razı sala bilməz. Təsəvvür edin, ayrı-ayrılıqda dövlətlər Azərbaycanla dostluqdan danışır, müqavilələr imzalayır, lakin onların cəmləşdiyi qurum belə bəyanatlar verir. Deməli, burada maraq başqadır. Beynəlxalq normalarda heç bir dövlət maliyyə xərcləri ilə bağlı hesabat vermir. Bunu təbii ki, Azərbaycana da aid etmək olar. Onda gərək ABŞ, Almaniya, Fransa və digər aparıcı dövlətlər də dünyanın hansı nöqtəsində hər hansı əməliyyat aparıbsa, hesabat versin. Hətta araşdırmalar aparılsa belə, Azərbaycan cavabdeh qismində iştirak etməyə məcbur edilə bilməz və düşünürəm ki, belə də olacaq. Araşdırmaların da şəffaf keçəcəyi artıq şübhə doğurur. Çünki siyasi dividend qazanmağa çalışan Ermənistan və digər anti-Azərbaycan qüvvələrin əsas məqsədinin kökündə Azərbaycana qarşı qərəz durur”.
Məhəmmədəli QƏRİBLİ
